Jop 31 - Sơ̆p Hlabơar Nơ̆r 'Bok Kei-Dei

Jop pơkă wă arih 'lơ̆ng rơgoh

¹ Inh đei pơgơ̆p hăm măt inh; Inh ưh pă lăng tơ bơngai adruh hle.

² Thoi 'noh mơ̆ng kơ Kră Yang 'Bok Kei-Dei đơ̆ng kơpal plĕnh ăn kơ inh tơmam kiơ. Mŭk tơmam kiơ đơ̆ng Kră Yang Tih Hloh đơ̆ng kơpal plĕnh?

³ Hăm trŏ lu bơngai pơm kơnê̆ tơ'bơ̆p tơdrong gleh truh? Lu bơngai pơm kơnê̆ đei pơmat-tat?

⁴ Hăm trŏ Sư 'bôh trong inh yak, Păng jô̆ dôm inh yak nơnăm?

⁵ Tơdah inh đei năm hơdai hăm lu bơngai hơlĕnh pơdăr Dah jơ̆ng inh hăt hot yak kiơ̆ trong lu bơngai bơkuĕch.

⁶ Apinh Kră Yang 'Bok Kei-Dei dan inh tơ kơpal 'long kŏng mă trŏ, Na Sư gô băt kơ inh 'lơ̆ng tơpăt.

⁷ Tơdah jơ̆ng inh yak weh đơ̆ng trong 'lơ̆ng tơpăt, Tơdah jơhngơ̆m inh năm kiơ̆ măt inh lăng, Tơdah đei mơgrĭ klep lăm ti inh,

⁸ Ăn kơ bơngai nai sa mă đơ̆ng inh rei, Ăn kơ lu sư buch lê̆ đêl inh pơtăm.

⁹ Tơdah jơhngơ̆m inh hưch huŏng kơ bơngai drŏ-kăn, Tơdah inh năm chop răp tơ 'măng hnam sư.

¹⁰ Ăn akăn inh peh ăn kơ đe 'ba. Păng lê̆ kơ đe 'bĭch hơdai hăm sư.

¹¹ Tơdrong 'noh glăi yoch trăp tih dêh. Trŏ kơ sek tơlang phak,

¹² Yoch noh bơih mă thoi ŭnh sa kơdơ̆r lăm dơnâu ŭnh. Sa pơrăm đĭ truh tơ rơh dôm hơnik hơnam mă inh đei.

¹³ Tơdah inh đei pơdê tơdrong 'măn ăn kơ đĭch đam drŏ-nglo drŏ-kăn inh, Kơplah lu sư pơma jŏk kơ inh.

¹⁴ Na inh wă pơm liơ mưh Kră Yang 'Bok Kei-Dei iung sek tơlang inh? Truh tơ Sư apinh jet inh. Inh gô tơl Sư lơliơ?

¹⁵ Hăm trŏ Tơ'ngla pơjing inh lăm klak mĕ inh, kư̆m pơjing lu sư hai? Hăm trŏ lăp minh Kră Yang 'Bok Kei-Dei đĕch pơjing kơ lu yŏng păng lu đĭch?

¹⁶ Tơdah inh sơngah ưh kơ ăn ôh tơmam kơ bơngai dơnuh dơnan hơpơi wă, Tơdah inh lê̆ bơngai adro chang gô dĭng pă hơmĕng.

¹⁷ Tơdah inh sa hơdrô̆ minh 'nu inh. Ưh kơ asong bơngai mơti,

¹⁸ tơpă mơti đơ̆ng oei nge inh 'me rong sư thoi 'bă. Inh chông anhăk bơtho tơ'bôh đơ̆ng mĕ sư 'nao tơpŭ kơ sư.

