Jop 20 - Sơ̆p Hlabơar Nơ̆r 'Bok Kei-Dei

Sôphar roi kơ tơdrong phak lu bơngai pơm kơnê̆

¹ Sôphar bơngai Naama tơl:

² Nơ̆r inh pơm kơ, đon tơchĕng rŭng răng pơtrŭt inh athei tơl, yua kơ jơhngơ̆m inh hơwơ̆l hơwang ưh kơ hơđơ̆ng

³ Inh kơtơ̆ng nơ̆r bơtho pơjăm inh, Păng tơdrong hlôh pơtrŭt inh athei tơl.

⁴ Ih hăm băt, đơ̆ng sơ̆ ki sơ̆ kach Iŏk đơ̆ng Kră Yang 'nao pơjing kon bơngai kơpal teh sơ̆.

⁵ Lu bơngai pơm kơnê̆ chhôk lăp tŏ sĕt đĕch, Păng tơdrong chơt hiôk lu bơngai ưh kơ lui kư̆m lăp minh bruh mơ̆n.

⁶ Mă khan lu bơngai noh sư pơang truh tơ plĕnh Mă kơ̆l lu sư hơtŭt kơ hơmơ̆l,

⁷ Sư gô hiong hach ling-lang thoi ĭch sư kơdih. Lu bơngai mă juăt kơ 'bôh sư jet; “sư tơ yơ bơih?”

⁸ Sư gô păr hiong biŏng thoi apo 'bôh kơmăng, pă đei bu 'bôh sư dơ̆ng,

⁹ Măt mă đêl 'bôh sư, ưh pă 'bôh sư dơ̆ng, Tơ anih đêl sư oei kư̆m pă đei sư tơ noh.

¹⁰ Kon sâu sư gô apinh đơ̆ng bơngai dơnuh, ti lu sư athei pơdrâu 'mong tơmam mă đêl 'bă sư iŏk bơih.

¹¹ Akâu sư 'bĕnh kơ tơdrong pran oei hơmuh hơmŏng mă-lei gô lôch hơdai sư jing 'mui teh.

¹² Mă khan pơm tơdrong kơnê̆ mơn thoi 'ngam lăm 'bơ̆r sư, mă sư ôn hlơp lăm ala hơpiĕt sư,

¹³ Mă khan sư 'mêm kơ tơdrong pơm kơnê̆ thoi 'mŏm pơ'ngơ̆m lăm 'bơ̆r sư, ưh kơ wă 'maih lă hŭt lê̆,

¹⁴ Mưh sư luăn lăm klak, tơdrong pơm kơnê̆ noh gô 'bâu ôm, jing hơkăm thoi bih 'bih dong.

¹⁵ Mŭk măk sư tơtông luăn sa 'ngam gô hăk lê̆ tơ 'nguaih, Kră Yang 'Bok Kei-Dei bơih ăn kơ sư hăk lê̆ mŭk tơmam noh đơ̆ng hlŭng sư.

¹⁶ Noh thoi sư gô doch luăn bih 'bih dong. Hơpiĕt 'bih đei bih hơkăm gô pơlôch sư.

¹⁷ Sư ưh pă đei 'bôh đak rơmă ôliwơ, đak sut păng đak toh rơmo ro thoi đak glung.

¹⁸ Sư athei pơdrâu tơwih đĭ dôm mŭk lơi đơ̆ng tơdrong jang sư. Sư ưh kơ đei gơh yua iŏk mŭk tơmam mơdrŏng đơ̆ng sư mơdro sa.

¹⁹ Yua kơ sư sa pơgâm pă lăng bơngai dơnuh hoh, Tơgar iŏk hnam mă sư ưh kơ đei man.

²⁰ Yua kơ sư 'maih wă ưh kơ hrăp ôh, sư ưh kơ đei mong ôh dôm tơmam sư hơpơi wă.

²¹ Ưh pă đei tơmam kiơ mă oei đei đơ̆ng rŏng kơ sư iŏk đĭ, lei na tơdrong mơdrŏng chơt hiôk sư ưh kơjăp đunh.

²² Kơplah sư oei đei tôm tơmam rơkah rơkai tơdrong kơ'bah truh hloi Tơdrong pơmat-tat kơtang gô truh pơm kơ sư.

²³ Layơ sư phĭ 'bĕnh klak bơih, Kră Yang 'Bok Kei-Dei gô tuh tơdrong hil mĭl Sư thoi đak 'mi. Pơm tơmam sa sư

²⁴ Mă sư kơdâu hlôi kơ tơmam tơblah pơm păng mam, 'Brơ̆m păng kong gô 'bet klĕch akâu sư.

²⁵ Sư toh 'brơ̆m noh đơ̆ng kơdŭ rŏng, 'Brơ̆m suĕng 'bet klĕch tơ klơm kơmăt sư. Sư hli krưp tơpă.

²⁶ Măng mu hơ'bơ̆l gô gom klơ̆p lê̆ tơmam gĭt sư. Ŭnh ưh kơ đei kon bơngai dơhlu dơhlông sa lê̆ sư. Kiơ mă oei lăm bơsŭn sư ŭnh gô sa pơđĭ.

²⁷ Lu hơtăl plĕnh thoi bơngai kơdranh gô tơ'bôh tơbăt tơdrong kơnê̆ sư, teh gô iung pơm plơ̆ kơ sư lei-lăi mơ̆n.

²⁸ Hơbŭt đak lơ̆p koch hoch hnam sư đĭ. Đak kơtah lôm ba mŭk tơmam noh lăm năr Kră Yang 'Bok Kei-Dei hil.

²⁹ Noh bơih mă tơdrong Kră Yang 'Bok Kei-Dei 'măn kơ lu bơngai pơm kơnê̆. Mŭk tơmam mă Kră Yang 'Bok Kei-Dei pơsư̆ kơ sư.