Jop 17 - Sơ̆p Hlabơar Nơ̆r 'Bok Kei-Dei

Jop krao apinh Kră Yang 'Bok Kei-Dei

¹ Tơdrong arih inh wă tôch; khei năr inh wă jê̆ truh; Bơsat oei gô inh.

² Lu bơngai che bơle wang tăp kơ inh, inh ngăl 'bôh lu sư pơm kơ inh.

³ Ơ Kră Yang! Apinh Ih iŏk nơ̆r inh pơsĭt. Yua kơ ưh kơ đei bu nai gơh dŏng.

⁴ Ih ăn kơ đon tơchĕng lu sư ưh kơ hlôh, Na Ih ưh kơ ăn jei lu sư.

⁵ Bơngai ayơ kêng buăl sư wă lơi yua kơdih. Măt lu kon sư gô bơbôl.

⁶ Kră Yang 'Bok Kei-Dei pơm kơ kon pơlei pơla hiĕk ăr kơ inh. Lu sư kơ soh đak hai tơ muh măt inh.

⁷ Măt inh bơbôl yua kơ ơh sơ'ngon, đĭ-đăng jơ̆ng ti hơkĕ nhen thoi yơ̆p ngôi.

⁸ Lu bơngai tơpăt lăng inh hlĭch kơ đon, na bơngai ưh kơ yoch iung blĕk kơ bơngai kơnê̆.

⁹ Bơngai 'lơ̆ng tơpăt wei kơjăp trong sư kơdih, Bơngai đei tơpang ti rơgoh 'lơ̆ng rai pran kơtang.

¹⁰ Ơ, apinh lu iĕm, năm tơ âu pơma pơjah păng inh dơ̆ng Mă-lei inh ưh kơ 'bôh lăm lu iĕm đei bu hơgei.

¹¹ Năr lăm chăl arih inh wă jê̆ hloh bơih, Dôm tơdrong inh chă đon pơchah đĭ, dôm tơdrong inh hơpơi wă kư̆m hiong tôch.

¹² Buăl inh khan kơmăng gô jing kơ'năr; lu sư khan đơ̆ng rŏng kơmăng mu wă hơdah.

¹³ Dah inh chang gô arih lôch pơm hnam, Dah inh hơmet anih inh tep lăm măng mu;

¹⁴ Dah inh krao sơlŭng bơsat; “Ih bơih 'bă inh;” Khan kơ hrai: “Ih bơih mĕ hăm mŏ inh,”

¹⁵ Lei tơdrong chang hơmĕng inh oei tơ yơ? Bu gơh 'bôh tơdrong inh chang hơmĕng?

¹⁶ Tơdrong chang hơmĕng hăm kiơ̆ inh.a Lu nhôn gô pơdơh hiôk lăm 'mui teh ưh?