Je 37 - Sơ̆p Hlabơar Nơ̆r 'Bok Kei-Dei

Đe chĭt Jêrêmi

¹ Sêđekia kon drŏ-nglo Jôsia, pơgơ̆r tơplih Jêhôiachin, kon drŏ-nglo Jêhôiakim, yua kơ đơ̆ng Nebukatnessar pơtao Babilôn pôk sư pơm pơtao đe Juđa.

² Mă-lei pơtao păng lu yŏng pơgơ̆r hăm đĭ-đăng kon pơlei lăm dêh Juđa kuă kơ mơ̆ng nơ̆r Kră Yang đei khan boih kơ Jêrêmi bơngai khan lê̆ adrol.

³ Pơtao Sêđekia wơh Jêhukal kon drŏ-nglo Sêlemia păng Sephania 'bok soi kon drŏ-nglo Maaseia, năm tơ Jêrêmi bơngai khan lê̆ adrol păng khan: “Apinh ih krao apinh Kră Yang 'Bok Kei-Dei bơ̆n tơgŭm lu nhôn.”

⁴ Kơplah noh Jêrêmi oei chă yak ngôi tơ lăm kon pơlei, đe tam mă rôp phak sư ôh.

⁵ Lu linh Pharaôn lĕch đơ̆ng Êyiptơ. Lu bơngai Kalđê oei wang pơlei Jêrusalem kơtơ̆ng tơdrong ei, na lu sư kơdâu weh đơ̆ng pơlei Jêrusalem.

⁶ Đei nơ̆r Kră Yang khan kơ Jêrêmi bơngai khan lê̆ adrol:

⁷ “'Nâu Kră Yang 'Bok Kei-Dei bơngai Isơrael, khan: Iĕm khan kơ pơtao Juđa, tơ'ngla mă wơh iĕm năm apinh Inh, khan: ‘Lu linh Pharaôn năm wă dŏng iĕm wih brŏk tơ char sư Êyiptơ boih.’

⁸ Lu linh Kalđê gô hơlơ̆k tơ âu, wang blah pơlei âu, lu sư blah iŏk pơlei âu păng soh pơlei âu.

⁹ Kră Yang khan: “Lu iĕm 'nĕ chă hơlĕnh kơdih khan: ‘Bơngai Kalđê khan gô weh ataih đơ̆ng lu bơ̆n; lu sư ưh kơ weh ôh.’

¹⁰ Mă khan lu iĕm tơblah hăm lu linh Kalđê, jei lu iĕm ră mă lăm lu sư oei pă dôm 'nu lu bơngai rơka đĕch, lu sư gô lĕch dơ̆ng lăm bơsŭn iŏk ŭnh soh pơlei 'nâu.”

¹¹ Đơ̆ng rŏng kơ lu linh bơngai Kalđê lĕch weh đơ̆ng pơlei Jêrusalem, yua kơ hli kơ lu linh Pharaôn.

¹² Jêrêmi wă lĕch đơ̆ng pơlei Jêrusalem yak năm tơ char Bênjamin, wă iŏk klah asong hơnam sư đŏng lăm kon pơlei tơ noh.

¹³ Mă-lei lăp sư truh tơ 'Măng Jang Bênjamin đei minh 'nu yŏng lu linh bơngai gak anăn sư Irijah, kon drŏ-nglo Sêlemia, sâu Hanania, oei gak tơ noh; rôp Jêrêmi bơngai khan lê̆ adrol khan: “Ih kơdâu lê̆ bơngai Juđa mơ̆t kiơ̆ lu bơngai Kalđê.”

¹⁴ Jêrêmi tơl: “Ưh kơ trŏ.” Inh ưh kơ mơ̆t bơngai Kalđê ôh.” Mă-lei Irijah ưh kơ mơ̆ng, rôp Jêrêmi năm ba tơ lu kră pơgơ̆r.

¹⁵ Lu Kră pơgơ̆r hil kơ Jêrêmi teh tôn păng chĭt phak tơ lăm hnam Jônathan bơngai chih hla bơar; yua kơ đe iŏk hnam noh pơm hnam phak.

¹⁶ Jêrêmi đe chĭt phak, lăm sơlŭng măng mu, sư oei tơ noh đunh năr.

¹⁷ Pơtao Sêđekia wơh đe năm krao Jêrêmi ba tơ hnam pơtao, sư jet Jêrêmi hơdrô̆ lăm hnam sư: “Kră Yang hăm đei khan kiơ?” Jêrêmi tơl: “Đei mơ̆n, đe gô jao ih tơ lăm ti pơtao Babilôn.”

¹⁸ Đơ̆ng noh Jêrêmi khan kơ pơtao Sêđekia: “Inh hăm đei pơm glăi hăm ih, hăm lu kră pơgơ̆r, dah hăm kon pơlei âu, na ih mah rôp tah inh tơ lăm hnam phak?

¹⁹ Tơ yơ lu bơngai khan lê̆ adrol roi kơ ih khan: Pơtao Babilôn ưh kơ năm blah pơtao păng teh đak 'nâu?

²⁰ Ơ 'bok yŏng pơtao inh, dang ei, mơ̆ng bĕ! Inh apinh lung ih, 'nĕ pă ba inh wih dơ̆ng tơ hnam Jônathan bơngai chih hla bơar, hơmơt kơnh inh lôch tơ noh.’ ”

²¹ Pơtao Sêđekia tơtă athei đe ba Jêrêmi tơ cham hnam anih đe gak, ăn kơ sư rim năr minh pôm 'bĕng mi, đơ̆ng hnam đe pơm 'bĕng lăm pơlei tih ei dĭng truh tơ tơpŭng 'bĕng lăm pơlei noh đĭ. Jêrêmi đe chĭt tơ cham hnam anih linh gak.