Jêphania 2 - Sơ̆p Hlabơar Nơ̆r 'Bok Kei-Dei

Tơdrong wă pơrăm lu adrĕch adrung nai

¹ Ơ kon pơlei mă ưh kơ băt mơlâu! Akŭm băl bĕ, tơpă, athei akŭm băl bĕ!

² Adrol kơ năr đei pơkă boih wă truh, adrol kơ năr noh truh thoi hơkam 'ba kial pơđông, adrol kơ tơdrong Kră Yang hil mĭl truh tơ lu iĕm, adrol kơ jơ 'năr Kră Yang hil truh tơ lu iĕm.

³ Chơchă bĕ Kră Yang ơ lu bơngai chu yom lăm teh đak, pơm kiơ̆ bĕ nơ̆r Kră Yang tơtă, chơchă tơdrong tơpăt Sư, chơchă bĕ tơdrong gơh găt, dah rŏ lăng đe gô ôn iĕm hlơp lăm năr Kră Yang hil.

⁴ Sĭt tơpă Gasa gô lê̆ bri, Askalon gô juơ rơhiăng; đe gô pơpuh kon pơlei Asdôt kơplah 'năr dơ̆ng păng Ekrôn đe gô buch lê̆.

⁵ Răm-'băm tơpă kơ pơlei mă oei jê̆ đak dơsĭ, wă khan lu adrĕch Kêrêthit! Ơ Kanaan jơ̆ teh đak Philistin, nơ̆r Kră Yang kư̆m pơma blah lu iĕm; “Inh gô pơlôch pơgoh đĭ lu iĕm dĭng pă đei.”

⁶ To gah dơsĭ gô jing bri, tơmăn 'nhĕt, tơ noh gô đei bơsŭn lu bơngai wei triu păng hơdrong lu triu.

⁷ Tơring ei gô jing tơring kơ lu adrĕch adrung Juđa mă oei oei; lu sư gô năm wei triu tơ noh, kơmăng lu sư gô tep pơdơh tơ lăm lu hnam pơlei Askalon; Yua kơ Kră Yang gô năm ngôi hơpong tơ lu sư păng chông tơbrŏk lu bơnă sư.

⁸ “Inh đei kơtơ̆ng boih nơ̆r Môap blei hiap. Nơ̆r kon sâu Ammôn pơma kơnê̆; lu sư pơma blei hiap kon pơlei pơla Inh păng pơma pơang khan wă blah iŏk teh đak lu sư.”

⁹ Thoi noh Kră Yang Tih Hloh, wă khan Kră Yang 'Bok Kei-Dei kơ bơngai Isơrael khan: “Tơpă thoi Inh oei arih, tơpă Môap gô thoi Sôđôm păng lu kon sâu Ammôn nhen thoi Gômôrơ, jing minh anih 'bĕnh kơ jơla, minh pôm sơlŭng 'boh, minh anih juơ ling-lang hloi, lu kon pơlei Inh mă oei arih răi gô tơgar rôp iŏk lu sư, gah tơmam kon pơlei mă oei oăi gô jing tơmam lu sư iŏk yua.”

¹⁰ Tơdrong noh truh tơ lu sư yua kơ lu sư pơang, pơrŏ pơhuơ̆, pơư kơdih khan tơblah hăm kon pơlei Kră Yang Tih Hloh,

¹¹ Kră Yang gô tơ'bôh kơ lu sư hli krưp tơpă; yua kơ Sư gô pơlôch lu yang kơpal teh âu hăm tơdrong pơngot rơwĕt na rim 'nu bơngai lăm teh đak gô kơkuh kơ Kră Yang, lăm dêh char sư kơdih. Mă đĭ-đăng kơ bŏl đak păng dêh lei-lăi.

¹² “Ơ kon pơlei Êthiôpi, đe gô 'bet lu iĕm hăm đao Inh.”

¹³ Đơ̆ng noh Kră Yang gô yơ̆r ti Sư tơ gah yă-nơ̆m, gô pơlôch pơrăm char Asiri, pơm ăn kơ pơlei Niniwe jing juơ, jing hrĕng kro thoi char 'blach.

¹⁴ Dôm lu kon sem dơrong gô drum 'bĭch lăm tŏk-bŏk; đĭ-đăng lu sem brem nai, truh kon sem thoi tơjŏ mơja, jơmăr, sem grơ̆ klang kư̆m gô kôp oei kơpal gơ̆ng. Sem bơlang gô hmoi si tơ 'măng-'mŏk, tơdrong bơsĕl 'bơ̆t 'măng păng lu bơbŭng hnam pơm păng 'long dơnơ̆ng đĭ yuih lê̆ boih.

¹⁵ To, pơlei chơt hiôk dang ei oei rơnŭk hơnơ̆ng huay pă tơtăm păng khan lăm jơhngơ̆m: “Inh âu, ưh pă đei bu boih 'nguaih kơ inh!” Ô anih lu sư đĭ juơ boih, jing pơm anih 'bĭch kơ lu sem bri, pă băt dang yơ! Thoi noh mưh đei bơngai năm rok trong ei kơđôp ti hiĕk ăr.