Jop 36 - Sơ̆p Hlabơar Nơ̆r 'Bok Kei-Dei

Êlihu bơnê kơ tơdrong 'lơ̆ng Kră Yang

¹ Êlihu pơma dơ̆ng:

² Apinh adrin mơ̆ng inh tŏ sĕt, inh gô tơblang tơ'bôh ăn kơ ih; Yua kơ inh oei đei nơ̆r pơma dŏng gah Kră Yang 'Bok Kei-Dei.

³ Inh chă pơpôi tơdrong gơh hơgei đơ̆ng lơ anih. Wă tơ'bôh Tơ'ngla pơjing inh 'lơ̆ng tơpăt.

⁴ Tơpă inh pơma ưh kơ hơlĕnh ôh; Minh 'nu bơngai gơh hơgei hlôh wao tơpă oei oei hăm lu iĕm.

⁵ Kră Yang 'Bok Kei-Dei Tơ'ngla Mơsêh Mơyang ưh kơ đei pơjăm bu. Sư hơgei hlôh wao kloh klĕch.

⁶ Sư ưh kơ lê̆ ôh bơngai pơm kơnê̆ arih. Sư sek tơlang tơpăt hơnơ̆ng ăn kơ bơngai pơmat-tat.

⁷ Sư bơwei bơngai 'lơ̆ng tơpăt. Ăn kơ lu sư hơ-oei 'bơ̆t tang-dŏ pơgơ̆r thoi lu pơtao Ăn kơ lu sư đei đe pơyom ling-lang.

⁸ Tơdah đe chô̆ lu sư hăm tơlei glang păng klêng lu sư hăm tơlei bră pơmat-tat.

⁹ Kră Yang tơbăt ăn kơ lu sư tơdrong lu sư pơm. Dôm tơdrong yoch noh dơ̆ng jơhngơ̆m pơang.

¹⁰ Kră Yang pơih ăn đon lu sư kơtơ̆ng nơ̆r bơtho hơmet. Tơtă athei lu sư weh đơ̆ng tơdrong kơnê̆.

¹¹ Tơdah lu sư chu mơ̆ng păng bơ̆jang kơ Kră Yang, lei dôm năr lu sư gô arih đei tơdrong hiôk chơt, sơnăm lu sư pŭn jơnap.

¹² Mă-lei tơdah lu sư ưh kơ wă mơ̆ng gô lôch kơ đao gưm. Lu sư gô lôch yua kơ ưh kơ hlôh kơwao.

¹³ Jơhngơ̆m lu bơngai ưh kơ lui răk mong tơdrong hil blĕk Kră Yang phak lu sư Kŭm oei ưh kơ krao apinh dŏng pơklaih.

¹⁴ Lu sư lôch kơplah oei hơmuh hơmŏng Chăl arih lu sư huŏng hiong răm hơdai hăm lu bơngai ngôi pơyô kư̆ kă, lăm anih kơkuh kơ rup yang.

¹⁵ Mă-lei Kră Yang 'Bok Kei-Dei yua tơdrong pơmat-tat na dŏng pơklaih bơngai đei pơmat-tat. Pơih đon lu sư lăm tơdrong gleh truh.

¹⁶ Kră Yang 'Bok Kei-Dei dui ih lĕch đơ̆ng anih pơmat-tat. Năm tơ anih rơhơi, jơhngơ̆m ưh pă đei hrăt-hrot. Gơ'bang ih 'bĕnh kơ tơmam sa 'băt nham.

¹⁷ Mă-lei ih oei jŏk kơ tơdrong phak lu bơngai pơm kơnê̆; Tơdrong sek tơlang phak tơpăt gô rôp ih.a

¹⁸ 'Nĕ ăn tơdrong blĕk yua kơ lu bơngai pơm kơnê̆ mơdrŏng dui ba ih jrok trong. 'Nĕ kơ puh lăm tơmam đe răt iŏk ih lơ kơnh ih wơ̆l kơ trong.

¹⁹ Mă ih krao apinh dŏng pơklaih kư̆m ưh kơ klaih đơ̆ng pơmat. Dôm tơdrong pran kơtang gơh kĕ ih. Kŭm ưh kơ gơh dŏng pơklaih ih.

²⁰ 'Nĕ kơ chang gô măng mu, Kơplah kon pơlei pơla đe anhăk ba pă 'bôh đơ̆ng anih sư.

²¹ Kơchăng bĕ, 'nĕ kơ wih tơ tơdrong yoch kơnê̆; Ih đei tơdrong pơmat-tat wă pơjuăt ih huay kơ pơm yoch.

²² Âu, Kră Yang 'Bok Kei-Dei đei tơdrong Mơsêh Mơyang Tih Hloh kơ đĭ-đăng, Hăm đei 'bok thây ayơ bơtho tơ'bôh thoi Kră Yang ưh?

²³ Hăm đei bu pơ̆n bơtho tơ'bôh ăn kơ Kră Yang băt trong Sư wă năm? “Hăm đei bu pơ̆n chrih khan Ih pơm glăi?”

²⁴ 'Blŏk hơri bơnê bĕ dôm tơdrong jang Kră Yang, Mă kon bơngai juăt kơ đei hơri bơnê.

²⁵ Đĭ-đăng bơngai tă kơ 'bôh ngăl boih tơdrong jang noh, Mă-lei oei lăng 'bôh đơ̆ng ataih.

²⁶ Trŏ tơpă, Kră Yang 'Bok Kei-Dei Tih-Tin dêh, hloh kơ bơ̆n băt hlôh; Sơnăm Sư arih sot dang yơ, ưh kơ đei bu gơh pơtŏ;

²⁷ Kră Yang hiup iŏk lu đak kơtoh, Sư tuh đak ngom jing 'mi.

²⁸ Lu tăl hơmơ̆l 'noh jruh đak 'mi, hơiuh hngôm kơ teh ăn kơ kon bơngai.

²⁹ Hăm đei bu gơh hlôh hơmơ̆l bơlang bơyar. Re jơwa grơ̆m đơ̆ng anih Sư oei?

³⁰ To, Kră Yang ăn kơmlat pơchrang hơdah jum dăr kơ Sư. Klơ̆p jơ̆p kơđĕl đak dơsĭ.

³¹ Kră Yang yua dôm tơdrong 'noh wă pơgơ̆r kon pơlei pơla; Kră Yang tuh ăn tơmam sa rơkah rơkai.

³² Kră Yang ôn grơ̆m glaih lăm ti Sư, ăn glaih taih trŏ kơ anih.

³³ Re grơ̆m glaih tơbăt tơdrong hơbŭt, sem dơrong kư̆m dai băt hơbŭt hơbang wă jê̆ truh.b