Jop 37 - Sơ̆p Hlabơar Nơ̆r 'Bok Kei-Dei

Êlihu athei Jop

¹ Kơtơ̆ng tơdrong 'nâu, plei nuih inh pơpơ̆ Plei nuih inh 'bôm tĕnh thoi wă tơgloh lĕch đơ̆ng lăm kơtơh.

² Mơ̆ng bĕ, nơ̆r Kră Yang re jơwa thoi grơ̆m, nơ̆r re jơwa lĕch đơ̆ng 'bơ̆r Sư.

³ Kră Yang ăn kơmlat chêr 'blêt hơdah ala kơ plĕnh. Păng kơmlat Kră Yang pơchrang truh tơ jơ̆p tôch kơ teh.

⁴ Đơ̆ng rŏng kơ 'noh đei jơwa re Kră Yang ôr hơdrăi Grơ̆m re jơwa. Sư ưh pă kĕ pơkơ̆ng bơih kơplah đe kơtơ̆ng re jơwa grơ̆m kơmlat noh.

⁵ Kră Yang 'Bok Kei-Dei ăn kơ grơ̆m re jơwa hlĭch chrơp; Kră Yang pơm dôm tơdrong jang tih-tin, lu bơ̆n ưh kơ kĕ hlôh.

⁶ Kră Yang athei prĕl: “Jruh tơ ala teh!” Păng kư̆m pơma kơ 'mi hngach: “Athei 'mi tih pru pơrach,”

⁷ Kră Yang tang chĭt lê̆ ti rim 'nu bơngai đơ̆ng jang, Wă kơ rim 'nu bơngai gơh băt tơdrong jang Sư.

⁸ Kơplah 'noh lu sem bri kơdŭn mơ̆t tơ lăm trôm sư oei pơdơh lăm tơpu lu sư.

⁹ Kial hơbŭt truh đơ̆ng gah gơal, Kial tơngiĕt truh đơ̆ng gah yă-nơ̆m.

¹⁰ Đak prĕl lĕch đơ̆ng hơyuh kial Kră Yang 'Bok Kei-Dei dui jơhngơ̆m. Đak glung krong tih să prĕl hơ'bơ̆l jing tơmo hơrăk.

¹¹ Kră Yang mong đak lăm hơmơ̆l hơ'bơ̆l. Bơyar bơlang hơmơ̆l hăm kơmlat.

¹² Hơmơ̆l đông dăr kiơ̆ kơ Kră Yang. Pơm pơkeh tơdrong jang mă Kră Yang athei Jơ̆p kơ anih kơpal teh đak.

¹³ Kră Yang pơm pơkeh kiơ̆ thoi Sư wă kơpal teh. Phŏ iŏk sơnguĕt teh bơtho phak, phŏ ăn kơ kon bơngai tơdrong pŭn hiôk.

¹⁴ Ơ Jop, mơ̆ng bĕ nơ̆r 'nâu, Athei dơ̆ng hreh bĕ, tơchĕng gah dôm tơdrong jang hlĭch chrơp Kră Yang 'Bok Kei-Dei.

¹⁵ Ih hăm băt Kră Yang 'Bok Kei-Dei athei tơtă ăn thoi yơ kơmlat lĕch pơchrang đơ̆ng lăm hơmơ̆l?

¹⁶ Ih hăm băt ưh liơ hơmơ̆l đông kơjăp hơnơ̆ng hơnong? Noh tơdrong jang hlĭch chrơp đơ̆ng Tơ'ngla gơh hơgei tôm tơdrong?

¹⁷ Liơ hơbĕn ao ih tơtŏ, Kơplah teh oei hreh hơđơ̆ng. Kial đơ̆ng gơal tơthu?

¹⁸ Ih hăm gơh lơ̆k bơlang plĕnh tơgŭm hơdai Kră Yang 'Bok Kei-Dei, arăng thoi kơmĭl đe hling?

¹⁹ Apinh ih bơtho lu nhôn băt tơdrong wă pơma hăm Kră Yang; Lu nhôn oei măng mu ưh kơ hlôh, wă roi pơdah tơdrong 'nâu liơ.

²⁰ Inh ưh kơ pơ̆n wă pơma dơnuh hăm Kră Yang? Hăm đei bu wă kơ lôch răm.

²¹ 'Nâu đe ưh kơ pơ̆n lăng rang mơnhal pơchrang đơ̆ng plĕnh. Wă kial tơthu puh pơđông lê̆ hơmơ̆l plĕnh hlăng hơđah hơdong dơ̆ng.

²² Kră Yang truh đơ̆ng gah yă-nơ̆m lĕch pơchrang rang hơdah Kon bơngai hli tơrơ kơ tơdrong ư-ang rang mơnhal Sư.

²³ Kră Yang Kră Yang Tih Hloh, lu bơ̆n ưh kơ gơh năm jê̆. Tơdrong mơsêh Sư tih krưp dêh, tơdrong 'lơ̆ng tơpăt Sư sĭt tơpă ưh kơ đei layơ wă pơjuă bơngai bu.

²⁴ Yua kơ thoi 'noh na kon bơngai hli yom kơ Sư. Kră Yang ưh kơ đei hiơ̆k 'blŏk ôh kơ bơngai khan kơ sư kơdih gơh hơgei.