¹⁹ Tơdah inh 'bôh bơngai wă jê̆ lôch yua ưh kơ đei hơbĕn ao, Dah bơngai dơnuh kơ'bah ưh kơ đei khăn su,

²⁰ tơdah lu sư ưh kơ đĭ jơhngơ̆m sơkat pŭn hiôk kơ inh, kơplah lu sư gơh tơnŏ đơ̆ng sŏk triu inh,

²¹ Tơdah inh đei yơ̆r ti hơ-ô wă pơm kơ lu bơngai mơti, yua kơ inh băt bơngai dŏng inh tơ 'măng jang,

²² Ăn kơ hơngiĕng inh tơhleh đơ̆ng akâu inh, Păng kơkŏng ti inh tơgơ̆ kơtĕch đơ̆ng 'bơ̆t kŭl-keng.

²³ Yua kơ inh hli kơ tơdrong răm truh đơ̆ng Kră Yang 'Bok Kei-Dei, Inh hli krưp kơ tơdrong rang mơnhal Sư na inh ưh kơ layơ pơm tơdrong noh.

²⁴ Tơdah inh gơnang kơ maih păng krao maih rơgoh khan anih inh gơneh gơnơm,

²⁵ tơdah inh hiôk chơt kơ mŭk drăm lơ, dah yua kơ đơ̆ng ti inh đei chă lơ tơmam.

²⁶ Tơdah inh lăng tơ măt 'năr pơchrang hơdah Păng măt khei lĕch pơchrang hơdah hơdong rơđah,

²⁷ Jơhngơ̆m inh đei pơhlŭ hơgơ̆m, păng 'bơ̆r inh chŭm chro ti inh rôp kơkuh pơyom,

²⁸ tơdrong 'noh minh tơdrong yoch kơnê̆ trŏ kơ sek pơlôch, Yua kơ inh sơngah kơ Kră Yang 'Bok Kei-Dei tơ kơpal ti.

²⁹ Tơdah inh hiôk chơt yua kơ bơngai areh kơ inh đei tơdrong răm truh, Păng chhôk hơnôk kơplah lu sư đei tơdrong pơmat-tat,

³⁰ Inh ưh kơ ăn 'bơ̆r inh pơm yoch, Hiap pơtê̆ kơ tơdrong arih sư.

³¹ Lu bơngai lăm hnam dơnŏ inh ưh kơ đei pơma: “Hăm đei bu mă Jop ưh kơ đei ăn sa 'nhĕm phĭ mah?”

³² Bơngai tơmoi ưh kơ đei tep kơmăng tơ 'nguaih tơ trong; Inh pơih 'măng sơng bơngai tơmoi đơ̆ng ataih;

³³ Inh ưh kơ đei ôn tơdrong yoch inh thoi Ađam. Na 'bŭ ôn tơdrong yoch kơnê̆ lăm jơhngơ̆m.

³⁴ Yua kơ inh hli dêh kơ lu bơngai tơpôl, hli krê kơ adrĕch adrung che bơle, dĭng mah ngăn hreh, ưh kơ pơ̆n lĕch tơ 'nguaih kơ 'măng.

³⁵ Ơ! Rŏ kơ đei bơngai mơ̆ng inh! 'Nâu inh chă kĭ chih anăn inh apinh Kră Yang Tih Hloh tơl nơ̆r inh; Apinh bơngai jâu inh chih tơ'bôh tơdrong yoch inh!

³⁶ Tơpă inh gô tôi tơdrong kơnê̆ 'noh tơ kơpal hơngiĕng inh. Yơ̆l sư thoi môk pơtao.

³⁷ Inh gô roi pơdah ăn kơ Kră Yang dôm tơdrong inh pơm. Inh gô năm 'bơ̆t anăp Sư nhen thoi minh 'nu kon pơtao.

³⁸ Tơdah teh mir na inh ôr krao jâu inh, dôm trong rơuơ sư wang nhơ̆m;

³⁹ Tơdah inh iŏk sa tơmam sư mă ưh kơ ăn jên, Pơm ăn kơ tơ'ngla sư lôch kơ pơngot,

⁴⁰ Lei apinh tơm jơla chăt tơplih kơ tơm 'ba, păng 'nhĕt tơplih ăn kơ 'ba tơ'bâu. Truh dâu đĭ nơ̆r Jop.