Je 7 - Sơ̆p Hlabơar Nơ̆r 'Bok Kei-Dei

Bơngai Juđa ưh kơ tơplih

¹ Kră Yang khan kơ Jêrêmi:

² “Dơ̆ng bĕ 'bơ̆t 'măng jang hnam Kră Yang, roi tơdrong 'nâu: ‘Mơ̆ng bĕ nơ̆r Kră Yang khan 'nâu: Ơ đĭ-đăng adrĕch Juđa lu bơngai mă mơ̆t trong 'măng jang 'nâu wă kơkuh kơ Kră Yang.’ ”

³ Kră Yang Tih Hloh 'Bok Kei-Dei bơngai Isơrael khan thoi âu: “Hơmet tơplih ming bĕ trong tơdrong arih lu iĕm păng tơdrong jang lu iĕm; lei na Inh ăn kơ lu iĕm oei oei lăm anih 'nâu.

⁴ 'Nĕ kơ lui gơnang kơ nơ̆r pơma hơlĕnh khan: ‘'Nâu boih hnam Kră Yang hnam Kră Yang hnam Kră Yang!’ ”

⁵ Tơdah lu iĕm tơplih ming trong arih păng tơdrong jang lu iĕm tơpă, tơdah lu iĕm pơm 'lơ̆ng tơpăt tơduă lu iĕm mă tơpă.

⁶ Tơdah iĕm huay kơ pơjuă pơđep lu bơngai tơmoi, lu bơngai mơti, lu drŏ-kăn adro păng huay kơ pơlôch tuh pham lăm anih âu păng kư̆m huay kơ kiơ̆ kơkuh kơ yang nai wă pơrăm kơ iĕm kơdih,

⁷ na Inh gô ăn kơ iĕm oei arih tơ lăm anih 'nâu lăm dêh char mă Inh đei ăn boih kơ 'bok yă iĕm đơ̆ng sơ̆ khơ̆ ning-mônh hloi.

⁸ Mă-lei, lu iĕm oei lui gơnang kơ nơ̆r hơlĕnh ưh kơ đei yua ôh.

⁹ Hăm trŏ lu iĕm tơtông, pơlôch bơngai, pơm pơyô kư̆ kă, pơkă hơlĕnh, soh 'long 'bâu phu kơ yang Baal, kiơ̆ yang nai mă iĕm ưh kơ băt

¹⁰ Păng đơ̆ng noh năm dơ̆ng kơkuh kơ Inh, tơ hnam âu, anih mă đe krao Anăn Inh, păng khan: “Lu bơ̆n klaih hiôk boih.” Hiôk oei wă pơm dôm tơdrong Inh areh noh?

¹¹ Lei lu iĕm lăng hnam âu, anih Anăn Inh, thoi anih tơtông klĕ hă? Âu Inh, Inh 'bôh boih dôm tơdrong noh, Kră Yang khan thoi noh.

¹² “Thoi noh, năm bĕ tơ Silô anih Inh oei sơ̆, anih mă Anăn Inh oei blŭng-a na lăng Inh đei pơm kiơ kơ sư boih yua kơ tơdrong kơnê̆ lu bơngai Isơrael Inh;

¹³ Kră Yang khan: Yua kơ lu iĕm đei pơm boih tôm tơdrong noh mă Inh lơ wơ̆t khan kơ lu iĕm, mă-lei lu iĕm ưh kơ wă mơ̆ng; Inh krao lu iĕm mă-lei lu iĕm kuă kơ tơl nơ̆r Inh.

¹⁴ Na tơdrong kiơ Inh đei pơm boih kơ pơlei Silô Inh gô pơm kơ hnam âu, hnam krao Anăn Inh, hnam mă lu iĕm gơnang Inh gô pơm lei-lăi kơ anih mă Inh đei ăn boih kơ lu iĕm păng lu 'Bok yă iĕm.

¹⁵ Inh gô pơpuh lu iĕm đơ̆ng anăp Inh, kư̆m thoi Inh đei pơpuh boih 'nhŏng oh lu iĕm, đĭ-đăng lu adrĕch kon sâu Êphraim.

¹⁶ Bĭ gah ih, 'nĕ pă krao khan ăn kơ adrĕch adrung 'nâu; kư̆m 'nĕ kơ ôr krao apinh yua kơ lu đe âu, ih kư̆m 'nĕ krao lung Inh, yua kơ Inh ưh kơ wă mơ̆ng ih ôh.

¹⁷ Ih ưh kơ 'bôh ôh hă tơdrong lu sư pơm tơ pơlei Juđa păng tơ rok trong pơlei tih Jêrusalem?

¹⁸ Lu hơ'lơ̆p dônh 'long ŭnh, 'bă tơkuh ŭnh, lu drŏ-kăn jrâu tơpŭng pơm 'bĕng pơyơ̆r kơ pơtao Drŏ-kăn tơ Plĕnh ti; păng lu sư kư̆m tuh pơyơ̆r tơmam huch kơ lu yang nai, pơm wă Inh klai.

