Jo 31 - Sơ̆p Hlabơar Nơ̆r 'Bok Kei-Dei

Pơrăm Adrĕch Madian

¹ Kră Yang khan dơ̆ng kơ Môis thoi âu:

² Năm blah bĕ adrĕch Madian pơm 'mong ăn kơ adrĕch bơngai Isơrael; đơ̆ng noh na ih gô wih brŏk hơdai 'bok yă.

³ Thoi noh, Môis khan tơbăt ăn kơ kon pơlei thoi âu: Lăm lu iĕm athei hơmet hơlă đao kơtuang năm blah adrĕch Madian wă pơm 'mong ăn kơ Kră Yang.

⁴ Rim adrĕch Isơrael athei wơh minh-rơbâu 'nu linh năm tơblah.

⁵ Thoi noh, lăm adrĕch Isơrael đei rơih iŏk kư̆ minh adrĕch minh-rơbâu 'nu linh, đei mơjĭt-'bar rơbâu 'nu bơngai hơmet 'brơ̆m, đao, kơtuang năm tơblah.

⁶ Môis wơh mơjĭt-'bar rơbâu 'nu noh năm tơblah, wă khan wơh minh-rơbâu 'nu đơ̆ng lăm rim adrĕch, hơdai hăm Phinêhas, kon drŏ-nglo Êlêasar, 'bok soi, sư chĕp ba tơmam tơblah păng keng wă hlôm krao đơ̆ng lăm anih rơgoh.

⁷ Thoi noh, lu sư tơblah băl hăm bơngai Madian, thoi Kră Yang đei khan kơ Môis păng pơlôch đĭ lu kon drŏ-nglo.

⁸ Lu sư kư̆m pơlôch pơđăm 'nu pơtao Madian hơdai hăm lu bơngai mă lu sư đei pơlôch boih, anăn pơđăm 'nu pơtao noh, Êwi, Rêkem, Sur, Hur păng Reba, kư̆m iŏk đao pơlôch Balaam, kon drŏ-nglo Bêôr.

⁹ Lu bơngai Isơrael rôp ba lu bơngai drŏ-kăn păng lu kon hơ'lơ̆p Madian, rôp iŏk đĭ lu sem dơrong, triu păng đĭ-đăng tơmam mŭk măk lu sư.

¹⁰ Soh đĭ lu pơlei tih lu hnam oei, lu bơngai Madian,

¹¹ kư̆m chĕp iŏk pơđĭ dôm lu mŭk tơmam mă đơ̆ng lu sư blah iŏk, mă tơmam dah bơngai.

¹² Lu sư chông păng chĕp ba pơđĭ bơngai dah lu mŭk tơmam mă đơ̆ng lu sư blah iŏk ăn kơ Môis păng Êlêasar, 'bok soi păng ăn kơ lu adrĕch bơngai Isơrael oei tơ kơđông tơ lăm tơmăn glă char Môap, jê̆ đak Krong Jôrđăn, tơklă pơlei Jêrikô.

¹³ Môis, Êlêasar 'bok soi păng đĭ-đăng lu yŏng pơgơ̆r năm tơ'bơ̆p lu linh tơ đaih kơ kơđông linh.

¹⁴ Môis sư hil kơ lu yŏng, wă khan lu yŏng pơgơ̆r linh lăm minh-rơbâu păng yŏng pơgơ̆r lăm minh-hrĕng 'nu linh mă 'nao brŏk đơ̆ng tơblah 'nâu.

¹⁵ Môis khan kơ lu sư thoi âu: Lu iĕm oei rong lu bơngai drŏ-kăn oei arih hă?

¹⁶ To, lu sư noh boih mă kiơ̆ đon hơlĕnh Balaam pơhlŭ kon pơlei Isơrael pơm yang kơkuh kơ Pêôr păng yoch tih 'bơ̆t anăp Kră Yang; đơ̆ng tơdrong yoch noh boih pơm ăn kơ kon pơlei Isơrael đei tơdrong gleh truh,

¹⁷ Thoi noh dang ei, pơlôch bĕ đĭ lu kon drŏ-nglo hơ'lơ̆p păng pơlôch đĭ hloi lu bơngai drŏ-kăn mă đei 'bĭch hăm drŏ-nglo boih;

¹⁸ mă-lei 'nĕ pơlôch lu bơngai drŏ-kăn mă tam mă đei 'bĭch hơdai hăm drŏ-nglo.

