Jop 29 - Sơ̆p Hlabơar Nơ̆r 'Bok Kei-Dei

Jop 'blŏk kơ sơ̆ sư hiôk jơnap

¹ Jop pơma dơ̆ng:

² Ôi hơpơi rŏ kơ inh gơh arih dơ̆ng thoi lĕ khei 'năr ki sơ̆, 'Bơ̆t mă Kră Yang 'Bok Kei-Dei oei wei-lăng inh;

³ Lăm kơplah ŭnh kơđeng Kră Yang oei pơchrang hơdah kơpal kơ̆l inh. Đơ̆ng tơdrong hơdah Kră Yang na inh năm hlôi kơ măng mu.

⁴ Ô! Kơplah inh oei đei 'bôh lăm inh oei mơlôh. Kơplah Kră Yang 'Bok Kei-Dei pơm buăl juăt tơgŭm dŏng hnam inh.

⁵ Kơplah Kră Yang Tih Hloh oei oei hăm inh, lu kon hơ'lơ̆p inh tăp dăr kơ inh;

⁶ Kơplah jơ̆ng inh yak tong lăm đak toh, Păng đak rơmă ôliwơ lĕch ro thoi glung đơ̆ng tơpăl tơmo hmĕt.

⁷ Kơplah noh inh lĕch năm tơ 'măng jang pơlei, Hơmet anih hơ-oei lăm cham anih juăt akŭm.

⁸ Lu bơngai tơdăm 'bôh inh lu sư kơdŭn weh, Lu bơngai kră iung dang dơ̆ng,

⁹ Lu bơngai kră pơgơ̆r pă đei pơma, lu sư kơđôp 'bơ̆r hăm tơpang ti;

¹⁰ Lu bơngai yŏng ngăn hreh thĕng. Hơpiĕt lu sư klep tơ păk-'ngơk.

¹¹ Đon bu kơtơ̆ng nơ̆r inh na khan pơư inh đei pŭn hiôk. Măt bu 'bôh inh bơnê kơ inh hloi.

¹² 'Noh yua kơ inh dŏng pơklaih bơngai dơnuh pơmat-tat krao ôr, Păng bơngai mơti ưh kơ đei bơngai bu tơgŭm.

¹³ Bơngai wă jê̆ lôch sơkat tuh ăn kơ inh pŭn hiôk. Đơ̆ng inh, jơhngơ̆m bơngai adro chơt hiôk.

¹⁴ Inh hrŭk tơdrong 'lơ̆ng tơpăt thoi ao. Tơdrong tơpăt inh sư thoi kơ ao tai păng che tơ̆n.

¹⁵ Inh thoi lĕ măt ăn kơ lu bơngai tol, păng thoi jơ̆ng kơ lu bơngai jo.

¹⁶ Inh pơm 'bă kơ lu bơngai pơmat-tat, Inh lăng hơlen sek dŏng lu bơngai inh tam lah băt.

¹⁷ Inh teh tơgơ̆ lê̆ grĕng lu bơngai pơm kơnê̆, Hek pơdŭng iŏk tơmam sa đơ̆ng hơnĕnh sư.

¹⁸ Inh tơchĕng khan: “Inh gô lôch lăm anih tơpu inh; Năr inh gô rai lơ thoi chuơh đak dơsĭ;”

¹⁹ Rơh inh hro sôr kơjung truh tơ cheng đak, dơng hla hngôm kơ đak ngom kơmăng,

²⁰ Inh đei ư-ang 'nao ling-lang, Jơhngơ̆m pran inh 'bĕnh-'bang thoi hră 'nao lăm ti inh.

²¹ Đon đe oei mơ̆ng răp gô inh, oei hreh mơ̆ng nơ̆r inh pơđâu.

²² Đơ̆ng rŏng kơ inh pơma, lu sư ưh pă đei bu pơma dơ̆ng bơih; Nơ̆r inh pơma mơ̆t jrŭ lăm jơhngơ̆m lu sư.

²³ Lu sư chang gô inh nhen thoi chang gô đak 'mi, Lu sư bơngai ha 'bơ̆r jrŏng đak 'mi klui.

²⁴ Inh hiĕk yôp pơlung lu sư 'bơ̆t lu sư rơdu. Muh măt hơdah inh tơgŭm tơiung lu sư.

²⁵ Inh chă trong ăn kơ lu sư, inh pơgơ̆r lu sư. Inh oei hơdai lu sư thoi pơtao oei lăm lu khŭl linh. Thoi bơngai pơlung đe ơh kơ lôch.