Je 6 - Sơ̆p Hlabơar Nơ̆r 'Bok Kei-Dei

Đe wang pơlei Jêrusalem

¹ Kơdâu bĕ tơ anih hơđơ̆ng, Ơ kon pơlei Bênjamin; Lĕch bĕ đơ̆ng pơlei Jêrusalem. Hlôm bĕ keng roi tơbăt tơ pơlei Têkôa, Soh ŭnh pơm tơdra tơ pơlei Bêt Hakarem; yua kơ đei tơdrong kơnê̆ wă truh pơrăm tih dêh, lĕch boih đơ̆ng gah yă-nơ̆m.

² Inh gô pơrăm adruh 'lơ̆ng kơeng pơlei Siôn.

³ Lu bơngai wei triu hăm khŭl triu sư năm pơm kơ pơlei Siôn, lu sư gô pơm bơsŭn tăp dăr kơ pơlei, ba triu lu sư sa 'nhĕt lăm anih mă đei 'măn lê̆ kơ lu sư.

⁴ “Hơmet bĕ wă tơblah hăm sư! Iung bĕ! Blah drŭt kơplah 'năr dơ̆ng. Răm-'băm tơpă kơ bơ̆n; năr wă kơsơ̆, yơ̆p măng truh boih rai să.

⁵ Bĕ bơ̆n iung năm blah kơmăng, Pơrăm lu anih kơđông kơjăp sư!

⁶ Kră Yang Tih Hloh đei khan: Kăl bĕ 'long, tuh teh bơ̆ dur na blah pơlei Jêrusalem! 'Nâu boih pơlei tih trŏ kơ phak bơtho sư; lăm pơlei tă kơ đei bơngai pơjuă pơđep ngăl,

⁷ Thoi đak sơlŭng lĕch thoi yơ, tơdrong kơnê̆ lu sư kư̆m lĕch thoi noh. Kơtơ̆ng đei tơdrong kơnê̆ păng pơrăm tơ lăm pơlei noh, tơdrong jĭ jăn, rơka rơkĕch oei 'bơ̆t anăp Inh ling-lang.

⁸ Ơ pơlei Jêrusalem mơ̆ng bĕ nơ̆r chrih bơtho, kơnh Inh achăng lê̆ iĕm, Kơnh pơm ăn kơ iĕm jing bri juơ, ưh kơ đei bu oei.

⁹ Kră Yang Tih Hloh khan: “Đe gô dônh pơpôi đĭ lu kon pơlei Isơrael mă oei oei thoi đe dônh plei hơmu. Chro ti 'mơn phĕ hơlơ̆k dơ̆ng bĕ, thoi đe phĕ plei hơmu.”

¹⁰ Inh gô roi păng tơbăt kơ bu, wă kơ lu sư mơ̆ng Inh? 'Nâu, đon lu sư chĭt lê̆ boih, lu sư ưh pă kơtơ̆ng boih. Nơ̆r Kră Yang lu sư pơjăm, lu sư ưh kơ 'maih mơ̆ng ôh nơ̆r Kră Yang.

¹¹ Gah inh, Kră Yang hil 'bĕnh kơ inh, inh ưh kơ kĕ kơ dơ̆ng ôh. “Tuh bĕ tơdrong noh tơ lu bơngai hơ'lơ̆p tơ rok trong pơlei, Tơ lu bơngai tơdăm oei akŭm băl; tơ klo hăm akăn, tơ lu kră păng lu kră jơnei.

¹² Hnam lu sư gô jao kơ đe nai; Hơdai hăm mir pơgar păng akăn lu sư hai. Kơplah Inh gô yơ̆r ti, phak lu kon pơlei lăm dêh 'nâu,” Kră Yang khan thoi noh.

¹³ “Iŏk đơ̆ng bơngai kơhlôh truh tơ bơngai hơgei, tă kơ chă lơi ngăl. Đơ̆ng lu bơngai khan lê̆ adrol truh tơ lu 'bok soi kư̆m sa pơgâm.

¹⁴ Lu sư hơmet rơka kon pơlei Inh 'bơ'biơ̆ đĕch na khan hiôk-hian hiôk-hian; mă tơpă ưh kơ đei hiôk-hian ôh.

¹⁵ Lu sư pơm yoch kơnê̆ dêh hăm mơlâu ưh? Lu sư ưh kơ đei mơlâu ôh, muh măt lu sư ưh kơ đei layơ đum rak mơlâu. Kŭm ưh kơ băt mơlâu noh kiơ. Lei na lu sư gô pơ̆k hơdai hăm lu bơngai mă pơ̆k huŏng; truh năr Inh phak pơmat lu sư, lu sư gô hraih đang.” Kră Yang khan thoi noh.

