Jop 32 - Sơ̆p Hlabơar Nơ̆r 'Bok Kei-Dei

Nơ̆r Êlihu pơma bơtho

¹ Pêng 'nu bơngai 'noh ưh pă đei tơl nơ̆r Jop, yua kơ Jop khan kơ kơdih bơngai 'lơ̆ng tơpăt.

² Mă-lei Êlihu, kon drŏ-nglo Barakel, bơngai Busit, adrĕch adrung Ram, Sư hil kơ Jop, yua kơ Jop khan sư bơngai 'lơ̆ng tơpăt hloh kơ Kră Yang 'Bok Kei-Dei 'lơ̆ng.

³ Êlihu kư̆m hil blĕk kơ pêng 'nu buăl Jop yua kơ lu sư ưh kơ đei wă tơl tơwih, na jâu khan Jop yoch đĕch.

⁴ Êlihu oei răp gô wă tơl nơ̆r Jop, yua kơ pêng 'nu bơngai 'noh 'lŏ kơ sư ngăl.

⁵ Mă-lei Êlihu 'bôh pêng 'nu noh ưh pă đei tơl tơwih nơ̆r kiơ bơih, tơdrong blĕk sư iung hloi.

⁶ Êlihu, kon drŏ-nglo Barakel, bơngai Busit iung pơma: “Inh oei 'lơ̆p lu iĕm bơngai kră ngăl bơih inh 'nhrơ̆ hli, Ưh kơ pơ̆n roi ăn kơ lu iĕm tơdrong kiơ inh băt.

⁷ Inh tơchĕng khan: ‘Lu 'lŏ kăl kơ pơma, Lu bơngai kră gô bơtho tơdrong gơh hơgei.’

⁸ Mă-lei đei Yang bơhngol 'lơ̆ng oei lăm kon bơngai, Păng hơyuh kial dui jơhngơ̆m Kră Yang Tih Hloh ăn kơ sư tơdrong hlôh gơh hơgei.

⁹ Ưh kơ trŏ bơngai 'lŏ kră khan gơh hơgei, Lu bơngai kră kư̆m ưh kơ trŏ khan băt hlôh tơdrong trŏ.

¹⁰ Na inh khan: Mơ̆ng inh bĕ; Inh kư̆m wă gô tơbăt ăn kơ iĕm inh băt tơdrong kiơ.

¹¹ Inh răp gô mơ̆ng dôm nơ̆r iĕm pơma, Pơgling đon mơ̆ng dôm nơ̆r lu iĕm tơ'bôh tơdrong gơh hơgei, Kơplah iĕm chă nơ̆r ayơ wă tơl.

¹² Inh adrin pơgling đon mơ̆ng lu iĕm pơma, Mă-lei ưh kơ đei minh 'nu bu lăm lu iĕm kĕ kơ Jop, Wă tơ'bôh kơ sư đei yoch. Dah gơh tơl nơ̆r sư.

¹³ Kơchăng bĕ 'nĕ hăt pơma khan: ‘Lu nhôn chă 'bôh bơih tơdrong gơh hơgei; Kră Yang 'Bok Kei-Dei gơh tơ'bôh kơ Jop, kon bơngai ưh kơ gơh tơ'bôh.’

¹⁴ Jop ưh kơ đei pơjah pơjăng hăm inh, Na lei, inh ưh kơ tơl tơwih kơ sư thoi nơ̆r lu iĕm.

¹⁵ Lu sư hơdrôt hli ưh pă gơh tơl nơ̆r kiơ dơ̆ng; Lu sư đĭ pă đei nơ̆r bơih,

¹⁶ Inh hăm wă gô dơ̆ng, lu sư đĭ pă pơma bơih, Lu sư oei tơ noh đĭ ưh pă đei tơl nơ̆r bơih?

¹⁷ Inh kư̆m lei-lăi gô tơl nơ̆r mơ̆n; Inh kư̆m wă roi tơdrong inh băt

¹⁸ Yua kơ inh đei lơ nơ̆r wă pơma, lăm jơhngơ̆m inh pơdrŭt inh pơma.

¹⁹ Jơhngơ̆m inh nhen thoi Sik hơmu blôk ưh kơ đei trong lĕch. Wă jê̆ pơchah thoi kơdŭng sik 'nao.

²⁰ Inh wă 'maih pơma wă gơh rơhơi jơhngơ̆m 'biơ̆. Inh gô ha 'bơ̆r pơma păng tơl nơ̆r.

²¹ Inh ưh kơ đei 'mêm kơ mah kah kơ hu ôh, Kŭm ưh kơ đei pôk hơtŏk bơngai ayơ.

²² Yua kơ inh ưh kơ băt pôk hơtŏk bu. Tơdah đei, Tơ'ngla pơjing inh pơlôch inh hloi.”