Jop 34 - Sơ̆p Hlabơar Nơ̆r 'Bok Kei-Dei

Êlihu roi pơdah Kră Yang 'Bok Kei-Dei tơpăt

¹ Êlihu pơma dơ̆ng:

² “Lu iĕm khan iĕm bơngai gơh hơgei, mơ̆ng bĕ nơ̆r inh. Lu iĕm tơchĕng khan iĕm bơngai hlôh wao, pơgling đon mơ̆ng bĕ nơ̆r inh pơma.

³ Yua kơ đon mơ̆ng kơtơ̆ng băt kơ nơ̆r pơma, thoi hơpiĕt liah mơn 'băt kơ tơmam sa.

⁴ Lu bơ̆n hơlen lăng hơdai tơdrong kiơ trŏ, rơih iŏk băt tơdrong kiơ 'lơ̆ng.

⁵ Yua kơ Jop đei khan: ‘Inh bơngai 'lơ̆ng tơpăt, Mă-lei Kră Yang 'Bok Kei-Dei ưh kơ jô̆ khan inh 'lơ̆ng tơpăt.

⁶ Mă khan inh 'lơ̆ng tơpăt ră, đe jô̆ boih inh bơngai pơma hơlĕnh; Mă khan inh ưh kơ đei pơm yoch, rơka inh hơmet kư̆m ưh kơ gơh klaih,’

⁷ Hăm đei bu thoi Jop, nhă nơ̆r đe pơjăm che bơle thoi kơ đak?

⁸ Sư pơm buăl juăt hăm bơngai pơm kơnê̆ păng năm hơdai hăm bơngai hơlĕnh pơdăr.

⁹ Yua kơ Jop khan: ‘Kon bơngai ưh kơ đei yua kiơ, Kơplah sư chơchă tơdrong hiôk chơt lăm Kră Yang 'Bok Kei-Dei.’

¹⁰ Mơ̆ng bĕ inh lu iĕm bơngai hlôh wao. Kră Yang 'Bok Kei-Dei ưh kơ đei layơ pơm kơnê̆, Kră Yang Tih Hloh ưh đei layơ đŏng đĕo.

¹¹ Kră Yang apah kon bơngai kiơ̆ kơ tơdrong jang lu sư pơm, Pơm kơ rim 'nu bơngai kiơ̆ kơ lu sư oei arih sa.

¹² Tơpă Kră Yang 'Bok Kei-Dei ưh kơ đei pơm kơnê̆ Kră Yang Tih Hloh ưh đei pơđŏng lê̆ tơdrong tơpăt.

¹³ Bu gơh ăn kơ Kră Yang tơdrong wei-lăng plei teh? Bu pơjao ăn kơ Kră Yang pơgơ̆r đĭ-đăng teh đak?

¹⁴ Tơdah Kră Yang pơkă wă pơm. Tơdah Sư pơdrâu iŏk bơhngol păng hơyuh kial dui jơhngơ̆m đơ̆ng Sư kơdih,

¹⁵ Đĭ-đăng lu sĕch akar gô lôch hơdai. Păng kon bơngai brŏk tơ 'mui teh.

¹⁶ Tơdah ih đei tơdrong hlôh hơdah, apinh ih mơ̆ng tơdrong 'nâu. Pơgling đon mơ̆ng bĕ nơ̆r inh pơma.

¹⁷ Bơngai mă areh kơ tơdrong tơpăt liơ gơh pơgơ̆r? Ih hăm pơ̆n pơma kơ Tơ'ngla 'lơ̆ng tơpăt Mơsêh Mơyang?

¹⁸ Kră Yang chrih khan kơ pơtao: “Ih tơdrong kơ đei.” Păng khan kơ lu bơngai pơgơ̆r: “Bơngai pơm kơnê̆.”

¹⁹ Kră Yang ưh kơ pơư kơ lu bơngai pơgơ̆r, Kŭm ưh kơ lăng kơ bơngai mơdrŏng hloh kơ bơngai dơnuh; Yua kơ đĭ-đăng lu sư đơ̆ng tơpang ti Kră Yang pơjing ngăl.

