Jop 15 - Sơ̆p Hlabơar Nơ̆r 'Bok Kei-Dei

Êliphas chrih kơ Jop

¹ Êliphas, bơngai Thêman, tơl:

² Hăm trŏ kơ ih bơngai hơgei mă-lei tơl hăm nơ̆r hlôh wao mă ưh kơ yua kiơ. Păng klak 'bĕnh kơ kial hơbŭt đơ̆ng gah hơlĕch?

³ Sư hăm gơh iŏk nơ̆r ưh kơ yua mă chă pơlăp Iŏk nơ̆r ưh kơ yua wă dŏng sư kơdih hă?

⁴ Tơpă ih pơm kơ bơngai tơhiong lê̆ tơdrong hli yom kơ Kră Yang 'Bok Kei-Dei, Lăng ưh kơ hiơ̆k tơdrong tơchĕng pơwao 'bơ̆t anăp Sư.

⁵ Tơdrong yoch ih bơtho ăn kơ 'bơ̆r ih pơma, pơm kơ ih rơih iŏk hơpiĕt lu bơngai hơlĕnh bơkuĕch.

⁶ 'Bơ̆r ih kơdih jâu ih yoch, ưh kơ sĭ kơ inh ôh; Hơkŭng ih pơm kơdranh tơ'bôh plơ̆ kơ ih.

⁷ Hăm trŏ kơ tơpŭ đei ih adrol hloh? Hăm trŏ kơ pơjing ih adrol kơ kông kŏ.

⁸ Ih hăm mơ̆ng lăm tơdrong Kră Yang 'Bok Kei-Dei pơđâu? Hăm trŏ kơ minh 'nu ih đĕch gơh hơgei?

⁹ Đei tơdrong kiơ ih băt khan nhôn ưh kơ băt? Đei tơdrong kiơ ih hlôh khan nhôn ưh kơ hlôh?

¹⁰ Lăm lu nhôn âu đei bơngai sŏk ko, bơngai kră krŭng sơnăm đĭ lơ hloh kơ 'bă ih.

¹¹ Tơdrong Kră Yang 'Bok Kei-Dei pơlung ih, Nơ̆r Sư pơma bơtho rơngơp hiôk ih mơ̆ng tam mă tôm hă?

¹² Liơ đon ih tơchĕng thoi noh? Liơ măt ih bơbul lăng ưh kơ 'bôh?a

¹³ Liơ ih mah pơ̆n hil plơ̆ Kră Yang 'Bok Kei-Dei, păng 'bơ̆r ih mah lĕch nơ̆r thoi noh pơma blah sư?

¹⁴ Kon bơngai kiơ, mă gơh 'lơ̆ng rơgoh? Kon bơngai đơ̆ng drŏ-kăn rơneh liơ gơh 'lơ̆ng tơpăt?

¹⁵ Kră Yang 'Bok Kei-Dei kư̆m ưh kơ ngeh, mă lu linh jang 'lơ̆ng rơgoh Sư. Lu linh jang Sư lăng kư̆m oei jô̆ glăi.

¹⁶ Pơma kiơ kơ kon bơngai kơnê̆ yoch păng răm-'băm, Bơngai juăt kơ pơm yoch kơnê̆ thoi lu sư nhă đak 'blăng.

¹⁷ Inh wă bơtho tơ'bôh kơ ih, apinh ih mơ̆ng inh; Inh gô roi kơ ih dôm tơdrong inh 'bôh bơih,

¹⁸ Tơdrong lu bơngai hơgei tơ'bôh ăn kơ inh, ưh kơ ôn ôh dôm tơdrong kiơ mă sư pơhrăm đơ̆ng 'bok lu sư

¹⁹ Dêh char âu đei ăn đĕch kơ lu sư bơih, ưh kơ đei bơngai tơmoi ayơ gơh mơ̆t oei lăm khŭl sư.

²⁰ Bơngai pơm tơdrong kơnê̆ tơ'bơ̆p jĭ jăn pơmat-tat, dĭng đĭ chăl arih sư. Lăm đĭ sơnăm wă 'măn kơ lu bơngai mă pơm kơnê̆ oei arih đei pơmat-tat.

²¹ Sư kơtơ̆ng nơ̆r ôr hli ling-lang lăm đon; kơplah oei hiôk-hian, lu bơngai chă pơlôch pơrăm truh.

²² Ưh pă đei hơmĕng gơh klaih hlôi đơ̆ng tơdrong lôch, bơngai chĕp đao gưm răp pơlôch sư.

²³ Sư hoang tơ âu tơ to wă chă tơmam sa, khan tơmam sa tơ yơ. Sư băt kơ năr tơdrong răm wă jê̆

²⁴ Sư hli tơrơ tơdrong pơmat-tat ơh sơ'ngon wă truh, Tŭn drŭt sư thoi pơtao pran kơtang wă tơblah.

²⁵ Noh yua kơ sư yơ̆r ti blah plơ̆ Kră Yang 'Bok Kei-Dei, Pơm thoi nuih pran wă tơblah Kră Yang mă Mơsêh Mơyang tih.

²⁶ Năm kơdâu bruh tơ̆m tơ Kră Yang hăm khêl hơ'bơ̆l, arăng.

²⁷ Mă khan muh măt sư bek, Klak kơiĕng sư tih.

²⁸ Sư gô oei tơ lăm pơlei mă đe pơrăm bơih, tơ lăm hnam juơ, hnam rơ̆m rĕk ưh kơ đei bơngai oei.

²⁹ Sư ưh kơ gơh oei mơdrŏng; mŭk tơmam sư kư̆m gô ưh kơ jơnap đunh, păng mŭk drăm phe 'ba sư kư̆m ưh kơ lanh rai să lăm teh đak.

³⁰ Sư ưh pă gơh klaih hlôi đơ̆ng măng mu; pla ŭnh gô sa pơkro tơmơ̆ng sư. Hơyuh dui jơhngơ̆m đơ̆ng 'bơ̆r Kră Yang 'Bok Kei-Dei gô pơđông lê̆ sư tơ nai.

³¹ 'Nĕ kơ gơnang kơ tơdrong ưh kơ yua chă hơlĕnh kơdih akâu yua kơ tơmam ưh kơ yua noh wă apah sư.

³² Sư gô apah đei tôm adrol kơ khei năr lôch wă truh. Sư thoi dơng ưh kơ hơdrih ôh.

³³ Sư thoi tơnơm 'long hơmu hơlŭng plei gơsĕ. Thoi 'long ôliwơ pơkao hơlŭng.

³⁴ Lu bơngai ưh kơ lui yom kơ Kră Yang gô hơwŏng. Ŭnh gô sa pơrăm bơsŭn lu bơngai sa pơgâm đe.

³⁵ Lu sư anăp kơ tơdrong răm, tơpŭ hloi tơdrong kơnê̆. Lăm tơpu kon anăp bơih đei dôm tơdrong hơlĕnh pơdăr.