Jôna 3 - Sơ̆p Hlabơar Nơ̆r 'Bok Kei-Dei

Jôna bơtho tơ pơlei Niniwe

¹ Đei dơ̆ng nơ̆r mă 'bar Kră Yang khan kơ Jôna thoi âu:

² Iung bĕ! Năm tơ pơlei tih Niniwe păng bơtho kơ lu sư nơ̆r mă Inh tơtă kơ ih.

³ Na Jôna iung năm truh tơ pơlei Niniwe, kiơ̆ thoi nơ̆r Kră Yang đei tơtă. Kơplah noh pơlei Niniwe jơ̆ minh pôm pơlei tih, yak pêng năr kơ trong 'mơ̆i na hlôi.

⁴ Năr mă mônh Jôna pơtơm mơ̆t lăm pơlei, na bơtho khan: Oei pă puăn-jĭt năr dơ̆ng, Niniwe gô pơchah!

⁵ Kon pơlei Niniwe lui kơ Kră Yang 'Bok Kei-Dei. Lu sư roi tơbăt athei hrŭk ao 'bi na ơ̆t kơ sŏng sa, iŏk đơ̆ng bơngai pơm tih yŏng mơng truh tơ lu kon pơlei hmă.

⁶ Tơdrong noh kơtơ̆ng truh tơ pơtao oei lăm pơlei tih Niniwe, sư iung weh đơ̆ng anih pơtao sư, plôh lê̆ ao pơtao sư, na hrŭk ao 'bi hơ-oei lăm 'mui tơnuh.

⁷ Đơ̆ng rŏng kơ noh pơtao roi tơbăt ăn kơ jơ̆p-jang pơlei Niniwe. 'Nâu nơ̆r pơtă đơ̆ng pơtao păng lu bơngai yŏng pơgơ̆r: Mă kon bơngai dah lu sem dơrong, rơmo dah triu, kư̆m ơ̆t ưh kơ sa kiơ. Ưh kơ ăn kơ lu sư sa, kư̆m ưh kơ nhă đak;

⁸ mă-lei kon bơngai păng kon sem dơrong athei su 'bi. Rim 'nu athei adrin đĭ jơhngơ̆m krao apinh Kră Yang 'Bok Kei-Dei. Trŏ tơpă, rim 'nu athei achăng lê̆ trong kơnê̆, dah tơdrong kiơ mă pơm kơnê̆.

⁹ Bu băt, Kră Yang 'Bok Kei-Dei gô tơplih đon tơchĕng sư, huay pă hil na bơ̆n gơh klaih đơ̆ng lôch?

¹⁰ Kơplah noh Kră Yang 'Bok Kei-Dei 'bôh tơdrong lu sư hŭt achăng lê̆ đĭ trong kơnê̆, Kră Yang 'Bok Kei-Dei 'mêm mơnat ưh kơ pơrăm lu sư kiơ̆ thoi sư đei pơkă wă pơrăm.