Je 4 - Sơ̆p Hlabơar Nơ̆r 'Bok Kei-Dei

Nơ̆r bơtho khan păng nơ̆r pơkăm

¹ Kră Yang khan: “Ơ Isơrael, tơdah ih wă wih brŏk tơ Inh, wih brŏk tơ Inh bĕ, Tơdah ih hŭt lê̆ dôm tơmam kơkuh kơ yang kơnê̆ đơ̆ng anăp Inh, Păng ih huay pă weh tơ nai dơ̆ng.

² Tơdah iĕm pơkă sĭt hăm tơdrong tơpăt hơnơ̆ng, tơdrong trŏ thoi Kră Yang arih sĭt lei teh đak gô đei pŭn hiôk đơ̆ng Sư, Păng lu sư gô ư-ang kơ Kră Yang,”

³ Kră Yang khan kơ bơngai Juđa păng pơlei Jêrusalem thoi âu: “Hơmet bĕ jơhngơ̆m iĕm thoi choh mir chŭn mă đêl lê̆ bri 'nĕ kơ rei, pơtăm lăm jơla.

⁴ Kăt tơdra akar iĕm bĕ 'bơ̆t anăp Kră Yang, ơ kon drŏ-nglo Juđa păng kon pơlei Jêrusalem, Kăt bĕ akar jơhngơ̆m iĕm. Kơnh hli kơ tơdrong Inh hil iung thoi ŭnh sa, ưh kơ đei bu kĕ pĭt, yua kơ tơdrong yoch lu iĕm pơm boih.”

Tơdrong truh đơ̆ng yă-nơ̆m.

⁵ “Roi tơbăt bĕ tơ lăm dêh char Juđa păng lăm pơlei Jêrusalem khan: ‘Hlôm bĕ keng tơ jơ̆p lăm char.’ Krao ôr mă kơtang păng khan: ‘Akŭm băl bĕ. Bĕ bơ̆n năm mơ̆t tơ lăm lu pơlei kơjăp.’

⁶ Pơdơ̆ng bĕ hla-kơ tơ gah Siôn! Kơdâu ôn bĕ tơ anih hơđơ̆ng 'nĕ pă dơ̆ng, yua kơ Inh gô ăn tơdrong pơrăm truh đơ̆ng yă-nơ̆m, minh tơdrong pơrăm tih.

⁷ Dăm-brang lĕch boih đơ̆ng anih sư, lu bơngai chă pơrăm dêh char đe, pơtơm lĕch đơ̆ng anih lu sư boih wă pơrăm pơm ăn kơ teh âu jing bri brah, Lu pơlei tih iĕm jing juơ, pă đei bơngai oei.

⁸ Na su bĕ 'bi, nhơ̆m hmoi, yua kơ tơdrong Kră Yang hil oei tam mă weh đơ̆ng bơ̆n.”

⁹ Kră Yang khan: “Lăm năr noh. Lu pơtao păng lu kră pơgơ̆r jơhngơ̆m lu sư rŭng răng; lu 'bok soi hli tơrơ, lu bơngai khan lê̆ adrol gô kơmăp lăl.”

¹⁰ Inh khan: “Ơ Kră Yang! Tơpă Ih đei hơlĕnh boih kơ lu kon pơlei âu păng pơlei Jêrusalem Ih khan: Lu iĕm gô đei hiôk-hian! Mă-lei pla đao 'bơm tơ hơko nhôn boih.”

¹¹ Kơplah noh, đe gô khan kơ kon pơlei âu păng pơlei Jêrusalem: “Kial tơtŏ đơ̆ng kơpal kông lăm char glă tơthu bah tơ lu kon pơlei Inh, ưh kơ sĭ wă pơliĕng dah wă kơ goh ôh.

¹² Kial rai kơtang hloh kơ lu tơdrong noh đơ̆ng Inh, 'nâu Inh gô sek phak lu sư.

¹³ 'Nâu, Sư truh thoi hơmơ̆l, gre aseh sư thoi kial hơbŭt, aseh sư kơdâu kuăng hloh kơ klang. Răm-'băm tơpă kơ lu bơ̆n, lôch răm đĭ!

¹⁴ Ơ kon pơlei Jêrusalem ôp mă rơgoh bĕ jơhngơ̆m kơnê̆ iĕm, wă kơ iĕm gơh đei dŏng pơklaih. Lu iĕm răk mong tơdrong kơnê̆ tơ lăm jơhngơ̆m lu iĕm dĭng dang yơ?

¹⁵ To đei nơ̆r đe roi đơ̆ng tơring Đan, nơ̆r tơbăt tơdrong truh răm đơ̆ng kông Êphraim.

