Je 48 - Sơ̆p Hlabơar Nơ̆r 'Bok Kei-Dei

Khan lê̆ adrol gah dêh char Môap

¹ Gah dêh char Môap. 'Nâu Kră Yang Tih Hloh, 'Bok Kei-Dei Isơrael, khan: “Mơnat tơpă kơ pơlei Nêbô, đe gô pơrăm sư! Pơlei Kiriathaim mơlâu tơpă đe gô rôp blah iŏk. Pơlei kơjăp gô mơlâu dêh pơchah răm đĭ.

² Đe ang kơ char Môap ưh pă đei boih; tơ pơlei Hesbôn, lu sư pơđâu wă pơrăm Môap: ‘Bĕ bơ̆n năm pơrăm kon pơlei 'nâu, sŭt lê̆ dĭng pă đei jô̆ Môap lăm lu dêh char dơ̆ng! Ơ pơlei Matmen, ih kư̆m lei-lăi, ăn kơ ih ngăn hreh; đao gưm gô druh kiơ̆ ih.

³ Mơ̆ng bĕ nơ̆r đe ôr đơ̆ng pơlei Hôrônaim: ‘Tơdrong đe pơrăm tih jing juơ rơhiăng!’

⁴ Char Môap đe gô pơrăm. Đe kơtơ̆ng nơ̆r hmoi ôr tơ pơlei Soar!

⁵ Rok trong suăn tŏk tơ pơlei Luhit, lu sư tŏk nhơ̆m hmoi rah; jur tơ krang năm tơ pơlei Hôrônaim, kơtơ̆ng đe nhơ̆m hmoi kơ tơdrong pơrăm.

⁶ Kơdâu ôn bĕ, pơklaih kơdih akâu, thoi aseh iĕ lăm char glă!

⁷ Yua kơ ih gơnang kơ tơdrong jang păng mŭk tơmam lu iĕm kơdih, Đe kư̆m wă rôp ih hai pơm bơnă, Yang Kêmôs, lu 'bok soi păng lu yŏng lu sư dai năm pơm bơnă.

⁸ Lu bơngai chă pơrăm năm tơ jơ̆p pơlei, ưh kơ đei minh pôm pơlei ayơ gơh klaih; đe gô pơrăm tơ kơpal dơnă goh 'biao, kơpal groi kông kư̆m pơchah pơchek. Thoi nơ̆r Kră Yang đei khan boih.

⁹ Prôi bĕ 'boh kơ char Môap yua kơ sư gô răm đĭ; lu pơlei gô juơ rơhiăng, ưh pă đei bơngai oei.

¹⁰ Hiap bĕ lu bơngai jang kơ Kră Yang mă hơlĕnh pơdăr. Hiap bĕ lu bơngai ưh kơ yua đao gưm sư pơlôch đe!

¹¹ Môap juăt kơ oei arih hiôk-hian đơ̆ng sơ̆, thoi sik hơmu oei lăm ge, đe ưh tam đei tuh ôh sư đơ̆ng ge 'nâu tơ ge nai; kư̆m tam đei pơm bơnă; lei na hơkăm sư oei hơnơ̆ng huay kơ sap. Thoi sik hơmu 'bâu phu sư ưh kơ tơplih ôh.”

¹² Kră Yang khan: “Gô đei năr Inh gô wơh bơngai năm tuh lê̆ lu sư dĭng đĭ, na iŏk teh pơchah lê̆ ge noh.

¹³ Bơngai Môap gô mơlâu kơ yang Kêmôs, kư̆m thoi adrĕch bơngai Isơrael mơlâu boih kơ yang Bethel mă lu sư gơnang.

¹⁴ Liơ ih pơ̆n pơang khan: ‘Nhôn lu linh nuih păng lu linh pran kơtang lăm anih tơblah?’

¹⁵ Môap đe gô năm pơrăm đĭ păng lu pơlei; lu bơngai tơdăm hơgei hloh đe gô pơlôch đĭ, 'Bok pơtao anăn Sư Kră Yang Tih Hloh khan.

¹⁶ Tơdrong pơrăm char Môap wă jê̆ boih; tơdrong pơmat-tat truh tĕnh.

