Je 5 - Sơ̆p Hlabơar Nơ̆r 'Bok Kei-Dei

Tơdrong yoch pơlei Jêrusalem

¹ “Kơdâu chă lăng bĕ jơ̆p kơ trong lăm pơlei tih Jêrusalem Athei chă lăng păng răk lăm đon, Chă lăng tơ jơ̆p anih đe juăt adrŭm. Chă lăng hăm đei minh 'nu bơngai pơm 'lơ̆ng tơpăt, 'maih chă tơdrong 'lơ̆ng, wă kơ Inh mơnat ăn kơ pơlei tih Jêrusalem?

² Mă lu sư khan: Tơpă thoi Kră Yang arih sĭt.” Noh kư̆m pơkă hơlĕnh.

³ Ơ Kră Yang! Hăm trŏ kơ măt Ih chă lăng jơhngơ̆m tơpăt sĭt? Ih teh boih lu sư, lu sư ưh kơ băt jĭ, ih pơrăm lu sư boih, mă-lei lu sư oei kơchu kơ tơdrong Ih teh bơtho noh. Lu sư pơrơ̆ng pơm kơ muh măt lu sư arăng hơrăk thoi tơmo. Lu sư ưh kơ wă tơbral tơdrong yoch.

⁴ Inh tơchĕng khan: “'Nâu lăp lu bơngai dơnuh hin, kơhlôh kơwao đĕch, lu sư ưh kơ băt kơ trong Kră Yang. Khôi juăt Kră Yang 'Bok Kei-Dei lu sư.

⁵ 'Nâu Inh gô năm tơ lu yŏng pơgơ̆r, roi ăn kơ lu sư băt hơđăl. Tơpă lu sư băt trong gơlong Kră Yang, khôi juăt Kră Yang 'Bok Kei-Dei lu sư. Mă-lei lu sư 'nâu gơ̆ lê̆ 'long ăt păng wă hrĕch lê̆ tơlei boih!

⁶ Lei na dăm-brang lĕch đơ̆ng bri năm châu sa lu sư, kŏ-so đơ̆ng char glă gô kăp pơlôch lu sư, djrang oei răp tơ 'nguaih kơ pơlei ti wă châu hek sa lu đe bu mă lĕch tơ 'nguaih pơlei, yua kơ tơdrong yoch lu sư lơ dêh, tơdrong kơnê̆ lu sư lơlap.

⁷ Liơ Inh gơh mơnat lĕ? Kon sâu iĕm achăng lê̆ Inh boih, Lu sư pao anăn lu yang nai, na pơkă mă ưh kơ trŏ kơ yang tơpă. Mă khan Inh 'me rong lu sư phĭ jơnap, mă lu sư rai pơm pơyô kư̆ ka, akŭm băl 'bĕnh lăm hnam bơngai đi.

⁸ Lu sư thoi aseh tơno rong bek chă kiơ̆ akăn đe nai.”

⁹ Kră Yang khan: “Lei na Inh ưh kơ hil kơ lu sư yua kơ tơdrong noh hă? Hăm adrĕch adrung thoi noh na Inh wă ưh kơ pơm tơdrong tơpăt hă?

¹⁰ Năm rok pơgar hơmu koh pơrăm bĕ lu sư, mă-lei 'nĕ kơ kăl pơđĭ, chre hŭt lê̆ lu tơmơ̆ng dơng 'nao bluh, yua kơ lu sư ưh kơ gah Kră Yang ôh.

¹¹ Adrĕch Isơrael păng adrĕch Juđa, oei sa ưh kơ tơpăt hăm Inh ôh,” noh Kră Yang khan,

¹² Lu sư hơlĕnh khan: Kră Yang. Ưh kơ đei pơm kiơ kơ lu bơ̆n ôh, Lu bơ̆n huay kơ 'bôh tơdrong răm truh ôh. Kŭm huay kơ tơ'bơ̆p tơdrong răm kơ đao gưm, pơngot rơwĕt.

¹³ Lu bơngai khan lê̆ adrol hơlĕnh thoi kial. Lu sư ưh pă đei nơ̆r Kră Yang wă khan lê̆ adrol dơ̆ng, tơdrong lu sư pơma lê̆ 'bơm lu sư.”

¹⁴ Yua kơ thoi noh Kră Yang 'Bok Kei-Dei Tih Hloh khan: “Yua kơ lu sư pơma tơdrong noh, 'Nâu, Inh gô tah nơ̆r pơma Inh tơ lăm 'bơ̆r thoi ŭnh, kon pơlei âu thoi 'long ŭnh na ŭnh gô sa lu sư.”

¹⁵ Kră Yang khan: “Ơ adrĕch Isơrael, Inh gô ăn đei minh adrĕch adrung đơ̆ng dêh ataih năm blah iĕm, Adrĕch adrung pran kơtang oei tơ âu đunh boih. Lu iĕm ưh kơ băt ưh kơ hlôh nơ̆r lu sư. Kŭm ưh kơ hlôh lu sư pơma kiơ.

