Je 42 - Sơ̆p Hlabơar Nơ̆r 'Bok Kei-Dei

Kon pơlei apinh Jêrêmi krao khan

¹ Đĭ-đăng lu yŏng linh 'bih Jôhanan, kon drŏ-nglo Karea, Jêsania, kon drŏ-nglo Hôsaia păng đĭ-đăng lu kon pơlei, đơ̆ng bơngai pơm tih truh tơ bơngai pơm iĕm,

² năm apinh lung Jêrêmi: “Mơ̆ng bĕ nơ̆r lu nhôn apinh ih krao apinh Kră Yang 'Bok Kei-Dei ih tơgŭm lu nhôn, lu bơngai mă oei oei âu. Sơ̆ lu nhôn oei lơ kơdrâ̆m, dang ei oei pă tŏ sĕt, thoi ih 'bôh âu.

³ Wă kơ ih krao apinh Kră Yang 'Bok Kei-Dei ih, tơhlâu tơ'bôh ăn kơ lu nhôn trong ayơ wă kơ lu nhôn rok kiơ̆ păng pơm tơdrong kiơ.”

⁴ Jêrêmi bơngai khan lê̆ adrol tơl: “Inh kơtơ̆ng boih, 'nâu, inh gô krao apinh Kră Yang 'Bok Kei-Dei lu iĕm, wă kơ băt tơdrong kiơ Kră Yang bơtho khan, inh gô roi ăn kơ lu iĕm băt, ưh kơ đei ôn ôh.”

⁵ Lu sư pơkă hloi khan kơ Jêrêmi: “Hơpơi kơ Kră Yang lăng lu nhôn mă tơpăt sĭt phak lu nhôn tơdah lu nhôn ưh kơ pơm kiơ̆ thoi nơ̆r mă Kră Yang 'Bok Kei-Dei ih đei wơh ih roi tơbăt kơ lu nhôn.

⁶ Mă 'lơ̆ng dah kơnê̆, lu nhôn pơkă gô pơm kiơ̆ kơ nơ̆r Kră Yang lu nhôn, wă kơ đei pŭn hiôk. Tơpă lu nhôn gô chu yom nơ̆r Kră Yang 'Bok Kei-Dei lu nhôn.”

⁷ Mơjĭt năr đơ̆ng rŏng, đei nơ̆r Kră Yang khan kơ Jêrêmi.

⁸ Sư krao Jôhanan kon drŏ-nglo Karea hăm đĭ-đăng lu yŏng linh mă oei hơdai hăm sư păng đĭ-đăng kon pơlei đơ̆ng pơm tih truh tơ pơm iĕ.

⁹ Sư khan kơ lu sư: “'Nâu Kră Yang 'Bok Kei-Dei Isơrael, mă lu iĕm wơh athei inh krao apinh khan:

¹⁰ Tơdah lu iĕm kư̆ oei tơ lăm teh đak âu, Inh gô tơiung lu iĕm ưh kơ pơrăm lu iĕm ôh, gô bơ̆ pơpôi pơtăm ưh kơ buch lê̆ ôh; Inh ưh kơ hiôk kơ tơdrong Inh pơrăm lu iĕm boih.

¹¹ 'Nĕ kơ hli kơ pơtao Babilôn, bơngai mă lu iĕm oei hli.’ ” Kră Yang khan: “'Nĕ pă hli dơ̆ng, yua kơ Inh oei hơdai iĕm gô dŏng pơklaih iĕm đơ̆ng ti sư.

¹² Inh gô mơnat kơ lu iĕm, ăn kơ pơtao kư̆m mơnat kơ lu iĕm păng ăn kơ lu iĕm gơh oei tơ lăm teh đak lu iĕm kơdih.

¹³ Lei tơdah lu iĕm ưh kơ wă chu nơ̆r Kră Yang 'Bok Kei-Dei lu iĕm, tơdah lu iĕm oei khan: ‘Lu nhôn ưh kơ wă oei lăm teh đak âu,

¹⁴ na khan: “Ưh lu nhôn gô jur năm tơ dêh char Êyiptơ, tơ noh lu nhôn gô ưh kơ 'bôh tơdrong tơblah wang păng ưh kơtơ̆ng đe hlôm keng dơ̆ng; tơ noh lu nhôn ưh kơ pơngot rơwĕt; lu nhôn gô năm oei tơ noh.’

¹⁵ Ơ lu iĕm bơngai Juđa mă oei oei, mơ̆ng bĕ nơ̆r Kră Yang Tih Hloh 'Bok Kei-Dei Isơrael, khan: ‘Tơdah lu iĕm wă 'maih năm oei ngei tơ dêh char Êyiptơ,

¹⁶ na đao gưm mă lu iĕm hli dêh gô druh tam lu iĕm lăm teh đak Êyiptơ, tơdrong pơngot rơwĕt mă lu iĕm hli tơtăm kư̆m druh kiơ̆ iĕm năm tơ Êyiptơ păng lu iĕm gô lôch tơ noh.

¹⁷ Đĭ-đăng lu bơngai mă wă năm tơ Êyiptơ oei tơ noh, gô lôch kơ đao gưm, pơngot rơwĕt, lôch hơbuh. Ưh kơ đei bu arih; kư̆m ưh kơ đei bu klaih đơ̆ng tơdrong răm mă Inh ăn.’ ”

¹⁸ 'Nâu Kră Yang Tih Hloh, 'Bok Kei-Dei Isơrael khan: “Thoi Inh tuh boih tơdrong Inh hil mĭl tơ lăm lu kon pơlei lăm Jêrusalem thoi yơ, Inh gô tuh tơdrong Inh hil mĭl tơ lu bơngai bu mă năm oei tơ dêh char Êyiptơ kư̆m thoi noh. Đe gô blei hiap, đe lăng 'brơ̆, đe hiĕk achơ̆; lu iĕm ưh pă đei layơ 'bôh anih âu dơ̆ng.

¹⁹ Kră Yang bơtho khan boih kơ lu iĕm, lu bơngai mă oei oei lăm dêh char Juđa: ‘'Nĕ kơ năm ôh tơ char Êyiptơ,’ lu iĕm băt boih năr 'nâu Inh đei roi tơbăt kơ lu iĕm,

²⁰ lu iĕm pơrơ̆ng pơprơ̆n wơh inh năm krao chă Kră Yang 'Bok Kei-Dei lu iĕm, khan: Krao apinh bĕ Kră Yang bơ̆n tơgŭm nhôn păng roi ăn kơ lu nhôn băt Kră Yang bơtho khan lu nhôn liơ; lu nhôn gô pơm kiơ̆.

²¹ Năr 'nâu inh đei roi boih kơ lu iĕm, mă-lei lu iĕm ưh kơ wă chu kiơ̆ nơ̆r Kră Yang 'Bok Kei-Dei lu iĕm, ưh kơ wă pơm kiơ̆ dôm lu tơdrong mă Kră Yang đei athei inh roi ăn kơ lu iĕm.

²² Na dang ei lu iĕm athei băt lu iĕm gô lôch kơ đao gưm, lôch kơ pơngot rơwĕt, lôch hơbuh, tơ lăm anih dêh char mă lu iĕm 'maih năm oei noh.