Je 52 - Sơ̆p Hlabơar Nơ̆r 'Bok Kei-Dei

Ră roi gah: Pơlei Jêrusalem pơchah

¹ Sêđekia pơtơm pơm pơtao kơplah sư 'bar-jĭt mônh sơnăm; sư pơgơ̆r mơjĭt-mônh sơnăm lăm pơlei Jêrusalem. Mĕ sư anăn Hamuta kon drŏ-kăn Jêrêmi đơ̆ng pơlei Lipna.

² Sư pơm kơnê̆ dêh 'bơ̆t anăp Kră Yang thoi Jêhôiakim đei pơm.

³ Noh Kră Yang hil mĭl kơ tơdrong kơnê̆ lu sư pơm tơ pơlei Jêrusalem păng tơ lăm dêh char Juđa, na Sư puh tơweh lu pơtao noh đơ̆ng anăp Sư. Sêđekia iung blah pơtao Babilôn.

⁴ Na năr mơjĭt khei mơjĭt, lăm sơnăm mă tơsĭn chăl Sêđekia pơgơ̆r, Nebukatnessar, pơtao Babilôn, chông ba đĭ linh sư năm blah Jêrusalem, lu sư pơm bơsŭn, lu sư bơ̆ teh wă tŏk wang tăp wă blah iŏk pơlei Jêrusalem.

⁵ Đe wang pơlei Jêrusalem ling-lang dĭng truh sơnăm mă mơjĭt-mônh chăl pơtao Sêđekia pơgơ̆r.

⁶ Truh năr tơsĭn khei puăn lăm sơnăm noh, đei tơdrong pơngot rơwĕt tih lăm pơlei truh tơ kon pơlei oei lăm noh tơmam sa pă đei.

⁷ Dur pơlei đe bŏk bơlih hlôh, Sêđekia 'bôh sư hăm lu linh sư kơdâu klĕnh kơmăng lĕch rok trong 'măng jang sơlam dur jê̆ pơgar pơkao pơtao; kơplah lu bơngai Kalđê oei wang pơlei, lu sư kơdâu lĕch yak klă tơ gah thŭng Arabah.

⁸ Mă-lei lu linh bơngai Kalđê druh pơtao Sêđekia tam rôp sư tơ lăm tơmăn dơnă Jêrikô, na lu linh sư kơdâu tơklah tơklang achăng lê̆ pơtao hơdrô̆.

⁹ Lu linh bơngai Kalđê rôp pơtao Sêđekia păng năm ba tơ pơtao Babilôn, tơ pơlei Riblah, lăm tơring Hamat, tơ noh pơtao Babilôn sek tơlang sư.

¹⁰ Pơtao Babilôn pơlôch lu kon drŏ-nglo Sêđekia 'bơ̆t tơm măt sư păng kư̆m pơlôch lu yŏng pơgơ̆r char Juđa mă kiơ̆ sư 'bơ̆t pơlei Riblah.

¹¹ Đơ̆ng noh pơtao Babilôn kuek lê̆ 'bar pah măt Sêđekia, chô̆ sư hăm glang kong, chông ba sư tơ Babilôn, tah sư lăm hnam phak dĭng truh năr sư lôch.

¹² Năr mơjĭt khei pơđăm, lăm sơnăm mă mơjĭt-tơsĭn chăl Nebukatnessar, pơtao Babilôn, na Nêbusar Adan, yŏng pơgơ̆r linh gak pơtao Babilôn, mơ̆t lăm pơlei Jêrusalem.

¹³ Sư athei đe soh hnam Kră Yang, hăm hnam pơtao păng đĭ-đăng hnam lăm pơlei Jêrusalem. Mă lu hnam kuan tih oei ŭnh sa đĭ.

¹⁴ Đĭ-đăng lu linh bơngai Kalđê mă năm hơdai yŏng linh gak pơtao, năm pơrăm teh pơchah đĭ dur tăp pơlei Jêrusalem.

¹⁵ Nêbusar Adan yŏng linh gak pơtao chông ba pơm bơnă lu bơngai dơnuh hin lu kon pơlei mă oei arih lăm pơlei Jêrusalem păng bơngai kơdâu mơ̆t tơ gah pơtao Babilôn; păng đĭ lu thơ̆ hơgei oei arih.

¹⁶ Mă-lei Nêbusar Adan, yŏng linh gak, pơtao oei lê̆ lăi lu bơngai dơnuh hin tơ lăm teh đak sư, wă kơ lu sư pơtăm wei-lăng mir hơmu păng jang mir 'ba.

Đe pơrăm hnam akŭm

¹⁷ Linh bơngai Kalđê teh pơrăm đĭ jrăng kong lăm hnam Kră Yang, bơng đak tih đe krao dơsĭ hling păng kong hăm jơ̆ng đei tang-wang wă tŭn sư đơ̆ng lăm hnam Kră Yang, đơ̆ng noh chĕp ba đĭ kong noh tơ char Babilôn.