¹⁶ Jŏ lu sư 'bĕnh kơ 'brơ̆m hơkăm thoi đe pơih bơsat; đĭ-đăng lu sư tă kơ pran kơtang ngăl.

¹⁷ Lu sư gô luăn sa phe 'ba lu iĕm, luăn sa lu kon drŏ-nglo drŏ-kăn iĕm, lu sư gô 'buh sa triu păng rơmo lu iĕm. Gô phĕ sa plei hơmu păng plei hơra lu iĕm. Lu sư gô iŏk đao koh pơrăm lu pơlei tih kơjăp mă lu iĕm gơnang hơđơ̆ng.”

¹⁸ Kră Yang khan: “Mă khan lei lăm noh Inh kư̆m huay kơ pơlôch pơrăm đĭ lu iĕm ôh.

¹⁹ ‘Layơ kon pơlei ih jet: Liơ Kră Yang 'Bok Kei-Dei lu bơ̆n pơm kơ lu bơ̆n thoi âu?’ Ih gô tơl lu sư: ‘Lu iĕm đei achăng lê̆ Kră Yang, na bơ̆jang kơ lu yang nai lăm dêh char iĕm thoi yơ, lu iĕm gô bơ̆jang kơ lu yang nai lăm tơring tơmoi mă ưh kơ trŏ kơ char iĕm thoi noh mơ̆n.’

²⁰ Tơbăt bĕ tơdrong 'nâu kơ adrĕch Jakôp. Tơbăt bĕ tơdrong 'nâu tơ lăm char Juđa.

²¹ Mơ̆ng bĕ tơdrong 'nâu, ơ kon pơlei bơlŭk păng kơhlôh kơwao. Đei măt ră mă-lei ưh kơ 'bôh, đei đon ră mă-lei ưh kơtơ̆ng.

²² Kră Yang khan: “Hăm trŏ lu iĕm athei hli kơ Inh hă? Hăm trŏ lu iĕm athei tơtơ̆ tơrơ 'bơ̆t anăp Inh? Inh boih Tơ'ngla iŏk chuơh bơ̆ găn hơdral đak dơsĭ, Pơm bơnơ̆ hơdral ling-lang, Đak dơsĭ ưh kơ kĕ lĕch ro hlôi, Poh-yă tih tŭn kư̆m ưh kơ kĕ pơchah. Mă khan lu sư blŭng kư̆m ưh kơ kĕ klĕch hlôi.

²³ Mă-lei kon pơlei âu arăng kơ̆l păng đei jơhngơ̆m 'maih tơblah; lu sư tơklah trong pha, na weh kiơ̆ kơdih.

²⁴ Lu sư ưh kơ đei khan ôh lăm jơhngơ̆m lu sư: ‘Lu bơ̆n athei hli yom kơ Kră Yang 'Bok Kei-Dei bơ̆n, Tơ'ngla mă ăn đak 'mi trŏ kơ bơyan sư. Bơyan 'mi păng bơyan puih, Ăn kơ bơ̆n kư̆m oei bơwei năr giĕng lăm bơyan kĕch yuă.’

²⁵ Tơdrong kơnê̆ lu iĕm pơm boih kơ lu iĕm pă đei tơdrong âu; Tơdrong yoch lu iĕm găn boih tơdrong pŭn hiôk 'mi prăng truh tơ lu iĕm.

²⁶ Đei lu bơngai kơnê̆ oei hơdai lăm lu kon pơlei Inh, lu sư thoi bơngai răp dăng hơnhuăl kơ sem, lu sư đăk hơđong wă rôp bơngai.

²⁷ Hnam lu sư 'bĕnh kơ tơmam hơlĕnh, kư̆m thoi hơdrŭng 'bĕnh kơ sem. Thoi noh na lu sư jing mơdrŏng tih, kĕ pran.

²⁸ Lu sư bek plên, bơbling bơblang. Lu sư pơm kơnê̆ dêh ưh kơ tôch ôh; lu sư sek tơlang ưh kơ dŏng lu kon mơti, lu sư ưh kơ sek tơpăt ôh kơ lu bơngai dơnuh hin.”

²⁹ Kră Yang khan: “Lei na Inh ưh kơ sek tơlang phak lu sư kơ tơdrong noh hă? Hăm kon pơlei thoi noh lei na Inh ưh kơ sek tơpăt hă?

³⁰ Đei minh tơdrong hlĭch păng kơnê̆ dêh truh boih tơ lăm char âu.

³¹ Lu bơngai khan lê̆ adrol pơma hơlĕnh, lu 'bok soi pơgơ̆r kiơ̆ thoi lu sư gơh kơdih, lu kon pơlei Inh lăp dêh kơ tơdrong thoi noh. Mă-lei truh năr tôch kơnh lu iĕm gô pơm thoi yơ?”