Je 46 - Sơ̆p Hlabơar Nơ̆r 'Bok Kei-Dei

Khan lê̆ adrol gah Êyiptơ

¹ 'Nâu nơ̆r Kră Yang khan kơ Jêrêmi bơngai khan lê̆ adrol roi gah lu dêh char.

² Gah dêh Êyiptơ: Nơ̆r roi gah lu linh Pharaôn Nekô pơtao dêh Êyiptơ, oei cheng Krong Ơphrat tơ pơlei Karchêmis; lu linh mă đơ̆ng tơblah thuơ kơ Nebukatnessar, pơtao Babilôn, lăm sơnăm mă puăn chăl Jêhôiakim, kon drŏ-nglo Jôsia, pơm pơtao đe Juđa.

³ “Hơmet bĕ khêl tih iĕ, năm tơblah!

⁴ Ơ lu linh hao aseh, tah bĕ an, hao bĕ! Yơ̆l bĕ môk bơsei, năm săp pơrĕng; pat bĕ tơju, hrŭk ao mam!

⁵ Liơ inh 'bôh? Lu sư hli tơrơ kơdŭn đĭ tơ rŏng, lu linh tơblah, thuơ kơdâu tơklah tơklang. Pă pơ̆n hue-huo. Tơdrong hli krưp puăn pah!” Noh Kră Yang khan:

⁶ Lu bơngai hơbĕch hơbal kư̆m kơdâu ôn ưh kơ tam, Lu bơngai pran kơtang kư̆m ưh kơ gơh klaih. Lăm char gah yă-nơ̆m, jê̆ Krong Ơphrat, Lu sư kơtơih pơ̆k!

⁷ Bơngai bu noh, tŏk hơlôk thoi đak Krong Nil, thoi đak krong tih ro hơlôk hơlak?

⁸ Noh dêh char Êyiptơ tŏk hơlôk thoi đak Krong Nil, thoi đak krong tih ro hơlôk hơlak. Êyiptơ khan: Inh gô tŏk lơ̆p đĭ teh đak; ‘Inh gô pơrăm đĭ lu pơlei păng kon pơlei lăm noh.’

⁹ Drong tơ anăp bĕ, ơ aseh! Puh mă tĕnh bĕ ơ lu bơngai hao gre aseh! Lu linh năm tơblah yak năm tơ anăp: Lu linh char Êthiôpi păng lu linh char Phut chĕp khêl. Lu linh char Liđi prah hră đam.

¹⁰ Mă-lei năr noh năr Kră Yang; năr Kră Yang Tih Hloh pơm 'mong kơ lu bơngai mă ayăt kơ Sư. Đao gưm đe yua koh pơlôch dĭng hrăp huch pham dĭng klaih rơhing; Yua kơ noh Kră Yang Kră Yang Tih Hloh. Pơm giĕng soi pơyơ̆r Tơ lăm char gah yă-nơ̆m cheng Krong Ơphrat.

¹¹ Ơ adruh hơlai kon adruh Êyiptơ, Năm tŏk bĕ tơ char Gileat iŏk đak pơgang pik; mă ih yua lơ pơgang kư̆m; ưh kơ klaih! Rơka ih hơkar kư̆m ưh kơ tơsir.

¹² Đĭ-đăng dêh char nai gô kơtơ̆ng ang lu iĕm đei tơdrong mơlâu. Tơ lăm jơ̆p-jang kơ teh đak gô kơtơ̆ng ang tơdrong lu iĕm ôr krao dŏng; linh âu kơtơih kơ linh nai. Bre sư gô pơ̆k pơđĭ.”

¹³ 'Nâu nơ̆r Kră Yang khan kơ Jêrêmi bơngai khan lê̆ adrol kơ tơdrong Nebukatnessar pơtao Babilôn wă năm blah dêh char Êyiptơ:

¹⁴ Roi tơbăt bĕ lăm dêh char Êyiptơ, khan bĕ kơ pơlei Mikdôl, pơlei Memphis păng Tahpanhes: ‘Hơmet kơchăng bĕ kơ tơdrong tơblah, đao gưm koh pơlôch puăn pah wang tăp kơ iĕm.’

