Jop 26 - Sơ̆p Hlabơar Nơ̆r 'Bok Kei-Dei

Jop pơyom kơ Kră Yang 'Bok Kei-Dei

¹ Jop tơl khan:

² Ih pơdŏng bơih bơngai ưh kơ jing jat ưh kơ tat tơdrong! Dŏng tơgŭm tơpang ti bơngai rơdu tơrăn.

³ Bơtho tơ'bôh bơngai ưh kơ hlôh, Bơtho tơbăt lơ tơdrong gơh hơgei.

⁴ Đơ̆ng bu bơtho tơgŭm ih pơma nơ̆r noh? Bơhngol bu pơma mă lĕch đơ̆ng 'bơ̆r ih?

⁵ Bơngai lôch tơtơ̆ tơtey, pơpơ̆ pơpol. Lăm ala đak păng đĭ lu kiơ arih oei tơ lăm noh hai.

⁶ Pơlei bơngai lôch tơlĕch pơdah bơih 'bơ̆t anăp Kră Yang 'Bok Kei-Dei, Păng sơlŭng jrŭ ưh kơ đei che pĕng hlơp,

⁷ Kră Yang bơyar plĕnh tơ gah yă-nơ̆m tơ kơpal anê̆ rơwơ̆ng. Hơtol kơtuăl teh tơ kơpal rơwơ̆ng.

⁸ Kră Yang mong đak 'mi lăm hơmơ̆l hơ'bơ̆l, Mă-lei hơmơ̆l ưh kơ đei tơhek yua kơ đơ̆ng đak lơ.

⁹ Kră Yang pĕng klơ̆p kơpal tang-dŏ pơtao Sư păng lơ̆k hơmơ̆l klơ̆p tang-dŏ 'noh.

¹⁰ Kră Yang chhơ̆ plĕnh chro kơpal đak, 'Bơ̆t sơlam hơdah hăm măng mu păng măng mu tơ'bưh băl.

¹¹ Lu jrăng plĕnh tơdrŏ kyĭng kyơ̆ng, Hli tơrơ kơplah Kră Yang 'Bok Kei-Dei chrih.

¹² Kră Yang iŏk tơdrong mơsêh Sư pơm kơ đak dơsĭ hơđơ̆ng ngơ-ngơ̆n. Yua tơdrong gơh hơgei Sư na teh tơhuŏng lê̆ Rahap.

¹³ Hăm kial dui jơhngơ̆m Sư hơmet ming lu plĕnh, Tơpang ti Kră Yang 'bet hlôh akâu 'bih oei kơdâu klĕnh.

¹⁴ Noh lăng brih tŏ sĕt đĕch tơdrong jang Sư; Tơdrong mă đe roi bơ̆n kơtơ̆ng noh lăp iĕ ioch đĕch mă-lei bu hlôh rơđah jơwa grơ̆m re Mơsêh Mơyang Sư?