Jop 18 - Sơ̆p Hlabơar Nơ̆r 'Bok Kei-Dei

Nơ̆r Bildat chrih kơ Jop

¹ Bildat, bơngai Sua, tơl khan:

² Dĭng dang yơ ih pơdơh kơ pơma? Ih tơchĕng lăng, na lu bơ̆n gô pơma dơnuh.

³ Liơ ih lăng nhôn thoi sem brem, jô̆ nhôn kơtul kơwao?

⁴ Ih hek akâu kơdih, lăm năr ih blĕk Đe hăm gô achăng tŭk lê̆ teh juơ ưh kơ đei bơngai oei, dah tơlơ̆ lê̆ tơmo đơ̆ng anih sư?

⁵ Tơpă kơđeng hơdah lu bơngai pơm kơnê̆ gô păt, pla ŭnh sư ưh pă khơ̆ng hơdah bơih.

⁶ Hơdah lăm bơsŭn sư gô măng mu, ŭnh kơđeng 'bơ̆t kơ̆l sư đe gô tơpăt.

⁷ Sư yak năm đơ̆ng pran jing tơrăn, sư gô tơpơ̆k sư kơdih lăm sư chă đon pơm kơnê̆.

⁸ Sư oei năm sư hrơ̆p tơ lăm hơnhuăl păng puh sơlŭng đe hơ'năk klơ̆p hla.

⁹ Hơđong 'leh kơnơl jơ̆ng sư păng kap 'leh gô rôp sư.

¹⁰ Đei hơđong tơlei 'bŭ lăm teh đăk kơ sư, păng kap prăn rok trong wă kơ 'leh sư.

¹¹ Tơdrong hli krưp đơ̆ng puăn pah pơm kơ sư tơrơ. Trŏ kơ sư druh kiơ̆ jê̆ kơnơl jơ̆ng sư.

¹² Tơdrong pran sư rơdu tơrăn yua kơ pơngot. Tơdrong răm truh răp 'bơ̆t cheng sư.a

¹³ Akar sư jô hŏnh yua kơ jĭ jăn, Kon kơdră yŏng tơdrong lôch pơrăm lê̆ jơ̆ng ti sư.

¹⁴ Đe puh sư đơ̆ng lăm bơsŭn, anih mă sư oei hơđơ̆ng. Anhăk ba sư truh tơ pơtao hli krưp.

¹⁵ Bơngai ưh kơ khŭl sư gô oei lăm bơsŭn sư, đe tuh tơmo ŭnh tơ kơpal anih sư oei.

¹⁶ Tơ ala rơh sư jô kro, tơ kơpal dơng sư jô hŏnh.

¹⁷ Tơdrong 'blŏk hơdơ̆r kơ sư gô hiong đơ̆ng teh đak, Ưh pă đei bu 'blŏk kơ anăn sư đơ̆ng kơpal teh đak.

¹⁸ Đơ̆ng anih hơdah đe klơ̆m lê̆ sư tơ lăm anih măng mu, păng puh tơweh sư đơ̆ng teh đak lu bơngai arih.

¹⁹ Sư ưh pă đei kon sâu tơ lăm pơlei pơla sư, kư̆m ưh pă đei bu oei arih lăm anih sư oei.

²⁰ Lu bơngai đơ̆ng char gah bơmơ̆t mah chrêu kơ đon tơdrong truh kơ sư lu bơngai đơ̆ng gah hơlĕch mah hli tơrơ.

²¹ Tơpă, 'noh jơ̆ anih lu bơngai pơm kơnê̆ oei 'Noh anih lu bơngai ưh kơ băt kơ Kră Yang 'Bok Kei-Dei.