¹⁵ Liơ yang Apis mă pran kơtang ih kơdâu boih? Yang rơmo tơno ih ưh kơ kĕ kơ dơ̆ng, yua kơ Kră Yang tơlơ̆ lê̆ sư.

¹⁶ Lu sư gô kơtơih pơ̆k. Lu sư gô pơ̆k hơtŭt tơduă lu sư. Lu sư khan: ‘Iung wih brŏk bĕ tơ adrĕch adrung lu bơ̆n, tơ char mă mĕ tơpŭ kơ bơ̆n, weh đơ̆ng đao gưm đe pơjuă pơđep!’

¹⁷ Tơ noh lu sư gô krao: ‘Pharaôn pơtao Êyiptơ lăp pơma re đĕch. Sư hiong boih tơdrong gơh jei sư.’ ” Sĭt tơpă thoi

¹⁸ “Inh arih.” Pơtao, anăn Sư Kră Yang Tih Hloh, khan: “Minh 'nu gô truh thoi Kông Tabôr tŏk-bŏk lu kông nai, thoi Kông Karmel cheng dơsĭ.

¹⁹ Hơmet bĕ lu tơmam yua năm pơm bơnă. Ơ lu bơngai oei lăm dêh char Êyiptơ, Yua kơ pơlei Memphis gô jing juơ; đe gô soh pơrăm, ưh pă đei bơngai oei.

²⁰ Êyiptơ thoi rơmo adruh 'lơ̆ng hơiă, Mă-lei gô đei minh khŭl jop blư bla truh đơ̆ng gah yă-nơ̆m kăp sư.

²¹ Mă lu linh sư mưng oei hơdai sư, thoi kon rơmo bek 'lơ̆ng, kư̆m kơdâu tơklah ưh kơ kĕ dơ̆ng ôh. Yua kơ tơdrong răm truh tơ lu sư, trŏ năr phak lu sư boih.

²² Lu sư kơdâu re thoi 'bih hro; yua kơ lu linh ayăt kơ sư truh pran kơtang, chĕp sung năm blah sư, thoi bơngai kăl 'long.

²³ Lu linh ayăt gô năm kăl 'long bri sư,” Kră Yang khan: “Mă khan bri kơdrơ̆ng să. Lu sư lơ thoi lep 'ba, ưh pă kĕ jô̆.

²⁴ Lu adruh bơngai Êyiptơ gô mơlâu, Đe gô jao lăm ti kon pơlei gah yă-nơ̆m.”

²⁵ Kră Yang Tih Hloh, 'Bok Kei-Dei Isơrael khan: “'Nâu Inh gô phak yang Ammôn, tơ pơlei Thêbes, pơtao Pharaôn, dêh char Êyiptơ păng lu rup yang, lu pơtao sư păng lu bơngai mă gơnang kơ Pharaôn.

²⁶ Inh gô jao lu sư lăm ti lu bơngai 'maih chă pơlôch lu sư, lăm ti Nebukatnessar pơtao Babilôn păng lăm ti lu yŏng linh. Mă-lei đơ̆ng rŏng kơ noh, dêh char Êyiptơ gô đei kon pơlei oei lơ thoi sơ̆,” Noh Kră Yang khan.

²⁷ “Ơ Jakôp đĭch đam Inh, 'nĕ kơ hli! Ơ Isơrael 'nĕ tơrơ tăr wăr! Inh gô pơklaih ih đơ̆ng anih ataih hơtŏ, dŏng pơklaih adrĕch adrung ih đơ̆ng dêh char mă oei pơm đĭch. Jakôp gô wih brŏk arih jang sa hiôk-hian, ưh pă đei hli kơ bu dơ̆ng.”

²⁸ Kră Yang khan: “Ơ Jakôp đĭch đam Inh, ih 'nĕ kơ hli, Inh oei hơdai ih, Inh gô pơrăm đĭ lu dêh char mă Inh đei puh iĕm tơ noh; bĕ gah lu iĕm Inh ưh kơ pơlôch đĭ, mă-lei gô phak bơtho iĕm trŏ tơpăt hơnơ̆ng, ưh kơ đei lê̆ ôh tơdrong phak bơtho iĕm.”