Jôna 4 - Sơ̆p Hlabơar Nơ̆r 'Bok Kei-Dei

Tơdrong Jôna ưh kơ lăp đon, nơ̆r Kră Yang chrih

¹ Kơplah noh Jôna sư ưh kơ lăp đon păng sư hil dêh.

² Sư krao khan kơ Kră Yang thoi âu: Ơ Kră Yang, noh hăm trŏ inh đei băt boih kơplah inh oei lăm dêh char nhôn sơ̆? Yua kơ noh na inh hăt hot kơdâu klĕnh tơ pơlei Tarisi. Yua kơ inh băt boih Ih jơ̆ Kră Yang 'Bok Kei-Dei iơ̆m dim, băt mơnat, hiơ̆ kơ hil, 'bĕnh hăm tơdrong 'mêm mơnat, ưh kơ wă pơrăm.

³ Ơ Kră Yang, dang ei, inh krao apinh Ih iŏk lê̆ tơdrong arih inh bĕ! Yua kơ gah inh, lôch 'lơ̆ng hloh kơ arih.

⁴ Kră Yang tơl sư thoi âu: Ih blĕk hăm trŏ ưh?

⁵ Đơ̆ng noh Jôna lĕch đơ̆ng pơlei Niniwe, na năm pơm bơsŭn tơ gah hơlĕch pơlei noh na sư oei ngôi ala yơ̆p bơsŭn noh răp lăng tơdrong kiơ truh kơ pơlei noh.

⁶ Đơ̆ng noh, Kră Yang ăn đei tơnơm hla hro kơpal bơsŭn Jôna, wă pơm yơ̆p kơ sư, wă kơ sư hiôk huay kơ tŏ, Jôna sư hiôk dêh yua kơ đei tơnơm noh hro.

⁷ Mă-lei năr đơ̆ng rŏng, lăp 'nao 'brưch gah hơlĕch, Kră Yang 'Bok Kei-Dei ăn kơnu kuer sa, na tơnơm hla hro noh jô lôch.

⁸ Kơplah lăp 'năr lĕch, Kră Yang 'Bok Kei-Dei ăn kial tơthu dơ̆ng gah hơlĕch păng 'năr tŏ chră tơ kơ̆l sư, na sư mah wing măt, na sư khan thoi âu: Gah inh, lôch 'lơ̆ng hloh kơ arih!

⁹ Kră Yang 'Bok Kei-Dei khan kơ Jôna thoi âu: Ih hăm trŏ kơ hil blĕk yua kơ tơnơm hla hro 'nâu? Sư tơl: Inh blĕk 'nâu trŏ, inh blĕk trŏ kơ lôch.

¹⁰ Kră Yang khan dơ̆ng kơ sư: Ih lăng 'mêm kơ tơlei hla hro noh mă ih ưh kơ lap gleh kiơ minh tơdrong kơ tơlei noh; ih ưh kơ đei pơtăm, ih kư̆m ưh kơ bơwei sư, kơmăng 'bôh 'băi sư chăt lăm minh măng 'bôh sư lôch.

¹¹ Na Inh ưh kơ 'mêm kơ pơlei Niniwe ôh hă, lăm noh đei hloh kơ minh-hrĕng 'bar-jĭt rơbâu kơ̆l kon bơngai ưh kơ băt ti gah 'ma liơ dah ti gah 'ngiĕo liơ păng kư̆m đei lơ sem dơrong hai?