Je 49 - Sơ̆p Hlabơar Nơ̆r 'Bok Kei-Dei

Khan lê̆ adrol gah dêh char Ammôn

¹ Gah dêh char Ammôn! Kră Yang khan: “Bơngai Isơrael ưh kơ đei kon drŏ-nglo hă? Ưh pă đei kon wă pơtrơp ioi hă? Liơ mă lê̆ kơ bơngai Amnôn mă kơkuh kơ yang Molek tơgar iŏk char Gat, kon pơlei sư oei lăm lu pơlei Gat?

² Mă-lei năr gô truh, Kră Yang khan; “Inh gô ăn nơ̆r ôr krao tơdrong tơblah tơ pơlei tih Rapba lăm char kon pơlei Ammôn; pơlei noh gô jing pôi rơ̆m rĕk. Lu pơlei iĕ tăp dăr kơ sư đe gô soh kơplah noh, lu bơngai Isơrael gô druh blah lu linh mă đêl druh blah lu sư, Noh Kră Yang khan.

³ “Nhơ̆m hmoi bĕ! Ơ pơlei Hesbôn, yua kơ đe pơrăm boih pơlei Ahi! Nhơ̆m bĕ, ơ kon pơlei Rapba! Ôr krao bĕ, hrŭk bĕ ao 'bi, tŭr kơtơh, raih akâu bĕ na kơdâu tơ âu tơ noh! Yua kơ yang Molek gô chĕp ba, hơdai hăm lu 'bok soi, hăm lu yŏng sư, năm pơm bơnă đe.

⁴ Ơ kon pơlei ưh kơ tơpăt, liơ lu iĕm pơư kơdih anih thŭng, khan teh mơ̆r 'lơ̆ng? Gơnang kơ mŭk tơmam kơdih păng khan: ‘Bu pơ̆n pơm kơ inh?’ ”

⁵ Kră Yang Tih Hloh khan: “Inh gô tuh ăn tơdrong kơnê̆ hli krưp truh tơ lu iĕm, đơ̆ng rim dêh char mă oei tăp dăr, lu iĕm gô kơdâu tơklah tơklang, ưh kơ đei bu gô akŭm lu bơngai mă kơdâu ôn,

⁶ mă-lei dơning dơmônh Inh gô iŏk tơwih lu kon sâu Ammôn brŏk đơ̆ng pơm đĭch, bơnă đe. Noh Kră Yang khan.

Khan lê̆ adrol gah dêh char Êđôm

⁷ Gah dêh char Eđôm: 'Nâu Kră Yang Tih Hloh khan: “Lăm pơlei Têman ưh pă đei bơngai gơh hơgei boih hă? Lu bơngai gơh hơgei ưh pă đei đon pơđâu boih hă? Tơdrong hơgei sư hiong đĭ boih hă?

⁸ Ơ kon pơlei oei lăm plei Đêdan! Bơkuĕch kơdâu bĕ, oei bĕ tơ lăm trôm kông jrŭ; Inh wă ăn tơdrong truh pơrăm Êsâu. Lăm năr Inh phak sư.

⁹ Lu bơngai phĕ hơmu truh tơ mir iĕm, hăm trŏ lu sư phĕ oei lê̆ plei tŏ sĕt ưh? Lu bơngai phĕ tơtông kơmăng, hăm trŏ lu sư phĕ tơtông lăp mah kơ lu sư đĕch?

¹⁰ Mă-lei Inh gô iŏk đĭ mŭk tơmam Êsâu, Inh pơih pơdah đĭ boih anih lu sư ôn, na kơ lu sư ưh pă gơh ôn đơ̆ng. Đe pơrăm pơlôch đĭ boih lu kon sâu sư, 'nhŏng oh sư, lu bơngai rông 'bôt sư, lu sư ưh pă đei bu oei arih. Ưh kơ đei bu chro ti dŏng tơgŭma

¹¹ Lê̆ bĕ lu kon mơti iĕm kơ inh; Inh gô wei rong lu sư; Lu drŏ-kăn adro kư̆m gơh lui gơnang kơ inh.’ ”

¹² Kră Yang khan: Tơdah lu bơngai mă ưh kơ trŏ huch pơnhan 'nâu, athei huch; lei liơ ih hăm gơh klaih đơ̆ng phak ưh? Ih ưh kơ gơh klaih ôh đơ̆ng tơdrong phak. Sĭt tơpă ih gô huch pơnhan 'nâu.”