¹⁹ Kră Yang khan: “Hăm trŏ lu sư tơblĕk Inh? Hăm trŏ lu sư pơjĭ lu sư kơdih, pŭ iŏk tơdrong mơlâu kơdih?”

²⁰ Yua kơ thoi noh Kră Yang khan: “'Nâu Inh gô tuh tơdrong Inh hil tơ lăm dêh char âu, tơ lu kon bơngai tơ lu sem dơrong tơ lu 'long plei lăm mir păng plei yua đơ̆ng teh. Tơdrong Inh hil gô soh pơđĭ, ŭnh gô sa ưh kơ đei păt.”

²¹ Kră Yang Tih Hloh 'Bok Kei-Dei bơngai Isơrael khan: “Thim bĕ tơmam soi 'buh kơ tơmam soi nai, sa bĕ 'nhĕm noh!

²² Kơplah Inh chông tơlĕch lu 'bok yă iĕm đơ̆ng dêh Êyiptơ sơ̆, Inh ưh kơ đei pơma, dah tơtă kơ lu sư gah tơmam soi 'buh dah tơmam soi ôh.

²³ Mă-lei 'nâu tơdrong Inh tơtă kơ lu sư. ‘Chu bĕ kơ nơ̆r Inh, Inh gô jing Kră Yang 'Bok Kei-Dei lu iĕm, iĕm jing kon pơlei pơla Inh. Arih yak kiơ̆ bĕ lăm rim trong Inh đei tơtă, wă kơ lu iĕm đei tơdrong pŭn hiôk.’

²⁴ Mă-lei lu sư ưh kơ wă mơ̆ng nơ̆r Inh kư̆m kuă kơ pơgling đon mơ̆n, lu sư arih kiơ̆ kơdih wă kiơ̆ kơ jơhngơ̆m kơnê̆, arăng kơ̆l, lu sư kơdŭn tơ rŏng ưh kơ năm tơ anăp.

²⁵ Iŏk đơ̆ng năr 'bok yă iĕm lĕch đơ̆ng dêh Êyiptơ truh tơ dang ei, Inh oei chơ̆n wơh đĭch đam Inh, lu bơngai khan lê̆ adrol năm tơ lu sư.

²⁶ Mă-lei lu sư arăng kơ̆l ưh kơ wă mơ̆ng Inh, kư̆m ưh kơ wă pơgling đon mơ̆n, lu sư rai pơm kơnê̆ hloh kơ lu 'bok yă sư.

²⁷ Kơplah Ih pơma dôm tơdrong 'nâu, lu sư ưh kơ mơ̆ng ih. Ih krao, mă-lei lu sư kuă kơ tơl.

²⁸ Ih athei khan kơ lu sư: 'Nâu boih adrĕch adrung ưh kơ chu mơ̆ng nơ̆r Kră Yang 'Bok Kei-Dei lu sư, kư̆m ưh kơ wă hơmet ming glăi. Tơdrong sĭt tơpă hiong đĭ boih; 'bơ̆r lu sư ưh pă pơma tơdrong noh dơ̆ng.

²⁹ Hơkôih bĕ sŏk kơ̆l lu iĕm păng klơ̆m lê̆ mă ataih; ôr nhơ̆m hmoi bĕ tơ kơpal groi, yua kơ Kră Yang sơngah hŭt lê̆ boih adrĕch adrung mă Sư hil mĭl 'nâu.’ ”

Thŭng Tơkoh pơlôch

³⁰ Kră Yang khan: “Bơngai Juđa pơm boih tơdrong kơnê̆ 'bơ̆t anăp Inh, lu sư pơm boih rup yang mă Inh lăng krưp lăm hnam Anăn Inh, pơm kơ hnam noh 'mê̆-'mach.

³¹ Lu sư man dơ̆ng anih kơjung tơ Tôphet, lăm Thŭng Ben Hinôm, wă 'buh pơyơ̆r kon drŏ-nglo drŏ-kăn lăm ŭnh; tơdrong noh Inh ưh kơ đei bơtho tơtă, Inh kư̆m ưh kơ tơchĕng mơ̆n tơdrong noh.

³² Kră Yang khan; Yua kơ thoi noh na truh tơ ei kơnh đe ưh pă krao boih Tôphet păng Thŭng Ben Hinôm, mă-lei krao Thŭng Tơkoh tơ'bet băl; yua kơ lu sư gô 'bŭ bơngai lôch tơ Tôphet dĭng mah anih pă đei.

³³ Akâu kon pơlei lôch jing tơmam sa kơ lu sem păr păng lu sem bri brah; ưh kơ đei bu puh lu sư.

³⁴ Inh gô pơtôch ưh pă đei kơtơ̆ng nơ̆r hiĕk chơt hiôk năr pơkong klo kăn, tơ lăm pơlei tih Juđa păng tơ rok trong tih pơlei Jêrusalem yua kơ lăm dêh char răm đĭ jing juơ.”