Jop 23 - Sơ̆p Hlabơar Nơ̆r 'Bok Kei-Dei

Jop 'maih pơma dŏng sư kơdih

¹ Jop tơl khan:

² Mă truh năr 'nâu, tơdrong hơdrĭ inh oei đei ơh sơ'ngon, Ti kơtĭt kơpal inh oei trăp mă khan inh krao ôr.

³ Inh rŏ kơ băt anih ayơ chă tơ'bơ̆p Kră Yang, Inh gô năm kơkuh kơ Sư!

⁴ Inh gô ră roi pơdah tơdrong inh 'bơ̆t anăp Sư, Păng 'bơ̆r inh gô pơma dôm tơdrong trŏ lăp.

⁵ Inh gô băt dôm nơ̆r Kră Yang tơl tơwih ăn kơ inh. Inh gô hlôh dôm tơdrong Kră Yang wă pơma bơtho inh.

⁶ Hăm trŏ Sư iŏk tơdrong mơsêh tih Sư pơjah pơjăng hăm inh? Ưh ôh, Sư gô mơ̆ng kơ inh.

⁷ Tơ noh lu bơngai 'lơ̆ng tơpăt gơh roi pơdah tơdrong Sư 'bơ̆t anăp Kră Yang. Păng inh gơh klaih đơ̆ng sek tơlang ling-lang hlŏng hloi.

⁸ 'Nâu, inh năm tơ anăp, ưh kơ đei Kră Yang tơ noh; Inh kơdŭn tơ rŏng, mă-lei inh lăng kư̆m ưh kơ 'bôh Sư.

⁹ Kơplah Kră Yang jang tơ gah yă-nơ̆m, inh ưh kơ 'bôh Sư; Sư weh tơ gah gơal, inh chă lăng kư̆m ưh kơ 'bôh sư.

¹⁰ Mă-lei Kră Yang băt trong inh nơnăm; kơplah Kră Yang pơlong lăng inh, inh gô lĕch thoi maih.

¹¹ Jơ̆ng inh kiơ̆ jê̆ yak Sư Inh bơwei yak kiơ̆ trong sư, ưh kơ weh-woh.

¹² Inh ưh kơ tơklah kơ nơ̆r tơtă đơ̆ng 'bơ̆r Sư. Inh răk lăm jơhngơ̆m inh nơ̆r đơ̆ng 'bơ̆r Kră Yang hloh kơ tơmam sŏng sa.a

¹³ Mă-lei Kră Yang ưh kơ đei tơplih ôh. Bơngai bu pơ̆n tơplih Sư? Tơdrong kiơ Sư wă, Sư pơm hloi.

¹⁴ Yua kơ Sư gô pơm keh tơdrong kiơ, Sư wă pơm kơ inh. Lăm jơhngơ̆m Sư tơchĕng lơ tơdrong lei-lăi thoi noh.

¹⁵ Yua kơ noh boih na inh hli krưp dêh 'bơ̆t anăp Sư; Rai tơchĕng inh rai hli kơ Sư loi.

¹⁶ Kră Yang 'Bok Kei-Dei pơm kơ inh rơmơ̆n rơmok. Kră Yang Tih Hloh pơm kơ inh hli tơrơ;

¹⁷ Yua kơ măng mu klơ̆p gom inh ưh kơ wă ngăn ôh Măng klăm hơ'bơ̆l gom klơ̆p lê̆ muh măt inh.b