¹³ Kră Yang khan: “Inh pơkă hăm anăn Inh kơdih, pơlei Bôsra gô jing rơ̆m rĕk, đe lăng 'brơ̆ krưp, đe hiĕk ăr, blei hiap păng pŭ hơngiap, lu pơlei sư gô jing rơ̆m rĕk, pơchah răm ling-lang hloi.”

¹⁴ Tơdrong inh 'nao kơtơ̆ng đơ̆ng Kră Yang, Sư ăn boih minh 'nu bơngai năm roi tơbăt tơ jơ̆p kơ teh đak: “Akŭm băl bĕ wă blah sư, iung hơmet năm tơblah bĕ!

¹⁵ 'Nâu, Inh gô pơm kơ ih jing iĕ tơrăn hloh kơ lu dêh char, păng đe gơ̆ pơjăm.

¹⁶ Ih pơm kơ đe hli tơrơ, tơdrong kơnê̆ ih, tơdrong ih pơang blơ̆ ih boih; ơ bơngai mă oei lăm hơgơp tơmo. Oei kơpal wĕch kông; mă khan ih pơm tơpu kơjung thoi sem klang.” Inh gô tơhuŏng ih đơ̆ng noh, Noh Kră Yang khan.

¹⁷ Pơlei Eđôm gô jing rơ̆m rĕk; rim 'nu yak trong 'nâu tă kơ jăng krưp. Yua kơ 'bôh tơdrong truh tih krưp tơpă.

¹⁸ Kră Yang khan: “Êđôm đe kư̆m gô pơrăm thoi pơlei Sôđôm Gômôrơ, păng lu pơlei tăp dăr. Gô ưh pă đei bơngai bu oei lăm noh, kư̆m ưh kơ đei bu chă oei pơdơh tơ noh mơ̆n.

¹⁹ 'Nâu, thoi dăm-brang đơ̆ng bri brah Krong Jôrđăn năm mơ̆t lăm tơmăn 'nhĕt hơdrih 'lơ̆ng, Inh gô puh hloi lu bơngai Êđôm, Inh gô ăn yŏng pơgơ̆r sư kiơ̆ kơ Inh rơih iŏk, Bu thoi Inh? Bu pơ̆n athei Inh? Bơngai wei triu bu pơ̆n blah Inh?

²⁰ Thoi noh mơ̆ng bĕ Kră Yang wă pơm kơ char Eđôm, păng tơdrong sư pơkă wă pơm kơ kon pơlei Têman: Mă lu kon triu oei iĕ đe gô rôp ba pơđĭ, Tơpă sư gô pơrăm lê̆ tơmăn 'nhĕt lu sư.

²¹ Tơdah kơtơ̆ng lu sư pơchah răm, lăm teh đak pơpơ̆; kơtơ̆ng nơ̆r ôr krao truh tơ Dơsĭ 'Brê.

²² 'Nâu, lu ayăt thoi sem klang păr jruh, Bơyar pơnăr sư pơm kơ pơlei Bôsra, Lăm năr noh jơhngơ̆m lu drŏ-nglo nuih pran char Eđôm nhen thoi jơhngơ̆m bơngai drŏ-kăn oei tŏk-bŏk hơiơch.”

Khan lê̆ adrol gah pơlei Đamas

²³ Khan lê̆ adrol gah pơlei Đamas: Pơlei Hamat păng pơlei Arpat hli tơrơ; yua kơ lu sư 'nao kơtơ̆ng tơdrong kơnê̆; lu sư tơtăm hơwơ̆l hơwang, thoi đak dơsĭ poh-yă.

²⁴ Pơlei Đamas jơhngơ̆m rơdu boih, kơdŭn kơdâu ôn; hli tơrơ. Jĭ tuĕnh, thoi drŏ-kăn tŏk-bŏk oei hơiơch.