¹⁹ Bĕ gah lu iĕm athei, 'bĭch tơ 'nguaih kơ kơđông lăm tơpơh năr. Bu mă đei pơlôch minh 'nu bơngai dah pel hơtŭt 'bơm akâu bơngai lôch, dah bơngai mă bơ̆n đei rôp, athei ming hơmet akâu mă rơgoh lăm năr mă pêng păng năr mă tơpơh.

²⁰ Kŭm athei pih hơbĕn ao mă rơgoh, athei ôp đĭ dôm tơmam đe pơm păng akar păng sŏk bơbe păng dôm lu tơmam đe pơm păng 'long.

²¹ Êlêasar, 'bok soi, khan kơ lu linh 'nao brŏk đơ̆ng tơblah thoi âu: 'Nâu tơdrong juăt bơtho đơ̆ng Kră Yang đei khan kơ Môis:

²² Hu, maih, kong, bơsei, kem bơlơ̆k,

²³ wă khan dôm lu tơmam mă gơh 'buh lăm ŭnh, lu iĕm athei 'buh lăm ŭnh wă kơ goh, mă-lei đe kư̆m yua đak wă ôp sư rơgoh, gah tơmam kiơ mă ưh kơ gơh kơ 'buh lăm ŭnh, athei tong sư lăm đak ôp 'mê̆-'mach.

²⁴ Năr mă tơpơh lu iĕm athei pih hơbĕn ao iĕm, lei na sư goh; đơ̆ng noh na iĕm gơh mơ̆t lăm kơđông.

Asong băt tơmam đêl blah iŏk

²⁵ Kră Yang khan dơ̆ng kơ Môis thoi âu:

²⁶ Ăn kơ ih, hăm Êlêasar 'bok soi păng đĭ-đăng yŏng kơdră rim kơ adrĕch, athei chih jô̆ dôm tơmam mă iĕm đei blah iŏk đơ̆ng lu ayăt, mă bơngai dah sem dơrong,

²⁷ na asong tơmam noh ăn kơ lu iĕm bơngai mă năm tơblah păng asong ăn kơ đĭ-đăng khŭl tơpôl akŭm.

²⁸ Gah tơmam kơ lu linh năm tơblah, mă bơngai, dah rơmo, aseh iĕ dah triu, ih athei iŏk minh lăm pơđăm-hrĕng na akŭm pơyơ̆r ăn kơ Kră Yang;

²⁹ wă khan na iŏk minh puăt đơ̆ng lăm tơmam lê̆ kơ linh tơblah noh păng ăn kơ Êlêasar, 'bok soi, pơm tơmam pơyơ̆r ăn kơ Kră Yang.

³⁰ Mă oei minh puăt noh ăn kơ adrĕch Isơrael, mă bơngai, rơmo, aseh iĕ, dah triu, wă khan lu kon sem dơrong, ih kư̆ iŏk mưh đei pơđăm-jĭt ih iŏk minh 'măn lê̆ pha păng jao ăn kơ adrĕch Lêwi bơngai jang lăng Bơsŭn Anih Akŭm Kră Yang.

³¹ Môis păng Êlêasar, 'bok soi, pơm kiơ̆ thoi nơ̆r Kră Yang đei khan kơ Môis.

³² Na, tơmam mă đơ̆ng lu linh blah iŏk đơ̆ng lu ayăt noh, tơdrâu-hrĕng tơpơh-jĭt pơđăm-rơbâu tŏ triu;

³³ tơpơh-jĭt 'bar-rơbâu rơmo,

³⁴ tơdrâu-jĭt mônh rơbâu aseh iĕ.

³⁵ Bơngai drŏ-kăn adruh tam băt kơ drŏ-nglo, đĭ-đăng đei pêng-jĭt 'bar-rơbâu 'nu.