¹⁷ Nhơ̆m hmoi bĕ kơ sư, ơ lu dêh char oei tăp dăr kơ sư, đĭ-đăng bơngai kơtơ̆ng ang anăn sư; khan bĕ; liơ 'long jra pơtao pran kơtang tơgơ̆ boih, 'long jra mă đe ư-ang noh tơgơ̆ răm!

¹⁸ Ơ kon pơlei Dibôn; Jur bĕ đơ̆ng anih ư-ang ih, na hơ-oei tơ teh hrĕng kro. Bơngai pơrăm char Môap gô truh wă pơrăm ih, pơrăm kơđông kơjăp ih.

¹⁹ Ơ kon pơlei Arôe, Răp ngôi lăng bĕ 'bơ̆t cheng trong. Jet bĕ bơngai drŏ-nglo bơngai drŏ-kăn kơdâu hlôi: ‘Đei tơdrong kiơ truh?’

²⁰ Đe hiĕk ăr kơ char Môap, yua kơ sư pơchah boih. Ôr hmoi bĕ! Roi tơbăt bĕ tơ jơ̆p tơring krong Arnôn, char Môap pơrăm đĭ boih.

²¹ Tơdrong phak truh boih tơ teh dơnă char groi kông: Tơ pơlei Hôlôn, pơlei Jasa, pơlei Mêphaat.

²² Pơlei Dibôn, pơlei Nêbô păng pơlei Bet Diblathaim.

²³ Pơlei Kiriathaim, pơlei Bet Gamul păng pơlei Bet Mêôn,

²⁴ Pơlei Kêriôt, pơlei Bôsra: Đĭ-đăng pơlei tih lăm char Môap jê̆ dah ataih.”

²⁵ Kră Yang khan: “Hơke Môap chơ̆ng lê̆ boih, kơkŏng ti sư tơgơ̆ boih.

²⁶ Pơhuch bĕ kơ lu sư dĭng suai, yua kơ pôk hơtŏk lu sư kơdih wă blah Kră Yang. Môap gô tơgrŏl lăm hăk lu sư kơdih, đe gô hiĕk ăr kơ lu sư.

²⁷ Hăm trŏ lu iĕm sơ̆ kư̆m hiĕk ăr kơ Isơrael? Tam đei đe tơ'bơ̆p rôp Isơrael hơdai hăm lu bơngai tơtông ưh? Lei liơ mah mưh iĕm pơma 'bơm sư iĕm tơtreh kơ̆l che bơle?

²⁸ Ơ kon pơlei oei lăm char Môap, weh bĕ đơ̆ng pơlei tih, năm oei tơ lăm hơgơp tơmo thoi sem pơgâm 'nơ̆m pơm tơpu lăm trôm kông.

²⁹ Lu nhôn kơtơ̆ng boih char Môap pơang dêh, pơrŏ dêh pơm khuơ̆ 'mơng, pơang pơrŏ, pôk kơdih akâu,”

³⁰ Kră Yang khan: “Inh băt kơ tơdrong kơchu sư, pơang tơdrong kơ đei. Tơdrong sư pơm ưh kơ đei yua kiơ.

³¹ Thoi noh Inh gô nhơ̆m hmoi kơ char Môap, Inh nhơ̆m ôr yua kơ kon pơlei Môap. Inh nhơ̆m hơdrĭ ơh sơ'ngon kơ kon pơlei Kir Hareset.

³² Ơ tơm hơmu Sipma! Inh nhơ̆m hmoi kơ ih hloh kơ inh đei nhơ̆m hmoi pơlei Jaser. Dơng ih prơng ataih truh tơ dơsĭ. Dĭng truh tơ pơlei Jaser; bơngai năm pơrăm plei 'long bơyan phang păng plei hơmu ih đum lăm bơyan.

³³ Tơdrong chơt hiôk 'nă hal đơ̆ng lăm mir chŭn ưh pă đei boih lăm char Môap. Inh pơhrơ̆ lê̆ đak sik plei hơmu đơ̆ng lăm anih đe hmĕt. Ưh pă đei bu hiĕk chơt hmĕt plei hơmu dơ̆ng: Tơdrong lu sư hiĕk chơt hiôk ưh pă đei hiôk chơt boih.