¹⁶ Kră Yang khan: “Dơ̆ng bĕ tơ rok trong na răp lăng; Chă jet trong so, trong ayơ 'lơ̆ng yak kiơ̆ bĕ trong noh, Na chă ăn kơ bơhngol lu iĕm pơdơh hiôk.” Mă-lei lu sư khan: “Lu nhôn ưh kơ yak kiơ̆ ôh trong noh.”

¹⁷ Inh 'măn boih lu bơngai gak wei-lăng tăp dăr kơ iĕm păng khan; ‘Pơgling đon lu iĕm mơ̆ng bĕ keng re.’ Mă-lei lu sư khan: “Lu nhôn ưh kơ wă mơ̆ng ôh.”

¹⁸ “Thoi ei, ơ lu dêh char, mơ̆ng bĕ, Ơ lu bơngai pơm kơdranh, athei băt. Lu tơdrong Inh gô pơm wă phak lu sư!

¹⁹ Mơ̆ng bĕ ơ đĭ-đăng teh đak. Âu Inh ba tơdrong răm truh kơ lu kon pơlei pơla âu, noh boih lĕch đơ̆ng tơdrong lu sư đei pơm boih, Yua kơ lu sư ưh kơ wă pơgling đon mơ̆ng nơ̆r Inh, păng sơngah boih kơ khôi juăt Inh.

²⁰ Lu iĕm soh pơyơ̆r kơ Inh 'long 'bâu phu đơ̆ng char Seba, dah tơmam 'bâu phu đơ̆ng dêh ataih wă pơm kiơ? Inh ưh kơ iŏk ôh tơmam soi 'buh lu iĕm, tơmam soi mă iĕm pơyơ̆r kư̆m ưh kơ đei pơhiôk kơ Inh mơ̆n!”

²¹ Yua kơ thoi noh Kră Yang khan: “'Nâu Inh gô găn anăp lu sư wă kơ lu sư pơ̆k. 'Bă păng kon drŏ-nglo lu sư gô răm; buăl juăt rông 'bôt lu sư gô lôch hiong đĭ.”

²² Kră Yang khan: “'Nâu, đei minh adrĕch kon pơlei đơ̆ng gah yă-nơ̆m truh, jơ̆ minh adrĕch tih pran, iung blah năm đơ̆ng tôch kơ plei teh.

²³ Lu sư chĕp hră păng tơju, lu sư minh adrĕch kơnê̆ nuih kơtang, ưh kơ đei băt mơnat, jơwa jơ̆ng lu sư yak nhen thoi đak dơsĭ poh-yă; lu sư hao aseh, lu sư săp pơrĕng thoi minh khŭl wă năm blah ih, Ơ kon adruh Siôn.”

²⁴ Lu nhôn kơtơ̆ng ang boih gah lu sư, kơkŏng ti lu nhôn đĭ rơdu; Tơdrong hli gơhret lu nhôn, Jơhngơ̆m lu nhôn jĭ tuĕnh thoi drŏ-kăn wă tơpŭ.

²⁵ “'Nĕ kơ lĕch năm tơ mir chŭn, kư̆m 'nĕ kơ yak rok trong tih, yua kơ lu bơngai ayăt chĕp đao, tơdrong hli krưp tơ jơ̆p puăn pah.

²⁶ Ơ kon drŏ-kăn pơlei Inh, tơ̆n bĕ 'bi tơ kơiĕng, tơglăng akâu tơ lăm tơnuh. Nhơ̆m hmoi bĕ, thoi đe sơ'ngon kơ kon dăm lôch, nhơ̆m hmoi ơh sơ'ngon bĕ, yua kơ lu bơngai wă pơrăm blư bla truh blah lu bơ̆n.”

²⁷ “Inh ăn kơ ih jing bơngai 'buh pơlong mam. Ih pơlong lăng kon pơlei Inh, wă kơ ih băt kơnăl, lăng hơlen trong lu sư.

²⁸ Đĭ-đăng lu sư pơm kơnê̆, chă pơma sơlam băl. Hơrăng kơ̆l nhen thoi mam, thoi kong, lu sư pơm kơnê̆ dêh.

²⁹ Hơtuh tơthu rai dêh, ŭnh pơm kơ bơlơ̆k lek, lu bơngai 'buh dơ̆ng wă kơ rơgoh ưh kơ yua ôh; lu bơngai kơnê̆ oei tam mă tuh hŭt.

³⁰ Đe krao lu sư thoi iă hu đe tŭk, yua kơ Kră Yang achăng lê̆ lu sư boih.”