Jo 19 - Sơ̆p Hlabơar Nơ̆r 'Bok Kei-Dei

Đak wă ôp tơdrong 'mê̆ mơgrĭ

¹ Kră Yang khan dơ̆ng kơ Môis păng Arôn:

² 'Nâu jing tơdrong tơtă đơ̆ng lăm khôi juăt mă Kră Yang ăn boih: Khan bĕ kơ adrĕch bơngai Isơrael păng athei lu sư rôp ba rơmo adruh sŏk gôh huay kơ jĭ kiơ păng ưh tam mă tah 'long ăt.

³ Jao ăn rơmo noh kơ 'bok soi Êlêasar, chông ba tơ 'nguaih kơđông, na pơlôch rơmo noh 'bơ̆t anăp sư.

⁴ Êlêasar 'bok soi, gô tôt hơnglâu ti tơ lăm pham noh na tơtreh tơpơh wơ̆t tơ gah Bơsŭn Anih Akŭm.

⁵ Đe gô 'buh rơmo adruh noh 'bơ̆t anăp sư, 'buh akar, sĕch păng pham hrâu hơbĭ hăm ĭch sư.

⁶ 'Bok soi gô iŏk 'long hơngo, iŏk minh hơchô̆ 'long pơgang păng brai 'brê, iŏk klơ̆m lăm ŭnh oei soh rŭk 'buh rơmo adruh noh.

⁷ Đơ̆ng noh, 'bok soi athei pih ao tai păng hum môch akâu tơ lăm đak, klaih kơ noh mơ̆t tơ kơđông, 'bok soi jing mơgrĭ 'mê̆ dĭng truh kơsơ̆ măng noh.

⁸ Tơ'ngla mă 'buh rơmo kư̆m athei pih hơbĕn ao păng hum môch akâu sư tơ lăm đak, bơngai noh kư̆m jing 'mê̆ mơgrĭ truh kơsơ̆ măng.

⁹ Minh 'nu bơngai drŏ-nglo rơgoh 'lơ̆ng gô năm kôch iŏk tơnuh rơnok rơmo adruh đơ̆ng đe 'buh noh năm tuh tơ 'nguaih kơ kơđông, 'bơ̆t anih rơgoh; đe athei mong tơnuh rơnok noh kơ adrĕch Isơrael yua wă pơm đak, wă sut rơgoh tơdrong yoch.

¹⁰ Bơngai bu mă kôch tơnuh rơnok rơmo adruh noh gô năm pih hơbĕn ao sư păng bơngai âu jing mơgrĭ yoch truh kơsơ̆ măng. Tơdrong 'nâu gô pơm jing tơdrong juăt ling-lang lăm bơngai Isơrael păng lu bơngai tơmoi mă oei hơdai hăm kon pơlei noh.

¹¹ Bơngai bu mă jê̆ hơtŭt kơ akâu bơngai lôch bơngai noh jing 'mê̆ lăm tơpơh năr.

¹² Năr mă pêng năr mă tơpơh bơngai noh athei yua đak 'nâu wă sŭt rơgoh sư kơdih, na jing rơgoh; tơdah lăm năr mă pêng păng năr mă tơpơh ưh kơ sŭt rơgoh sư kơdih, lei ưh kơ gơh rơgoh.

¹³ Bơngai bu mă hơtŭt 'bơm akâu bơngai lôch păng ưh kơ ôp sut sư rơgoh, gô pơm ăn kơ Bơsŭn Anih Akŭm Kră Yang 'mê̆-'mach. Bơngai noh đe gô pơpuh tơlĕch sư đơ̆ng lăm khŭl bơngai Isơrael; yua kơ đak ôp sut tơdrong 'mê̆-'mach ưh kơ đei tơtreh tơ akâu sư, lei na sư oei 'mê̆-'mach đĕch, tơdrong 'mê̆-'mach oei tơ lăm akâu sư.

¹⁴ 'Nâu tơdrong juăt mưh đei minh 'nu bơngai lôch lăm bơsŭn; mă bơngai bu mơ̆t lăm bơsŭn păng bơngai oei lăm bơsŭn gô 'bơm 'mê̆ lăm tơpơh năr.

¹⁵ Đĭ-đăng dôm lu gŏ 'bĭnh ayơ mă ưh kơ đơ̆p, ưh kơ đei tơnglơ̆p đơ̆p, gô jing 'mê̆-'mach.

¹⁶ Tơ bri brah, bơngai bu hơtŭt 'bơm kơ bơngai lôch kơ đao gưm đe 'bet, dah akâu bơngai lôch, kơting bơngai lôch dah bơsat, gô jing 'mê̆-'mach lăm tơpơh năr,

¹⁷ gah bơngai mă 'bơm 'mê̆-'mach, đe iŏk tơnuh rơnok 'buh soh rơmo wă huai đơ̆ng yoch, tah lăm bô̆i păng tuh đaka ro hlăng lăm noh.

¹⁸ Đơ̆ng noh minh 'nu bơngai rơgoh gô iŏk minh hơchô̆ hla 'long pơgang djrŭ tơ lăm đak, na tơtraih jơ̆p kơ anih lăm bơsŭn, tơ rim lu ge bô̆i, tơ rim 'nu lu bơngai oei tơ lăm noh păng tơ akâu bơngai bu mă đei hơtŭt 'bơm 'mê̆, dah lu kơting bơngai lôch, dah akâu minh 'nu bơngai đe pơlôch, dah akâu bơngai lôch dah bơsat.

¹⁹ Năr mă pêng păng năr mă tơpơh, bơngai mă rơgoh athei iŏk đak noh tơtraih tơ akâu bơngai mă hơtŭt 'bơm 'mê̆-'mach păng năr mă tơpơh bơngai rơgoh noh athei pơm ăn rơgoh; bơngai mă 'bơm 'mê̆ noh athei pih hơbĕn ao sư, hum tong akâu lăm đak păng dĭng truh tơ kơsơ̆ măng na gơh rơgoh.

²⁰ Gah bơngai bu hơtŭt 'bơm 'mê̆ mă ưh kơ pơm hơmet kơdih akâu rơgoh, minh 'nu bơngai thoi noh đe gô puh tơweh tơlĕch sư đơ̆ng tơpôl kon pơlei, yua kơ sư pơm kơ hnam Kră Yang jing 'mê̆-'mach. Đak ôp sut tơdrong 'mê̆ ưh kơ đei tơtraih tơ akâu sư, sư noh đe jô̆ oei 'mê̆-'mach.

²¹ Noh boih jing tơdrong juăt pơm ling-lang lăm kon pơlei pơla. Bơngai bu mă tơtraih rơgoh đơ̆ng 'mê̆-'mach hăm đak bơngai noh sư athei pih hơbĕn ao tai sư; bơngai bu hơtŭt 'bơm kơ đak ôp sut 'mê̆-'mach bơngai noh jing 'mê̆-'mach truh kơsơ̆ măng.

²² Mă tơmam kiơ bơngai 'bơm 'mê̆ hơtŭt 'bơm gô apoh 'mê̆-'mach; dah bu hơtŭt 'bơm bơngai noh gô apoh 'mê̆-'mach truh kơsơ̆ măng.