²⁰ Ưh kơ tam băt tŏk-bŏk măng, lu sư lôch hloi. Lu sư pơpơ̆ na lôch. Lu bơngai yŏng pơgơ̆r kư̆m lôch, ưh kơ đei đơ̆ng ti kon bơngai ôh.

²¹ Măt Kră Yang 'Bok Kei-Dei răp lăng tơ trong kon bơngai, Sư lăng 'bôh dôm yak.

²² Ưh kơ đei măng mu găm măng klăm hơ'bơ̆l ayơ ăn kơ bơngai pơm kơnê̆ gơh ôn akâu.

²³ Kră Yang 'Bok Kei-Dei ưh kơ đei pơkă năr. Wă sek tơlang kơ kon bơngai 'bơ̆t anăp Sư.

²⁴ Kră Yang pơrăm đĭ lu bơngai pran kơtang ưh kơ kăl kơ jet pơnhen, Na tơplih tơmơ̆t bơngai nai 'bơ̆t anih noh.

²⁵ Yua kơ Kră Yang băt tôm tơdrong jang lu sư pơm. Teh lu sư kơmăng păng lu sư pơchah đĭ hloi.

²⁶ Kră Yang pơrăm lu sư yua kơ lu sư pơm kơnê̆ Tơ anih rim 'nu gơh 'bôh.

²⁷ Yua kơ lu sư weh achăng lê̆ Kră Yang, Ưh kơ wă lăng ôh trong gơlong Kră Yang.

²⁸ Pơm kơ nơ̆r lu bơngai dơnuh hin ôr krao kơtơ̆ng truh tơ Kră Yang. Păng Kră Yang kơtơ̆ng nơ̆r bơngai pơmat-tat ôr krao.

²⁹ Tơdah Kră Yang oei ngăn hreh. Bu gô pơ̆n chrih kơ Sư? Tơdah Kră Yang ôn muh măt Sư, bu gơh đei 'bôh Sư? Kră Yang wei rong đĭ-đăng kon pơlei, đĭ-đăng bơngai,

³⁰ Ưh kơ ăn lu bơngai pơm kơnê̆ pơgơ̆r, păng ưh kơ ăn lu sư hơ'năk kơ kon pơlei hơđong.

³¹ Hăm đei bơngai bu khan kơ Kră Yang 'Bok Kei-Dei: “Inh chu pŭ tơdrong Ih phak bơtho, inh ưh pă pơm kơnê̆ dơ̆ng;

³² Tơdrong kiơ inh ưh kơ 'bôh, apinh Kră Yang bơtho tơ'bôh ăn kơ inh; Tơdah inh đei pơm kơnê̆, inh gô ưh pă pơm dơ̆ng?”

³³ Kră Yang 'Bok Kei-Dei hăm đei apah bơngai noh kiơ̆ kơ ih tơchĕng ưh? Yua kơ ih sơngah bơih kơ tơdrong Kră Yang bơtho pơjĭ. Na ih athei rơih iŏk, ưh kơ trŏ kơ inh ôh; Lei na tơdrong kiơ ih băt, athei pơma bĕ.

³⁴ Lu bơngai hlôh wao gô khan kơ inh. Păng lu bơngai gơh hơgei oei mơ̆ng inh, kư̆m gô khan:

³⁵ ‘Jop pơma ưh kơ đei hăm tơdrong hlôh wao, păng nơ̆r sư pơma kư̆m ưh kơ đei tơchĕng tôm.’

³⁶ Rŏ kơ Jop chu ăn tơdrong pơlong truh kơ tôch, Yua kơ sư tơl nơ̆r thoi bơngai pơm kơnê̆;

³⁷ Sư đei pơm tơdrong yoch bơih, rai pơthim pơrŭng. Pơjăm pơjuă tap ti sư tŏk-bŏk lu nhôn, Păng rai pơma lơ nơ̆r ayăt hăm Kră Yang 'Bok Kei-Dei.”