¹⁶ Roi tơbăt bĕ kơ rim dêh char! Roi ăn kơ pơlei Jêrusalem băt: Lu bơngai ayăt đơ̆ng tơring ataih truh boih wang tăp dăr Lu sư jreo tơkĕch wă tơblah hăm lu pơlei Juđa.

¹⁷ Lu sư wang pơlei Jêrusalem kơjăp đơ̆ng puăn pah thoi đe wei mir chŭn; Yua kơ pơlei âu iung blah Inh,” Kră Yang khan.

¹⁸ “Tơdrong iĕm oei arih sa păng iĕm đei pơm; ba tơdrong noh. 'Nâu đei truh kơ ih pơmat tơpă. Đơ̆ng tơdrong yoch kơnê̆ ih pơm! Tơdrong noh 'bet jĭ jơhngơ̆m iĕm.”

Jêrêmi sơ'ngon mơnat dêh kơ kon pơlei sư

¹⁹ Ô! Răm, inh chhŭr nuih, inh jĭ lăm jơhngơ̆m, jơhngơ̆m inh rŭng răng, ô plei nuih inh 'bôm dĕnh, inh ưh pă kĕ chơ̆n boih. Inh kơtơ̆ng đe hlôm keng roi tơbăt, tơdrong ôr tơblah wă truh.

²⁰ Tơdrong đe pơrăm, truh pơrăm rai dêh, Jơ̆p kơ char pơrăm đĭ boih 'biao pă tam băt bơsŭn inh anih inh răm đĭ.

²¹ Inh gô 'bôh hla-kơ lu linh ayăt păng kơtơ̆ng keng re tơbăt, pă băt dĭng truh dang yơ?

²² “Tơpă kon pơlei Inh bơlŭk, lu sư ưh kơ băt kơ Inh. Lu sư oei 'lơ̆p nge kơhlôh, lu sư ưh kơ wao, lu sư nŏng kơ pơm kơnê̆, mă ưh kơ băt pơm minh tơdrong 'lơ̆ng.

Jêrêmi 'bôh lê̆ tơdrong pơrăm gô truh tơ anăp kơnh

²³ Inh lăng tơ teh, răm đĭ ưh pă đei kiơ, hoh-hoy. Inh lăng dơ̆ng tơ plĕnh ti; kư̆m ưh pă 'bôh đei hơdah tơ yơ.

²⁴ Inh lăng tơ lu kông; kông pơpơ̆ tơdrŏ ngăl, lu groi kư̆m tơdrŏ.

²⁵ Inh lăng ưh pă đei 'bôh bu; lu sem păr đĭ weh tơ nai,

²⁶ Inh 'bôh mir chŭn teh mơ̆r jing char glă. Đĭ-đăng pơlei jing rơ̆m rĕk. 'Bơ̆t anăp Kră Yang đơ̆ng tơdrong Sư hil mĭl.

²⁷ Kră Yang khan: “Đĭ kơ dêh char gô juơ tơtŭng mă-lei Inh ưh tam pơrăm đĭ ôh.

²⁸ Thoi noh, teh đak âu gô ơh sơ'ngon, plĕnh gô măng mu, yua kơ Inh đei khan, Inh đei pơkă, ưh pă tơplih, ưh pă gơh hơmet nơ̆r dơ̆ng.”

²⁹ Kơtơ̆ng jơwa re lu linh hao gre aseh păng lu linh chĕp hră, rim pơlei kơdâu ôn, mơ'nah chă ôn tơ lăm bri kơdrơ̆ng, mơ'nah chă mơ̆t lăm hơgơp tơmo. Rim pơlei achăng đĭ, ưh pă đei bơngai oei.

³⁰ Bĭ iĕm, ơ bơngai mă oei wă pơrăm. Iĕm pơm kiơ mă hrŭk ao 'brê hơhĭm, pơguăng hăm maih se, Iŏk 'long chih chhơ̆ gơnur măt, pơguăng wă kơ 'lơ̆ng liĕm, kư̆m đĭ pă yua: Bơngai mă hơyuh kơ iĕm kư̆m achăng lê̆ iĕm, kư̆m wă chă pơlôch ih.

³¹ Inh kơtơ̆ng nơ̆r ôr thoi drŏ-kăn tơpŭ, ôr hơdrăi thoi bơngai adruh tơpŭ kon blŭng-a. Noh nơ̆r ôr lu kon Adruh Siôn, ôr tơngưih plaih ti na khan răm dêh kơ inh, “inh lôch hơngơ̆t bơih, 'bơ̆t anăp lu bơngai chă pơlôch inh!”