Jop 3 - Sơ̆p Hlabơar Nơ̆r 'Bok Kei-Dei

Jop hiap năr tơpŭ kơ sư

¹ Klaih kơ noh Jop pơtơm pơma hiap năr tơpŭ kơ sư.

² Sư khan:

³ Năr tơpŭ kơ inh rŏ kơ hiong răm đĭ păng măng kư̆m khan: “Đe tơpŭ bơih kơ minh 'nu kon drŏ-nglo” ưh pă đei dơ̆ng.

⁴ Rŏ kơ năr noh jing măng mu, Rŏ kơ Kră Yang 'Bok Kei-Dei đơ̆ng kơpal ưh kơ lăng ôh năr noh kư̆m ưh kơ đei hơdah pơchrang tơ sư.

⁵ Rŏ kơ măng mu păng hơmơ̆l tơdrong lôch iŏk lê̆ năr noh; rŏ kơ hơmơ̆l gom lê̆ sư, rŏ kơ măng mu kơ'năr pơm kơ sư hli.

⁶ Rŏ kơ măng mu hơ'bơ̆l rôp pơkơ̆ng măng noh. Rŏ kơ lê̆ pă jô̆ năr noh hơdai lăm sơnăm. Kŭm ưh pă jô̆ năr noh lăm lu khei.

⁷ Rŏ kơ măng noh ưh kơ đei bu anăp. Ưh kơ đei nơ̆r chơt hiôk lăm kơplah noh.

⁸ Rŏ kơ bu mă juăt kơ hiap, hiap bĕ năr noh. Rŏ kơ bu juăt kơ râu Lêwiathan,a hiap bĕ măng noh

⁹ Rŏ kơ sơnglŏng wŏng-tar jing măng mu; rŏ kơ sư chang gô hơdah, mă-lei ưh kơ 'bôh 'brưch hơdah, kư̆m ưh kơ đei 'bôh hơdah lĕch.

¹⁰ Yua kơ măng noh ưh kơtang lê̆ măng tơpu kon mĕ inh na anăp kơ inh. Kŭm ưh kơ đei ôn lê̆ tơdrong pơmat-tat đơ̆ng măt inh.

¹¹ “Liơ inh ưh kơ lôch hloi lăm năr 'nao jruh. Ưh kơtĕch jơhngơ̆m hloi lăp hlôi đơ̆ng mĕ inh.

¹² Liơ mă kŭl-tăng mĕ inh kơ'mĭn sơng iŏk inh păng đei hloi toh tơmŏm inh?

¹³ Dah inh lôch dang ei inh 'bĭch hiôk bơih, inh tep păng pơdơh hiôk.

¹⁴ Hơdai hăm lu yŏng păng pơtao teh đak, lu bơngai mă pơjing anih dang ei ning-mônh kơdih gô hiong răm.

¹⁵ Hơdai hăm lu yŏng pơgơ̆r đei hu maih tah mong 'bĕnh kơ hnam lu sư.

¹⁶ Liơ đe ưh kơ 'bŭ inh lăm teh, thoi kon nge rơngăt Thoi nge lôch lăp 'nao hlôi jah ưh kơ 'bôh hơdah măt 'năr?

¹⁷ Tơ bơsat noh bơngai kơnê̆ ưh pă đei pơrăm boih, păng bơngai rơdu rơmơ̆n gô pơdơh.

¹⁸ Lu bơngai đe phak rơnŭk hiôk, ưh pă kơtơ̆ng nơ̆r đe wei hil hơdrăi.

¹⁹ Tơ noh bơngai mơdrŏng, dơnuh kư̆m lei-lăi, păng bơngai đĭch gơh rơngei đơ̆ng yŏng tơ'ngla sư pơgŏ pơđep.”

²⁰ “Liơ bơngai pơmat-tat rai gơh 'bôh hơdah, păng bơngai chhŭr nuih na oei gơh arih?

²¹ Lu sư hơpơi wă kơ lôch, mă ưh kơ gơh lôch; lu sư wă kơ lôch hloh kơ chă anih đe ôn hu maih.

²² Lu sư chơt hiôk 'nă hal. Hiôk-hian truh tơ đe 'bŭ lăm bơsat,

²³ Liơ bơngai mă yak lăm trong đe chĭt bơih, Kră Yang 'Bok Kei-Dei war chĭt tăp dăr, mă gơh 'bôh hơdah?

²⁴ Inh tơtok tơtăm truh tơpă gơh sŏng sa. Inh nhơ̆m hmoi ôr thoi đak ro.

²⁵ Tơdrong inh hli truh tơ inh bơih. Tơdrong mă inh tơrơ krưp tuh klơ̆p tơ inh.

²⁶ Inh tam đei arih hiôk hơđơ̆ng, Kŭm tam đei pơdơh rơhơi jơhngơ̆m tơdrong gleh pơmat truh tơ inh hloi!”