²⁵ Ô pơlei đe ư-ang, pơlei tih hiôk chơt Đê̆ hiơt đĭ boih

²⁶ Kră Yang Tih Hloh khan: “Thoi ei, na lu kon tơdăm iĕm gô pơ̆k lôch rok trong tih lăm pơlei lăm năr noh. Păng đĭ-đăng lu linh iĕm gô pơ̆k pă đei pơpơ̆,

²⁷ Inh gô iŏk ŭnh soh dur pơlei Đamas, Ŭnh gô sa truh tơ hnam kơjăp pơtao Ben Hadat.

Khan lê̆ adrol gah tơring Kêdar păng kon pơlei Hasôr

²⁸ Gah lu bơngai Kêdar păng kon pơlei tơring char Hasor mă Nebukatnessar pơtao Babilôn blah iŏk boih. 'Nâu Kră Yang khan: “Iung bĕ, năm blah lu bơngai Kêdar, Pơrăm lu kon pơlei gah hơlĕch.

²⁹ Đe gô iŏk đĭ bơsŭn păng puh ba lu kon sem dơrong lu sư, pơk hnam păng đĭ-đăng mŭk tơmam lu sư. Đe gô puh ba đĭ lu aseh lăk-đa lu sư. Lu bơngai drŏ-nglo ôr krao. ‘Đei tơdrong hli krưp tăp tang!’

³⁰ Kră Yang khan: “Ơ lu kon pơlei oei lăm tơring char Hasor, kơdâu ôn bĕ, kơdâu mă ataih: Oei bĕ lăm trôm kông jrŭ. Nebukatnessar pơtao Babilôn hơmet wă tơblah păng iĕm bơih; lu sư pơkă wă pơrăm lu iĕm.”

³¹ Kră Yang khan: “Iung blah bĕ, kon pơlei mă oei hiôk-hian, kon pơlei noh ưh kơ đei 'măng jang, păng kư̆m ưh kơ đei 'long chơkăl păng oei adrô̆.

³² Plah tơgar iŏk, lu lăk-đa lu sư đe gô Kŭm plah tơgar iŏk lơ sem dơrong, triu lu sư. Inh gô pơm ăn kơ lu bơngai hơkôih sŏk kơ̆l, tơklah tơklang tơ jơ̆p-jang puăn pah teh đak. Inh gô ăn tơdrong truh pơrăm lu sư, đơ̆ng tăp dăr kơ lu sư. Noh Kră Yang khan.

³³ “Tơring char Hasor jing anih ăn kơ kŏ bri oei ling-lang, Jing juơ tơtŭng hlŏng hloi. Ưh kơ đei bu oei tơ noh, ưh pă đei bơngai bu dơ̆ng pơm anih oei tơ noh!

Khan lê̆ adrol gah dêh char Êlam

³⁴ Kră Yang khan kơ Jêrêmi bơngai khan lê̆ adrol gah dêh char Êlam, kơplah Sêđekia pơm pơtao pơgơ̆r dêh Juđa.

³⁵ Kră Yang Tih Hloh khan: “'Nâu, Inh gô gơ̆ lê̆ hră char Êlam, 'Nâu boih mă tơdrong pran kơtang tơm lu sư.

³⁶ Inh gô ăn đei puăn trong kial đơ̆ng puăn pah bah blah char Êlam; Inh gô săi lu sư tơklah tơklang kiơ̆ kơ puăn trong kial noh; dĭng ưh pă đei char ayơ mă ưh kơ đei bơngai Êlam năm oei.

³⁷ Inh gô pơm kơ bơngai Êlam hli tơrơ 'bơ̆t anăp lu ayăt kơ sư, 'bơ̆t anăp lu bơngai wă pơlôch lu sư.” Kră Yang khan: “Inh gô ăn tơdrong răm truh, ăn tơdrong Inh hil mĭl tơtŏ, tuh tơ kơpal lu sư; Inh gô ăn đao gưm druh lu sư, dĭng truh tơ Inh pơlôch pơrăm lu sư.”

³⁸ Kră Yang khan: “Inh gô pơdơ̆ng tang-dŏ pơtao Inh lăm Êlam. Pơrăm pơlôch lu pơtao păng lu yŏng pơgơ̆r sư.

³⁹ Mă-lei lăm chăl đơ̆ng rŏng, inh gô tơiung lu bơngai Êlam wih brŏk đơ̆ng pơm bơnă. Noh Kră Yang khan.