³⁴ Hmoi ôr đơ̆ng pơlei Hesbôn kơtơ̆ng truh tơ pơlei Êlêaleh păng pơlei Jahas, đơ̆ng pơlei Soar dĭng truh tơ pơlei Hôrônaim păng pơlei Êglat Sêlisia. Mă đak glung Nimrim kư̆m hrơ̆ boih.”

³⁵ Kră Yang khan: “Inh gô pơtôch lê̆ lăm char Môap lu bơngai pơyơ̆r tơmam soi pơm yang tơ anih kơjung, păng soh nhang 'bâu phu kơ rup yang.

³⁶ Thoi noh, jơhngơ̆m Inh hmoi ôr re thoi 'lal yua kơ char Môap; Inh kư̆m hmoi ôr re thoi 'lal kơ lu kon pơlei Kir Hareset, mŭk tơmam lu sư mong răk hiong đĭ boih.

³⁷ Rim 'nu hơkôih boih kơ̆l 'ngôch, hơkôih boih sŏk kang, raih chrek ti rơka, tơ̆n ao 'bi tơ kơiĕng.

³⁸ Tơ rim bơbŭng hnam, păng tơ anih đe juăt akŭm lăm pơlei, tă kơ nhơ̆m hmoi ngăl lăm char Môap Inh teh pơchah boih char Môap, thoi ge ưh kơ đei bu wă,” Kră Yang khan:

³⁹ “To, Môap pơchah pơchek boih! Lu sư nhơ̆m hmoi ơh ol! Môap tơwih rŏng mơlâu dêh tơpă boih! Lei na char Môap pơm kơ đe hiĕk ăr, pơm kơ đĭ lu dêh char tăp dăr kơ sư lăng 'brơ̆ krưp dêh.”

⁴⁰ Kră Yang khan: “To, minh 'nu ayăt gô păr jruh thoi klang, bơyar pơnăr sư pơm kơ char Môap.

⁴¹ Pơlei Kêriôt đe gô blah iŏk, lu kơđông kơjăp đe iŏk; lăm năr noh lu linh nuih kơtang char Môap jơhngơ̆m lu sư thoi drŏ-kăn hơiơch.

⁴² Char Môap đe gô pơrăm, sư ưh pă jing kon pơlei pơla dơ̆ng; yua kơ lu sư pơang pôk hơtŏk lu sư kơdih blah Kră Yang.”

⁴³ Kră Yang khan: “Ơ kon pơlei Môap! Tơdrong kơnê̆ hli krưp sơlŭng jrŭ, hơđong đăk lê̆ 'bơ̆t anăp ih.

⁴⁴ Bơngai bu kơdâu hlôi đơ̆ng tơdrong kơnê̆ hli dêh gô huŏng lăm sơlŭng jrŭ. Bơngai bu tŏk hlôi đơ̆ng sơlŭng jrŭ gô 'leh hơđong, yua kơ Inh wă ăn tơdrong noh kơ char Môap, lăm sơnăm Inh phak lu sư.” Noh Kră Yang khan.

⁴⁵ Lu bơngai kơdâu klĕnh lap rơmơ̆n lu sư ôn pơdơh lăm yơ̆p pơlei Hesbôn; ưh pă đei bu gơh tơgŭm yua kơ đei ŭnh sa lĕch đơ̆ng pơlei Hesbôn, pla ŭnh đơ̆ng hnam pơtao Sihôn; ŭnh noh soh pơrăm đĭ char Môap, păng sa kơting kơ̆l lu bơngai jreo tơkĕch kơ chu, pơang dih kâu.

⁴⁶ Ơ char Môap, răm-'băm kơ ih! Kon pơlei kơkuh kơ yang Kêmôs pơlôch tơhiong đĭ boih, lu kon drŏ-nglo ih đe rôp chông ba, kon drŏ-kăn ih đe rôp pơm bơnă boih.

⁴⁷ Mă-lei truh năr hơtuch kơnh Inh gô pơdrâu iŏk lu bơngai bơnă char Môap brŏk,” Kră Yang khan thoi noh. Nơ̆r khan lê̆ adrol kơ bơngai Môap tôch đĭ 'bơ̆t dâu.