Je 8 - Sơ̆p Hlabơar Nơ̆r 'Bok Kei-Dei

Ưh pă đei 'bŭ dơ̆ng

¹ Kră Yang khan: “Kơplah noh, đe gô kôch kơting lu pơtao đe Juđa, kơting lu yŏng pơgơ̆r, lu 'bok soi, lu 'bok khan lê̆ adrol păng đĭ-đăng kơting lu kon pơlei oei pơlei Jêrusalem đơ̆ng lăm bơsat.

² Đe gô sơ̆k kơting noh tơ tŏ măt 'năr măt khei păng lu sơnglŏng đơ̆ng plĕnh ti, noh tơmam mă lu sư 'mêm kơeng, chơchă kơkuh awih awăn, kiơ̆. Lu kơting noh đe ưh pă đei dônh pơpôi, ưh pă 'bŭ dơ̆ng; gô jing thoi mơ̆r kơpal teh.

³ Đĭ-đăng lu bơngai mă oei đei đơ̆ng adrĕch adrung bơngai kơnê̆ âu, lăm đĭ-đăng anih mă Inh đei pơpuh lê̆ boih lu sư 'maih chă lôch hloh kơ 'maih wă arih,” noh Kră Yang Tih Hloh khan.

Tơdrong yoch păng phak

⁴ “Ăn kơ ih roi bĕ kơ lu sư: ‘'Nâu Kră Yang khan: ‘Bơngai pơ̆k hăm pă iung dơ̆ng? Bơngai jrok hăm wơ̆t brŏk dơ̆ng?

⁵ Lei liơ kon pơlei âu jrok hloi? Liơ kon pơlei Jêrusalem wơ̆l jrok ling-lang? Lu sư rôp kơjăp tơdrong hơlĕnh, sơngah kuă kơ wih brŏk.

⁶ Inh pơgling đon păng oei mơ̆ng, mă-lei lu sư pơma ưh kơ tơpăt ôh. Ưh kơ đei bu tơbral tơdrong yoch sư, na khan: “Tơdrong kiơ inh đei pơm boih?” Rim 'nu yak kiơ̆ trong lu sư kơdih, thoi aseh hrơ̆t năm tơpăt tơ anăp wă tơblah.

⁷ Klang kok tơ rơwơ̆ng kư̆m băt kơ bơyan, păng sem kơtơp, sem pleng păng sem chơgơi, kư̆m băt kơ khei 'năr brŏk; mă-lei kon pơlei pơla Inh ưh kơ băt ôh khôi juăt Kră Yang.

⁸ Liơ lu iĕm gơh khan: “Lu nhôn hơgei boih, lu nhôn đei khôi juăt Kră Yang? Mă-lei âu, lu bơngai chih hla bơar chih hơlĕnh. Pơm pơglăi lê̆ kơ khôi juăt Inh

⁹ Lu bơngai hơgei gô mơlâu, hli tơrơ păng đe gô rôp lu sư; 'Nâu, lu sư sơngah boih kơ nơ̆r Kră Yang, lei lu sư wă đei hơgei liơ dơ̆ng?

¹⁰ Thoi noh Inh gô ăn kơ đe nai iŏk akăn lu sư, chŭn mir lu sư kư̆m ăn kơ đe nai jang. Iŏk đơ̆ng lu bơngai pơm iĕ truh tơ lu bơngai pơm tih, tă kơ chă lơi kơdih ngăl. Đơ̆ng lu 'bok khan lê̆ adrol truh tơ lu 'bok soi, rim 'nu kơ lu sư tă kơ sa pơgâm ngăl.

¹¹ Lu sư hơmet rơka kon pơlei pơla Inh, chă yôk yak đĕch khan: Hiôk-hian, 'lơ̆ng rŏ!’ ” Tơpă ưh kơ đei hiôk-hian.

¹² “Trŏ kơ lu sư mơlâu pơm tơdrong kơnê̆ krưp, mă-lei lu sư ưh kơ băt mơlâu, Kŭm ưh kơ băt hlơ̆l lĕm. Thoi noh na lu sư gô huŏng pơ̆k hơdai lu bơngai mă pơ̆k huŏng; truh năr wă phak lu sư gô pơ̆k răm,” noh Kră Yang khan.

¹³ Kră Yang khan: “Tơpă Inh gô iŏk lê̆ đĭ mir pơgar lu sư, tơm hơmu ưh pă đei plei; tơm hơra kư̆m ưh pă plei; hla lu sư gô kro hơlŭng, Dôm tơmam mă Inh đei ăn kơ lu sư boih, Inh gô pơdrâu iŏk đơ̆ng ti lu sư!”

¹⁴ “Liơ lu bơ̆n hơ-oei tơ âu? Bĕ bơ̆n akŭm băl! Bĕ bơ̆n kơdâu ôn mơ̆t oei tơ lăm lu pơlei tih kơjăp noh păng lôch tơ noh, yua kơ Kră Yang 'Bok Kei-Dei pơkă wă pơlôch pơrăm bơ̆n! Sư ăn boih kơ bơ̆n nhă đak bơnhŭl yua kơ bơ̆n pơm yoch boih hăm Sư.

¹⁵ Lu bơ̆n oei chang wă kơ đei hiôk-hian, mă-lei ưh kơ đei tơ'bơ̆p tơdrong hiôk. Bơ̆n chang wă kơ klaih, mă-lei tă kơ đei tơdrong hli hlơt krưp truh.

¹⁶ Đơ̆ng tơring Đan, đe kơtơ̆ng aseh hmoi; wă kơtơ̆ng aseh ôr, đĭ-đăng jơ̆p kơ teh đak pơpơ̆; Lu sư truh wă pơrăm teh hăm lu tơmam lăm noh, lu pơlei tih hăm lu bơngai oei lăm pơlei noh.”

¹⁷ “'Nâu, Inh gô ăn 'bih truh tơ lu iĕm, 'Bih dong ưh kơ đei bu gơh pơlung sư, Sư gô choh lu iĕm,” noh Kră Yang khan.

Jêrêmi nhơ̆m sơ'ngon kơ kon pơlei

¹⁸ Tơdrong chơt hiôk inh pă đei boih, a tơdrong pơmat pơm kơ inh, jơhngơ̆m inh đĭ rơdu rơmơ̆n.

¹⁹ Ei, mơ̆ng bĕ, lu kon pơlei Inh nhơ̆m hmoi đơ̆ng char ataih, “Kră Yang ưh pă oei lăm Siôn boih hă? Pơtao ưh pă oei lăm noh boih hă?” “Liơ lu sư pơ̆n tơblĕk Inh yua rup yang man, hăm rup yang traih ưh kơ yua đơ̆ng dêh tơmoi?”

²⁰ Bơyan yuă 'ba hloh boih, Bơyan phang đĭ boih, Mă-lei bơ̆n ưh tam mă đei dŏng pơklaih?

²¹ Jơhngơ̆m inh pơchah yua kơ 'mêm mơnat kơ kon pơlei inh pơmat, Inh nhơ̆m sơ'ngon, lăm jơhngơ̆m inh pă sŭk boih.

²² Lăm dêh Gileat hăm pă đei 'long pơgang pơklaih rơka ưh? Hăm pă đei 'bok pơgang tơ noh? Liơ mă rơka lu kon pơlei inh ưh kơ klaih?