Je 47 - Sơ̆p Hlabơar Nơ̆r 'Bok Kei-Dei

Khan lê̆ adrol gah dêh char Philistin

¹ 'Nâu nơ̆r Kră Yang khan kơ Jêrêmi bơngai khan lê̆ adrol gah bơngai Philistin adrol kơ Pharaôn wă blah Gasa.

² 'Nâu Kră Yang khan: Đak tŏk đơ̆ng gah yă-nơ̆m, jing thoi đak krong ro, lơ̆p jơ̆p kơ dêh char păng đĭ-đăng tơmam lăm teh, lơ̆p lu pơlei păng lơ̆p đĭ kon pơlei oei lăm noh, kon pơlei gô ôr krao, đĭ kon pơlei lăm dêh char gô nhơ̆m hmoi,

³ Lăp kơtơ̆ng jơ̆ng aseh kơdâu re mơdrâp mơdrăp, Gre aseh lu ayăt jơwa ơ-ŭr ơ-ăr, Jơ̆ng gre aseh re dơdĭng dơdăng. Mĕ 'bă pă wêr kon sâu lu sư, lu sư jơ̆ng ti lu sư tơtơ̆ tơtuei tơtuônh.

⁴ Yua kơ năr truh boih, wă pơrăm đĭ-đăng bơngai Philistin, wă pơrăm pơlôch lu bơngai mă oei oei. Ưh kơ gơh tơgŭm kon pơlei Tirơ, păng kon pơlei Siđôn. Kră Yang gô pơlôch pơrăm bơngai Philistin lu bơngai mă oei oei lăm bŏl đak Kaptôr.

⁵ Kon pơlei Gasa sơ'ngon gô hơkôih sŏk kơ̆l; kon pơlei Askalon ngăn đĭ, Ơ lu kon pơlei Anakim mă oei oei lăm tơmăn dơnă, lu iĕm wă raih chrek akâu iĕm dĭng dang yơ?

⁶ Ơ đao gưm Kră Yang, dang yơ e wă pơdơh? Dui tơmơ̆t bĕ lăm hơnglop; pơdơh, oei hơđơ̆ng bĕ.

⁷ Mă-lei liơ sư gơh pơdơh. Mưh Kră Yang athei boih. Mưh Kră Yang jao kơ sư athei phak Askalon păng lu pơlei oei cheng đak dơsĭ?”