Jop 38 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei bơtho Jop

¹ Kơplah noh, đơ̆ng lăm kial hơbŭt Kră Yang tơl Jop:

² Bơngai 'nâu bu pơ̆n ưh kơ lui nơ̆r Inh wă pơm. Pơma lu nơ̆r mă ưh kơhlôh kơwao?

³ Ih athei gơhret tơlei tơ̆n thoi bơngai nuih kơtang Inh gô jet ih, na ih gô tơl tơwih kơ Inh!

⁴ Kơplah Inh dan hơnă plei teh, ih oei tơ yơ? Tơdah ih hlôh hơdah, roi ăn kơ Inh bĕ.

⁵ Bu pơkă hơgăt bơih să iĕ plei teh? Dah bu đei dăng tơlei pơtŏ bơih plei teh ih hăm băt ưh?

⁶ Jrăng sư dan kơpal kiơ? Bu đei pơtăm tơmo mum hơnă sư?

⁷ Kơplah sơnglŏng wŏng-tar hơri hơdai. Păng lu kon drŏ-nglo Kră Yang 'Bok Kei-Dei ôr jreo chơt hiôk.

⁸ Bu tang găn lê̆ 'măng đak dơsĭ. Kơplah sư ro lĕch đơ̆ng lăm teh thoi nge lĕch đơ̆ng klak mĕ sư?

⁹ Inh bơih ăn hơmơ̆l pơm hơbĕn ao kơ đak dơsĭ, iŏk măng mu pơm che wăn sư;

¹⁰ Inh bơih hơgăt hơdral ăn kơ đak dơsĭ. Tang chĭt 'măng păng tah chơkăl.

¹¹ Na khan: “Ih năm truh tôch dâu, ưh pă gơh năm ataih dơ̆ng ôh, Ih poh-yă athei dơ̆ng 'bơ̆t dâu!”

¹² Đơ̆ng năr hơiơch kơ ih, ih hăm đei lah tơtă kơ 'năr đei til pơgê hloi, Tơbăt ăn kơ 'năr hơdah anih sư oei.

¹³ Athei sư rôp kơjăp lu mum teh, Gơgŭ pơpuh bơngai kơnê̆ lĕch đơ̆ng noh.

¹⁴ Plei teh tơplih nhen thoi teh lơ̆n đei kơtĭt tơdra Kông groi lĕch 'bôh bang tơbơ̆ng thoi trong đe chơ̆p ao.

¹⁵ Tơdrong hơdah puh tơweh lê̆ bơih đơ̆ng bơngai pơm kơnê̆, Kơkŏng ti lu sư yơ̆r, pơm kơnê̆ tơgơ̆ bơih,

¹⁶ Hăm đei layơ ih jur truh tơ tu đak dơsĭ? Dah yak năm tơ jrŭ ala kơđĕl đak dơsĭ?

¹⁷ Hăm đei bu tơ'bôh kơ ih 'măng jang pơlei lôch? Ih tam 'bôh 'măng pơlei măng mu gueo?

¹⁸ Ih hăm gơh băt hlôh đĭ plei teh âu să tih dang yơ? Tơdah ih băt đĭ tơdrong 'noh, roi bĕ kơ inh.

¹⁹ Tơ yơ trong ba truh tơ anih tơdrong hơdah oei? Bĕ anih măng mu oei tơ yơ?

²⁰ Ih hăm gơh ba sư năm tơ anih sư? Hăm băt kơ trong năm tơ hnam sư oei ưh?

²¹ Ih kư̆m băt! Yua kơ đei tơpŭ kơ ih bơih kơplah noh, Jô̆ năr ih arih lơ sơnăm tơpă.

²² Ih hăm đei mơ̆t lăng anih mong prĕl ưh? Ih hăm 'bôh anih mong 'mi prĕl?

²³ Tơmam noh Inh 'măn lê̆ bơih kơ năr rŭng răng. Ăn kơ lăm năr tơblah wang.

²⁴ Tơ yơ trong anih kơmlat lĕch? Dah anih ayơ trong kial gah hơlĕch tơthu bah kơpal teh?

²⁵ Bu pơih trong ăn kơ đak 'mi ro, Pơih trong ăn kơ kơmlat grơ̆m glaih,

²⁶ Ăn kơ 'mi jruh tơ teh bri brah, Lăm char glă ưh đei bơngai oei;

²⁷ Wă ruh hơiuh kơ teh hrĕng kro. Pơm ăn kơ 'nhĕt chăt bluh?

²⁸ 'Mi hăm đei 'bă ưh? Bu pơjing đei tŭk?

²⁹ Đak prĕl lĕch đơ̆ng klak bu? Bu rơneh tơlĕch tŭk ngom đơ̆ng plĕnh?

³⁰ Đak krăl thoi lĕ tơmo, Hơlŭng jrŭ đak sư jing prĕl arăng.

³¹ Ih hăm gơh iŏk tơlei chô̆ hơdruh sơnglŏng “Waining”a Dah plôh yaih tơlei đơ̆ng sơnglŏng “Hơdrŭng iĕrb”?

³² Ih hăm gơh athei sơnglŏng lĕch kiơ̆ trŏ kơ bơyan, Păng ba ăn trong kơ sơnglŏng Gŭt-'năk hăm dôm lu kon sư ưh?

³³ Ih hăm băt tơdrong juăt tơ kơpal plĕnh? Yua tơdrong juăt noh pơgơ̆r bĕ teh đak?

³⁴ Ih hăm gơh ôr pơret tơtă kơ hơmơ̆l, athei 'mi tih lơ̆p kơ akâu ih?

³⁵ Ih hăm gơh wơh kơmlat athei sư nơnăm. Na lu sư hăm tơl ih khan: “Lu nhôn tơ âu?”

³⁶ Bu ăn tơdrong gơh hơgei lăm jơhngơ̆m păng ăn bơih tơdrong hlôh wao lăm kơ̆l 'ngok?

³⁷ Bu gơh yua tơdrong hơgei na jô̆ lu hơmơ̆l? Dah hăm đei bu gơh gơling tuh ge đak đơ̆ng plĕnh

³⁸ kơplah 'mi jur 'mui teh tơklep băl kơtuăl teh tơklep băl jing arăng?

³⁹ Ih hăm chă hơnguang tơmam sa ăn kơ dăm-brang akăn, Ăn kơ kon dăm-brang sa hrăp.

⁴⁰ Kơplah sư oei drum lăm anih trôm sư. Dah oei răp chop chă sem bri wă sa?

⁴¹ Bu chă tơmam sa ăn kơ ak; Kơplah hơnar sư krao ôr apinh Kră Yang 'Bok Kei-Dei, Dah păr wơ̆t wih to âu yua kơ ưh kơ đei tơmam sa?