Je 39 - Sơ̆p Hlabơar Nơ̆r 'Bok Kei-Dei

Đe blah iŏk pơlei Jêrusalem

¹ Lăm khei mơjĭt sơnăm mă tơsĭn, chăl Sêđekia, pơm pơtao pơgơ̆r teh đak Juđa, Nebukatnessar, pơtao dêh Babilôn, hăm đĭ-đăng lu linh sư năm wang blah pơlei Jêrusalem.

² Lăm năr tơsĭn khei puăn sơnăm mơjĭt-mônh chăl Sêđekia pơgơ̆r dur pơchah tơblŭt.

³ Kơplah pơlei Jêrusalem đe blah iŏk đĭ-đăng lu yŏng pơgơ̆r kiơ̆ gah pơtao Babilôn mơ̆t hơ-oei 'bơ̆t 'măng jang Tŏk-Bŏk, đei Nergal Sareser, đơ̆ng Samgar, Nêbô Sarsêkim yŏng pơgơ̆r linh, Nergal Sareser yŏng pơgơ̆r tih păng đĭ-đăng lu yŏng nai gah pơtao Babilôn.

⁴ Sêđekia, pơtao đe Juđa, hăm lu linh tơblah 'bôh tơdrong noh lu sư kơdâu lĕch đơ̆ng pơlei, kơmăng rok trong pơgar 'nhot pơtao, lĕch trong 'măng jang sơlam dur, lu sư yak tơpăt tơ Araba.

⁵ Mă-lei lu linh bơngai Kalđê druh lu sư păng tam Sêđekia lăm tơmăn jê̆ pơlei Jêrikô; rôp chông ba sư tơ Nebukatnessar, pơtao Babilôn, sek tơlang sư tơ pơlei Riblah, lăm tơring Hamat.

⁶ Pơtao Babilôn pơlôch lu kon drŏ-nglo Sêđekia lăm pơlei Riblah, tơm măt Sêđekia; pơtao Babilôn kư̆m pơlôch đĭ-đăng lu yŏng kơdră adrĕch Juđa kiơ̆ kơ pơtao athei.

⁷ Pơtao Babilôn kuek lê̆ 'bar pah măt pơtao Sêđekia păng chô̆ hăm glang kong, chông ba tơ char Babilôn.

⁸ Bơngai Kalđê iŏk ŭnh soh hnam pơtao, đĭ hnam kon pơlei păng teh pơchah lê̆ dur pơlei Jêrusalem.

⁹ Nebusaradan yŏng lu linh gak pơtao, athei rôp lu kon pơlei mă oei oei lăm pơlei păng lu bơngai lĕch yơ̆r ti kiơ̆ sư păng lu thơ̆ tuh hling, hơjơ̆m chông ba pơm bơnă tơ char Babilôn.

¹⁰ Nebusaradan, yŏng lu linh gak ưh kơ rôp ba ôh mơ'nah lăm lu kon pơlei dơnuh hin dêh, mir chŭn ưh kơ đei lê̆ lu sư oei kơtă lăm char Juđa, asong ăn kơ lu sư chŭn mir pơgar hơmu.

Đe achăng Jêrêmi rơngei

¹¹ Nebukatnessar, pơtao Babilôn athei tơtă kơ Nebusaradan yŏng lu linh gak pơtao, gah Jêrêmi khan:

¹² “Iŏk sư bĕ, wei-lăng sư pơ'lơ̆ng 'nĕ kơ pơrăm sư, mă-lei pơm kiơ̆ bĕ thoi sư wă.”

¹³ Na Nebusaradan, yŏng lu linh gak, pơtao hăm Nebusasban pơgơ̆r tơm linh tơblah, Negai Sareser yŏng tih păng đĭ-đăng lu yŏng pơgơ̆r hăm pơtao Babilôn.

¹⁴ Athei chă Jêrêmi ba sư lĕch đơ̆ng anih cham lu linh gak, jao Jêrêmi ăn kơ Gêđalia, kon drŏ-nglo Ahikam, sâu Saphan, wă kơ ba Jêrêmi năm tơ hnam sư. Sư oei hơdai hăm lu kon pơlei sư.

Kră Yang pơkă wă pơklaih Êbet Mêlek

¹⁵ Kră Yang khan kơ Jêrêmi kơplah đe oei phak sư lăm anih cham lu linh gak:

¹⁶ “Ih năm khan bĕ kơ Êbet Mêlek, bơngai Êthiôpi: Kră Yang Tih Hloh 'Bok Kei-Dei Isơrael, khan: 'Nâu Inh gô pơrăm ưh kơ trŏ ăn pŭn hiôk ôh kơ pơlei âu kiơ̆ thoi nơ̆r Inh đei pơkă boih. Kơplah ei kơnh ih gô 'bôh tơm măt.’ ”

¹⁷ Kră Yang khan: “Mă-lei kơplah noh Inh gô pơklaih ih. Đe ưh pă pơjao ih lăm ti lu bơngai mă ih oei hli.

¹⁸ Inh gô pơklaih ih tơpă, ih huay kơ pơ̆k lôch kơ đao gưm; mă-lei ih gô arih yua kơ ih gơnang kơ Inh Kră Yang khan:”