Jo 27 - Sơ̆p Hlabơar Nơ̆r 'Bok Kei-Dei

Lu kon drŏ-kăn Sêlôpêhat

¹ Lu kon drŏ-kăn Sêlôpêhat, kon drŏ-nglo Hêpher, sâu Gileat, sâu i Makir, sâu ach Manase, lăm adrĕch adrung kon drŏ-nglo Jôsep. 'Nâu anăn lu kon drŏ-kăn sư: Mahla, Nôa, Hogla, Milka păng Tirsa.

² Lu sư năm dơ̆ng 'bơ̆t anăp Môis păng Êlêasar 'bok soi, 'bơ̆t anăp lu kră pơgơ̆r păng 'bơ̆t 'măng Bơsŭn Anih Akŭm păng khăn, na khan:

³ 'Bă lu nhôn lôch boih tơ lăm char glă; sư ưh kơ kiơ̆ ôh lu tơpôl akŭm wă blah Kră Yang, wă khan lu khŭl Kôrê, mă-lei sư lôch yua kơ tơdrong yoch sư kơdih; păng sư ưh kơ đei kon drŏ-nglo ôh.

⁴ Yua kơ kiơ anăn 'bă lu nhôn sŭt lê̆ ưh kơ đei chih tơmơ̆t lăm lu adrĕch adrung sư yua kơ sư ưh kơ đei kon drŏ-nglo ôh? Asong bĕ lu nhôn teh jang sa hơya minh lăm lu 'nhŏng oh 'bă lu nhôn.

⁵ Môis ba tơdrong lu sư apinh noh 'bơ̆t anăp Kră Yang.

⁶ Kră Yang khan kơ Môis thoi âu:

⁷ Lu kon drŏ-kăn Sêlôpêhat pơma noh trŏ; ih athei asong lu sư teh jang sa minh đơ̆ng lăm lu 'nhŏng oh 'bă lu sư, wă khan ăn kơ lu sư teh jang sa đơ̆ng 'bă lu sư.

⁸ Ih kư̆m athei roi tơbăt ăn kơ lu adrĕch adrung Isơrael thoi âu: Tơdah đei minh 'nu bơngai bu lôch mă ưh kơ đei kon drŏ-nglo, lei lu iĕm athei jao ăn teh jang sa sư noh kơ lu kon drŏ-kăn sư.

⁹ Tơdah sư kư̆m ưh kơ đei kon drŏ-kăn, lei lu iĕm gô ăn kơ lu 'nhŏng oh sư.

¹⁰ Tơdah sư ưh kơ đei 'nhŏng oh pôm mĕ 'bă lei ăn kơ lu 'nhŏng oh 'bă sư.

¹¹ Tơdah 'bă lu sư ưh kơ đei 'nhŏng oh ôh, lei jao ăn teh jang noh kơ lu 'nhŏng oh bơngai bu mă jê̆ hloh; păng bơngai noh iŏk jang sa. Noh jĭ minh tơdrong juăt păng tơdrong tơtă ăn kơ adrĕch adrung Isơrael, kiơ̆ thoi Kră Yang đei pơkă khan ăn kơ Môis.

Jôsuê jang pơtrơp Môis

¹² Kră Yang khan kơ Môis thoi âu: Tŏk bĕ tơ kông Abarim na tơmang lăng bĕ tơ dêh char mă Inh wă ăn kơ lu adrĕch adrung Isơrael.

¹³ Đang kơ ih lăng dêh char noh boih, ih kư̆m gô wih kiơ̆ 'bok yă ih, thoi 'nhŏng ih Arôn kư̆m wih kiơ̆ 'bok yă boih.

¹⁴ Yua kơ ih sơngah ưh kơ chu kiơ̆ kơ nơ̆r Inh tơtă tơ lăm char glă Yin sơ̆, kơplah lu kon pơlei iung blah. Yua kơ măr iĕm ưh pă pơyom boih kơ tơdrong 'lơ̆ng rơgoh Inh 'bơ̆t anăp lu sư kơ tơdrong đak Mêriba krao đak tơhil băl tơ dêh Kalđê, lăm char glă Yin,

¹⁵ Môis tơl Kră Yang:

¹⁶ Ơ Kră Yang, 'Bok Kei-Dei Yang kơ đĭ-đăng kon bơngai, apinh Ih rơih chă ăn bĕ minh 'nu lăm khŭl adrĕch adrung âu pơm yŏng pơgơ̆r.

¹⁷ Wă kơ bơngai noh mơ̆t lĕch năm 'bơ̆t anăp lu sư, wă kơ bơngai noh chông ba lu sư mơ̆t păng chông ba lu sư lĕch, wă kơ khŭl akŭm Kră Yang huay kơ thoi triu ưh kơ đei bơngai wei.

¹⁸ Kră Yang khan kơ Môis thoi âu: Iŏk bĕ Jôsuê kon drŏ-nglo Nun, bơngai đei Yang Bơhngol 'lơ̆ng lăm sư; pel bĕ kơ̆l sư.

¹⁹ Đơ̆ng noh năm ba sư tơ'bơ̆p Êlêasar 'bok soi păng lu khŭl akŭm, na ih jao hloi kơ sư tơdrong jang 'bơ̆t anăp tơpôl,

²⁰ păng ih kư̆m jao hloi kơ tơdrong gơh kĕ ih wă kơ lu bơngai Isơrael chu yom mơ̆ng kiơ̆ sư.

²¹ Sư gô năm dơ̆ng 'bơ̆t anăp 'bok soi, Êlêasar, sư apinh Urim 'bơ̆t anăp Kră Yang ăn kơ Jôsuê wă kơ sư băt sek tơdrong liơ, Jôsuê păng đĭ-đăng kon pơlei Isơrael athei kiơ̆ dôm tơdrong jang lu sư gô mơ̆t dah gô lĕch.

²² Thoi noh, Môis pơm kiơ̆ thoi Kră Yang đei khan athei sư, rơih iŏk Jôsuê năm 'bơ̆t anăp 'bok soi Êlêasar păng đĭ-đăng kon pơlei Isơrael.

²³ Dan ti kơpal kơ̆l sư păng pơjao ăn, kiơ̆ thoi Kră Yang đei pơkă athei Môis pơm thoi noh.