Jôna 2 - Sơ̆p Hlabơar Nơ̆r 'Bok Kei-Dei

Jôna krao khan păng đei dŏng pơklaih

¹ Đơ̆ng lăm klak ka Jôna krao khan kơ Kră Yang 'Bok Kei-Dei.

² Sư khan: Năr inh tơ'bơ̆p tơdrong pơmat-tat inh krao khan kơ Kră Yang. Na sư đei tơl nơ̆r inh boih. Đơ̆ng lăm dêh atâu inh krao ôr, Sư kơtơ̆ng nơ̆r inh boih.

³ Ih klơ̆m inh tơ tôch kơđĕl lăm đak dơsĭ jrŭ, đak poh-yă klơ̆p lôm ba inh. Đĭ-đăng dôm lu đak poh-yă đơ̆ng Ih klơ̆p kơpal inh.

⁴ Inh đei khan thoi âu: Đe klơ̆m lê̆ inh đơ̆ng anăp Ih, mă-lei inh oei gơh 'bôh dơ̆ng hnam akŭm 'lơ̆ng rơgoh Ih.

⁵ Đak lơ̆p pơđĭ akâu păng Bơhngol inh. Hơlŭng dơsĭ jrŭ klơ̆p inh tăp dăr. Yă-yeng đak dơsĭ wăr tăp dăr kơ kơ̆l inh.

⁶ Inh jur truh tơ tôch jơ̆ng kông lăm đak dơsĭ, teh sư chơkăl găn lê̆ inh ling-lang. Ơ Kră Yang inh, mă-lei Ih hơtŏk boih tơdrong arih inh klaih đơ̆ng sơlŭng jrŭ.

⁷ Kơplah inh wă lôch, na inh 'blŏk kơ Kră Yang, Păng nơ̆r inh krao khan truh boih tơ Ih; tơ anih rơgoh Ih,

⁸ Lu bơngai chă kơkuh kơ rup yang ưh kơ yua kiơ. Na achăng lê̆ tơdrong Kră Yang 'mêm kơ sư.

⁹ Mă-lei inh iŏk nơ̆r hơri bơnê păng iŏk tơmam soi pơyơ̆r kơ Ih; Inh gô pơkeh dôm nơ̆r inh mă đei pơkă boih. Tơdrong dŏng pơklaih đơ̆ng Kră Yang!

¹⁰ Kră Yang athei ka, na ka năm hăk lê̆ Jôna tơ jih đak dơsĭ.