¹⁸ Lu gŏ, gơ'bênh, săng kep, pơnhan, mong pham chơ'mŏng păng lu tơmam yua nai pơm păng kong yua lăm hnam Kră Yang lu sư kư̆m tung ba đĭ.

¹⁹ Nêbusar Adan yŏng linh kư̆m iŏk lu pơnhan mong pham wă tơtreh, chhĕr dan ngar, kơthao, gŏ, chhĕr dan tơmam 'bâu phu, gơhnŏk wă huch sa tơmam pơyơ̆r, đĭ-đăng tơmam noh đe pơm păng maih rơgoh păng hu rơgoh.

²⁰ Bĕ kơ 'bar tŏ jrăng kong, bơng đak đak dơsĭ păng mơjĭt-'bar tŏ rup rơmo tơno pơm păng kong tơ ala, jơ̆ng dan bơng đei tang-wang wă tŭn mă pơtao Sôlômôn pơm lăm hnam Kră Yang. Kong mă đe pơm đĭ-đăng lu tơmam noh ưh pă kĕ kŏng ôh.

²¹ Jrăng kơjung sư mơjĭt-tơhngam hơgăt, tih hơpôm sư mơjĭt-'bar hơgăt; đei trôm tŏk-bŏk, hơ'bơ̆l sư puăn kơpơ̆t.

²² Đe pơm kơ̆l jrăng păng kong, kơjung pơđăm hơgăt. Tăp dăr sư chuă hơdrao păng hling rup plei gărnăt, đĭ-đăng đe hling păng đak kong ngăl; kơ̆l jrăng mă minh kơ̆l jrăng mă 'bar đe pơm lei-lăi, kư̆m đei hling plei gărnăt.

²³ Tăp dăr puăn pah đei tơsĭn-jĭt tơdrâu tŏ rup plei gărnăt jô̆ đĭ-đăng lu rup plei gărnăt tăp dăr đei minh-hrĕng tŏ rok trong hơdrao đe chuă.

²⁴ Yŏng linh gak pơtao rôp Sêraia 'bok soi tơm, Sephania 'bok soi mă 'bar păng pêng 'nu yŏng wei 'măng jang hnam kơ Kră Yang.

²⁵ Kŭm đei rôp lăm pơlei minh 'nu yŏng linh tơblah, tơpơh 'nu bơngai drŏ-nglo jang pơđâu hơdai pơtao, minh 'nu chih hla bơar kơ yŏng khŭl linh, păng đei tơdrâu-jĭt 'nu kon pơlei Juđa đơ̆ng hai, kư̆m 'bôh lăm pơlei ei.

²⁶ Nêbusar Adan yŏng linh gak pơtao rôp lu bơngai âu păng chông ba lu sư tơ pơtao Babilôn tơ pơlei Riblah.

²⁷ Pơtao Babilôn athei đe pơlôch lu sư tơ pơlei Riblah lăm tơring Hamat. Thoi noh boih đe rôp chông ba lu bơngai Juđa pơm bơnă lăm char đe nai.

Juđa đe rôp pơm bơnă

²⁸ 'Nâu lu kon pơlei mă Nebukatnessar rôp chông ba pơm bơnă; pêng-rơbâu 'bar-jĭt pêng 'nu bơngai Juđa lăm sơnăm mă tơpơh.

²⁹ Lăm sơnăm mă mơjĭt-tơhngam chăl Nebukatnessar pơgơ̆r, sư rôp chông ba pơm bơnă đơ̆ng pơlei Jêrusalem tơhngam-hrĕng pêng-jĭt 'bar 'nu.

³⁰ Sơnăm mă 'bar-jĭt pêng chăl pơtao Nebukatnessar pơgơ̆r, Nêbusar Adan yŏng linh gak pơtao rôp chông ba pơm bơnă tơpơh-hrĕng puăn-jĭt pơđăm 'nu bơngai Juđa, jô̆ đĭ-đăng noh puăn-rơbâu tơdrâu-hrĕng 'nu bơngai.

Pơtao Babilôn tơlĕch Jêhôiachin

³¹ Đơ̆ng rŏng kơ pêng-jĭt tơpơh sơnăm Jêhôiachin pơtao Juđa pơm bơnă, lăm năr 'bar-jĭt pơđăm, khei mơjĭt-'bar Êwil Mêrôđak pơtao Babilôn lăm sơnăm sư 'nao pơgơ̆r, plôh tơlĕch Jêhôiachin pơtao đe Juđa đơ̆ng hnam bơnă.

³² Sư pơma rơngơp hăm Jêhôiachin, pôk sư hơ-oei 'bơ̆t anih pơyom hloh kơ lu pơtao nai oei hơdai hăm sư lăm char Babilôn.

³³ Thoi noh Jêhôiachin plôh lê̆ ao bơnă sư, kơplah sư oei arih sư sŏng sa hơdai ling-lang hăm pơtao.

³⁴ Gah tơmam sư, pơtao ăn kơ sư tôm mah rim năr truh tơ sư lôch. Jêhôiachin oei arih dang yơ, lei pơtao Babilôn ăn tơmam kăl yua ling-lang, dĭng đĭ chăl arih sư.