³⁶ Minh puăt đơ̆ng gah lu bơngai năm tơblah, đei pêng-hrĕng pêng-jĭt tơpơh-rơbâu pơđăm-hrĕng tŏ triu,

³⁷ na pơyơ̆r ăn kơ Kră Yang tơdrâu-hrĕng tơpơh-jĭt pơđăm tŏ;

³⁸ pêng-jĭt tơdrâu-rơbâu tŏ rơmo, na pơyơ̆r ăn kơ Kră Yang đei tơpơh-jĭt 'bar tŏ;

³⁹ pêng-rơbâu pơđăm-hrĕng tŏ aseh iĕ păng na pơyơ̆r ăn kơ Kră Yang tơdrâu-jĭt mônh tŏ;

⁴⁰ mơjĭt-tơdrâu rơbâu 'nu bơngai păng na pơyơ̆r ăn kơ Kră Yang pêng-jĭt 'bar 'nu,

⁴¹ Môis pơjao ăn kơ Êlêasar, 'bok soi, tơmam na jing tơmam pơyơ̆r ăn kơ Kră Yang, trŏ thoi nơ̆r Kră Yang đei khan kơ Môis.

⁴² Minh puăt tơmam noh ăn kơ adrĕch Isơrael mă Môis đei klah lê̆ boih minh puăt kơ lu linh năm tơblah,

⁴³ minh puăt 'nâu asong kơ khŭl akŭm, pêng-hrĕng pêng-jĭt tơpơh-rơbâu pơđăm-hrĕng tŏ triu,

⁴⁴ pêng-jĭt tơdrâu-rơbâu tŏ rơmo,

⁴⁵ pêng-jĭt rơbâu pơđăm-hrĕng tŏ aseh iĕ,

⁴⁶ păng mơjĭt-tơdrâu 'nu bơngai.

⁴⁷ Lăm minh puăt noh asong kơ adrĕch Isơrael, Môis klah lê̆ kư̆ lăm pơđăm-jĭt tŏ minh pôm, mă bơngai dah sem tơmam păng pơjao ăn kơ bơngai Lêwi wă bơ̆jang wei-lăng Bơsŭn Anih Akŭm Kră Yang, kiơ̆ trŏ thoi Kră Yang đei pơkă khan kơ sư.

⁴⁸ Lu yŏng linh, wă khan yŏng pơgơ̆r minh-rơbâu 'nu linh păng yŏng pơgơ̆r minh-hrĕng 'nu linh, năm jê̆ Môis,

⁴⁹ na khan: Lu nhôn đĭch đam ih đei chih jô̆ boih linh, lu bơngai ala kơ lu nhôn pơgơ̆r, jô̆ tôm đĭ ưh kơ đei bu hiong.

⁵⁰ Rim 'nu lu nhôn chĕp ba maih mă đơ̆ng lu nhôn blah iŏk, rơbưn, kong, tơkhiĕn, le đon, kon kiơng, wă pơm tơmam pơyơ̆r ăn kơ Kră Yang wă huai đơ̆ng yoch 'bơ̆t anăp Sư.

⁵¹ Môis păng Êlêasar 'bok soi iŏk maih păng đĭ-đăng dôm tơmam pơhrôp mă đei hling tuh boih.

⁵² Đĭ-đăng lu maih păng tơmam pơyơ̆r mă đơ̆ng lu yŏng pơgơ̆r minh-rơbâu linh, yŏng pơgơ̆r minh-hrĕng linh na pơyơ̆r ăn kơ Kră Yang, jô̆ đĭ mơjĭt-tơdrâu rơbâu tơpơh-hrĕng pơđăm-jĭt seikơl.

⁵³ Rim 'nu linh năm tơblah kư̆m iŏk tơmam kơ sư kơdih mơ̆n.

⁵⁴ Thoi noh, Môis păng Êlêasar 'bok soi iŏk maih đơ̆ng yŏng pơgơ̆r minh-rơbâu linh păng đơ̆ng yŏng pơgơ̆r minh-hrĕng linh, na chĕp ba tơ Bơsŭn Anih Akŭm pơm tơmam wă kơ 'blŏk kơ lu adrĕch Isơrael 'bơ̆t anăp Kră Yang.