Jôel 1 - Sơ̆p Hlabơar Nơ̆r 'Bok Kei-Dei

Tơdrong lep păr truh

¹ 'Nâu nơ̆r Kră Yang khan kơ Jôel, kon drŏ-nglo Pêthuel:

² Ơ lu bơngai kră mơ̆ng bĕ nơ̆r âu! Đĭ-đăng lu iĕm jing kon pơlei pơla lăm teh đak âu, mơ̆ng bĕ! Hăm tam đei tơdrong truh thoi noh lăm chăl lu iĕm, dah lăm chăl 'bok lu iĕm ưh?

³ Ră roi bĕ tơdrong âu kơ lu kon sâu iĕm, na kon sâu iĕm gô roi kơ kon sâu lu sư, na kon sâu lu sư kư̆m roi kơ adrĕch adrung kon sâu lu sư đơ̆ng rŏng.

⁴ Lu kiơ lep tih sa mă oei lê̆, lep 'ba sa; kiơ mă lep 'ba sa oei đei, lep iĕ sa, kiơ mă lep iĕ sa oei đei, lep tung-nut sa pơđĭ.

⁵ Ơ lu bơngai juăt kơ suai, iung bĕ păng nhơ̆m hmoi! Ơ đĭ-đăng lu bơngai juăt kơ et sik athei sơ'ngon bĕ, yua kơ sik hơmu 'ngam đe pleh đơ̆ng 'bơ̆r iĕm boih!

⁶ Đei adrĕch pran păng lơ; năm blah boih hăm teh đak Inh; hơnĕnh lu sư nhen hơnĕnh dăm-brang, păng tơ'ngam lu sư nhen tơ'ngam dăm-brang akăn. Lu sư kăp pơrăm bơih tơm hơmu Inh, păng kăp lŏng tơpăk bơih 'long hơra Inh.

⁷ Lu sư kăp pơrăm bơih tơm 'long hơmu Inh, sư kăp tơpăk bơih tơm 'long hơra Inh. Sư lŏng lê̆ kơđoh sư, na pơrăm lê̆ dơng, truh dơng sư jing kok.

⁸ Lu iĕm athei nhơ̆m hmoi bĕ thoi minh 'nu adruh 'lơ̆ng hrŭk ao 'bi oei nhơ̆m kơ klo sư mă iŏk đơ̆ng 'lơ̆p lôch boih!

⁹ Tơmam soi pơyơ̆r huch, tơmam soi phe 'ba ưh pă đei boih lăm hnam Kră Yang; lu 'bok soi bơ̆jang soi kơ Kră Yang oei ơh sơ'ngon.

¹⁰ Chŭn mir đĭ lê̆ bri, teh choh kư̆m pă lăng, yua kơ 'ba đĭ răm, sik 'nao đĭ bơih, đak rơmă đĭ pă đei.

¹¹ Ơ lu bơngai choh mir, hơwơ̆l hơwang; ơ lu bơngai pơm mir hơmu, nhơ̆m hmoi bĕ, yua kơ 'ba păng 'ba tơ'bâu, đĭ hiong, ưh pă đei kĕch pă đei yuă.

¹² Tơm hơmu đĭ jô, tơm hơra đĭ kro, tơm 'long gărnăt, 'long gol, dôm tơnơm 'long tơ mir đĭ jô kro boih; tơdrong chơt hiôk kon bơngai đĭ hiong boih.

Athei tơbral

¹³ Ơ lu 'bok soi, hrŭk bĕ ao 'bi na nhơ̆m hmoi. Ơ lu bơngai mă bơ̆jang 'bơ̆t chơnang soi, nhơ̆m hmoi bĕ. Ơ lu bơngai mă jang kơ Kră Yang 'Bok Kei-Dei, hrŭk hơbĕn ao 'bi hiah na tep om prăt măng, yua kơ tơmam soi phe 'ba, păng tơmam soi huch pă đei bơih lăm hnam Kră Yang 'Bok Kei-Dei lu iĕm!

¹⁴ Hơmet bĕ kơ tơdrong ơ̆t kơ por, krao akŭm tơpôl lơ. Akŭm bĕ lu kră păng đĭ-đăng lu kon pơlei pơla lăm teh đak năm tơ hnam Kră Yang 'Bok Kei-Dei lu iĕm, păng krao apinh bĕ Kră Yang!

¹⁵ Răm-'băm tơpă yua kơ năr noh! Năr Kră Yang wă phak wă jê̆ boih! Năr noh truh hăm tơdrong pơrăm đơ̆ng Kră Yang Mơsêh Mơyang.

¹⁶ Tơmam sa pơtôch boih đơ̆ng anăp lu bơ̆n, păng tơdrong chơt hiôk 'nă hal 'Bok Kei-Dei lu bơ̆n tôch boih đơ̆ng hnam Sư, hăm trŏ?

¹⁷ Găr adrĕch đĭ jô bơih tơ lăm kơnglat teh; pơk mong adrĕch đĭ djuơh, yua kơ 'ba đĭ ưh pă đei bơih.

¹⁸ To, lu kon sem dơrong đĭ ôr hơrum dêh! To khŭl rơmo đĭ hơwơ̆l hơwang, yua kơ sư pă đei 'nhĕt sa boih! Lu khŭl triu kư̆m pơmat-tat.

¹⁹ Ơ Kră Yang, Ih bơih mă inh krao apinh, yua kơ ŭnh sa đĭ boih lu 'nhĕt lăm tơmăn glă, pla ŭnh sa đĭ boih lu 'long tơ lăm bri!

²⁰ Tơpă, lu sem bri oei lăm tơmăn kư̆m krao ôr tơ Ih yua kơ đĭ-đăng thong đak đĭ hrơ̆, păng ŭnh sa lê̆ đĭ bơih lu 'nhĕt lăm tơmăn glă.