Jop 16 - Sơ̆p Hlabơar Nơ̆r 'Bok Kei-Dei

Jop pơma hăm buăl sư

¹ Jop tơl khan:

² Inh đei kơtơ̆ng lơ bơih tơdrong thoi noh: Đĭ-đăng iĕm tă kơ bơngai pơlung pơthim tơblĕk ngăl.

³ Dôm nơ̆r ưh kơ yua âu layơ đĭ? Dah iĕm đei tơdrong jĭ kiơ pơtrŭt iĕm pơma nơ̆r thoi 'noh?

⁴ Tơdah iĕm đei tơdrong gleh truh thoi inh. Inh kư̆m gơh pơma thoi iĕm mơ̆n; trŏ kơ inh kư̆m gơh pơma hil plơ̆ kơ iĕm păng tơtreh kơ̆l kơ iĕm.

⁵ Mă-lei inh gô pơma pơhiôk jơhngơ̆m iĕm, pơlung iĕm wă kơ jĭ jăn iĕm rai dă 'biơ̆.

⁶ Mă inh pơma, jĭ jăn inh ưh kơ đei dă 'biơ̆; Mă inh pơmơ̆ng, kư̆m ưh kơ đei weh ataih đơ̆ng inh.

⁷ Ih Kră Yang 'Bok Kei-Dei pơm kơ inh gleh lap. Ih pơrăm đĭ lăm hnam dơnŏ inh bơih

⁸ Ih pơm kơ akar inh jô hŏnh. Akâu inh hơkĕ hơkong thoi đe chrih plơ̆ kơ inh.

⁹ Lăm tơdrong blĕk Kră Yang 'Bok Kei-Dei hek hơđah inh; kăp hơnĕnh blĕk kơ inh thoi sem bri, Thoi bơngai ayăt kơ inh sư lăng pơglăn 'bloh tơ inh.

¹⁰ Lu bơngai ha 'bơ̆r che bơle kơ inh, tap tơ'bŏk pơma pơjăm pơjuă inh. Lu sư pôm đon blah inh.

¹¹ Kră Yang 'Bok Kei-Dei jao inh kơ lu bơngai pơrăm, klơ̆m inh lăm ti bơngai pơm kơnê̆.

¹² Kơplah Inh oei hiôk-hian, Sư teh pơchah inh, Sư rôp hơko inh klơ̆m inh pơchah hĕch hoch dan lê̆ inh pơm tơ̆r wă prah pơđam.

¹³ Lu đe prah hră Sư wang tăp tang kơ inh, Sư 'bet klĕch boh-lăn inh, ưh pă mơnat, Sư tuh lê̆ đak kơmăt inh tơ teh.

¹⁴ Sư teh inh rơka lơ 'bôt, Bruh teh inh thoi linh tơblah.

¹⁵ Inh sĭt 'bi hrŭk pôn akâu inh, inh drap 'bŭ muh măt inh lăm teh rơpŭk.

¹⁶ Muh măt inh pơ'ngeh đum rak yua kơ inh nhơ̆m, Yơ̆p tơdrong lôch tăp kơ gơnur măt inh.

¹⁷ Mă khan inh ưh kơ đei pơm tơdrong kơnê̆ krưp ră, păng nơ̆r inh krao khan 'lơ̆ng rơgoh.

¹⁸ Ơ bơngai oei lăm teh, 'nĕ kơ 'bŭ klơ̆p lê̆ pham inh hăm teh. Rŏ kơ inh krao ôr rơngei ưh kơ đei pơgăn.

¹⁹ Na jơ 'nâu 'bok mă pơm kơdranh kơ inh oei tơ kơpal plĕnh ti, Đei 'Bok mă dŏng oei tơ anih kơpal ti.

²⁰ Lu buăl juăt inh che bơle kơ inh. Đak măt inh hyôi hyai krao apinh Kră Yang 'Bok Kei-Dei.

²¹ 'Bok mă pơm kơdranh oei tơ plĕnh gô dŏng tơgŭm inh 'bơ̆t anăp Kră Yang 'Bok Kei-Dei Thoi kon bơngai dŏng buăl sư.

²² Oei pă tŏ sĕt sơnăm đĕch bơih inh lôch, na inh gô năm mă ưh pă đei wih dơ̆ng.