Je 41 - Sơ̆p Hlabơar Nơ̆r 'Bok Kei-Dei

Tơdrong đe pơlôch Gêđalia

¹ Lăm khei tơpơh Ismael kon drŏ-nglo Nethania sâu Êlisama adrĕch pơtao, sư minh lăm lu yŏng pơgơ̆r linh pơtao, chông ba mơjĭt 'nu drŏ-nglo năm tơ Gêđalia kon drŏ-nglo Ahikam tơ pơlei Mispa. Kơplah lu sư oei sŏng sa hơdai tơ noh.

² Ismael kon drŏ-nglo Nethania hăm lu mơjĭt 'nu kiơ̆ sư iung pơlôch Gêđalia kon drŏ-nglo Ahikam sâu Saphan hăm đao gưm, bơngai mă pơtao Babilôn pôk sư pơm yŏng pơgơ̆r dêh char Juđa.

³ Ismael kư̆m pơlôch hloi lu bơngai Juđa mă oei bơ̆jang hăm Gêđalia lăm pơlei Mispa păng kư̆m pơlôch lu linh Kalđê mă oei hơdai tơ noh.

⁴ Năr đơ̆ng rŏng kơ pơlôch Gêđalia, tim mă đei bu băt ôh tơdrong noh,

⁵ đei tơhngam-jĭt 'nu bơngai drŏ-nglo hơkôih sŏk kang hek hơbĕn ao, raih akâu lu sư kơdih hăm săng, lu sư năm đơ̆ng pơlei Sichem, Silô păng Samari, chĕp ba lu tơmam phe 'ba păng lu tơmam 'bâu phu wă năm pơyơ̆r tơ hnam Kră Yang.

⁶ Ismael, kon drŏ-nglo Nethania, đơ̆ng Mispa năm sơng lu sư, yak rah nhơ̆m rah. Wă tơ'bơ̆p lu sư pơma tơm: “Bĕ bơ̆n năm tơ'bơ̆p Gêđalia, kon drŏ-nglo Ahikam.”

⁷ Kơplah lu sư năm wă tŏk-bŏk pơlei, Ismael kon drŏ-nglo Nethania hăm lu bơngai kiơ̆ sư, pơlôch đe noh păng klơ̆m hŭt akâu lôch lăm sơlŭng đak.

⁸ Mă-lei mơjĭt 'nu lăm lu sư khan kơ Ismael: “'Nĕ pơlôch lu nhôn yua kơ lu nhôn đei phe 'ba tơmam sa ôn lê̆ tơ lăm mir: 'Ba mi, 'ba tơ'bâu, đak rơmă ôliwơ; đak sut.” Thoi noh Ismael ưh kơ pơlôch lu đe noh hơdai hăm khŭl sư.

⁹ Ismael kon drŏ-nglo Nethania, klơ̆m lê̆ akâu lu bơngai sư pơlôch tơ lăm sơlŭng Gêđalia mă pơtao Asa sir, wă găn Baasa, pơtao Isơrael. Ismael kon drŏ-nglo Nethania klơ̆m lu akâu bơngai mă đêl sư pơlôch, 'bĕnh kơ sơlŭng să noh.

¹⁰ Ismael rôp pơđĭ kon bơngai mă oei arih lăm pơlei Mispa, lu kon drŏ-kăn pơtao păng lu kon pơlei mă oei lê̆ tơ lăm pơlei Mispa mă Nebusaradan yŏng pơgơ̆r lu linh gak pơtao jao boih kơ Gêđalia, kon drŏ-nglo Ahikam. Ismael kon drŏ-nglo Nethania, rôp lu bơngai noh chông ba, năm tơ gah char Ammôn.

¹¹ Jôhanan, kon drŏ-nglo Karea hăm đĭ-đăng lu yŏng linh kiơ̆ sư kơtơ̆ng đĭ tơdrong kơnê̆ Ismael kon drŏ-nglo Nethania pơm boih.

¹² Lu sư akŭm đĭ lu linh năm blah Ismael, kon drŏ-nglo Nethania, druh tam tơ jê̆ đak dơnâu tih tơ pơlei Gibeôn.

¹³ Đĭ-đăng kon pơlei mă Ismael rôp chông ba 'bôh Jôhanan, kon drŏ-nglo Karea hăm đĭ-đăng lu yŏng linh năm hơdai sư, lu sư chơt hiôk tơpă.

¹⁴ Đĭ-đăng lu kon pơlei mă Ismael đei rôp chông ba đơ̆ng pơlei Mispa kơdâu wih tơ Jôhanan, kon drŏ-nglo Karea.

¹⁵ Mă-lei Ismael, kon drŏ-nglo Nethania klaih đơ̆ng Jôhanan hơdai hăm tơhngam 'nu bơngai drŏ-nglo, lu sư kơdâu ôn tơ char Ammôn.

Kơdâu ôn tơ char Êyiptơ

¹⁶ Jôhanan, kon drŏ-nglo Karea, hơdai hăm lu yŏng linh năm hơdai sư, dŏng chông ba lu khŭl kon pơlei Mispa đơ̆ng ti Ismael, kon drŏ-nglo Nethania, đang kơ Ismael, pơlôch Gêđalia kon drŏ-nglo Ahikam; sư rôp ba lu linh, lu drŏ-kăn, lu hơ'lơ̆p lu bơngai jang lăm hnam pơtao, Jôhanan chông ba lu sư lĕch đơ̆ng pơlei Gibeôn.

¹⁷ Lu sư yak oei pơdơh 'bơ̆t pơlei Gêrut Kimham jê̆ pơlei Betlehem, trong năm tơ char Êyiptơ.

¹⁸ Lu sư hli kơ bơngai Kalđê; yua kơ Ismael, kon drŏ-nglo Nethania, pơlôch boih Gêđalia, kon drŏ-nglo Ahikam, bơngai mă pơtao Babilôn pôk sư pơm yŏng pơgơ̆r dêh char.