Je 36 - Sơ̆p Hlabơar Nơ̆r 'Bok Kei-Dei

Jêhôiakim soh sơnôm hla bơar Jêrêmi

¹ Lăm sơnăm mă puăn chăl Jêhôiakim kon drŏ-nglo Jôsia pơtao Juđa Kră Yang khan kơ Jêrêmi:

² “Iŏk bĕ minh sơnôm hla bơar chih bĕ lăm noh dôm tơdrong Inh đei bơtho khan kơ ih gah bơngai Juđa, Isơrael păng đĭ-đăng adrĕch adrung nai, iŏk đơ̆ng chăl Jôsia, dĭng truh kơ năr 'nâu.

³ Mưh lu bơngai Juđa kơtơ̆ng đĭ-đăng tơdrong răm Inh wă pơm kơ lu sư, rŏ lăng lu sư gô tơbral achăng lê̆ tơdrong kơnê̆ lu sư kơdih, na Inh huay jô̆ yo tơdrong yoch kơnê̆ lu sư.”

⁴ Jêrêmi krao Baruk kon drŏ-nglo Nêria, Baruk chih tơ lăm sơnôm hla bơar kiơ̆ thoi Jêrêmi roi ăn kơ sư đĭ-đăng dôm nơ̆r Kră Yang khan.

⁵ Jêrêmi khan kơ Baruk: “Đe khă inh, ưh kơ gơh năm tơ hnam Kră Yang.

⁶ Thoi noh ih athei năm mơ̆t tơ lăm hnam Kră Yang, lăm năr đe ơ̆t kơ sŏng sa, đŏk kơ kon pơlei pơla mơ̆ng dôm nơ̆r Kră Yang, inh roi ăn kơ ih chih tơ lăm sơnôm hla bơar noh. Ih kư̆m athei đŏk ăn kơ kon pơlei Juđa mă 'nao truh đơ̆ng pơlei lu sư mơ̆ng mơ̆n.

⁷ Rŏ lăng lu sư gô krao apinh Kră Yang păng tơbral păng weh đơ̆ng trong pơm kơnê̆ yua kơ tơdrong hil Kră Yang wă pơm kơ kon pơlei 'nâu tih dêh tơpă.”

⁸ Baruk, kon drŏ-nglo Nêria pơm kiơ̆ dôm tơdrong Jêrêmi đei roi, đŏk nơ̆r Kră Yang sư đei chih lăm sơnôm hla bơar noh lăm hnam Kră Yang.

⁹ Lăm khei tơsĭn sơnăm mă pơđăm chăl Jêhôiakim kon drŏ-nglo Jôsia pơtao đe Juđa, đĭ-đăng kon pơlei oei lăm Jêrusalem păng đĭ-đăng kon pơlei đơ̆ng pơlei nai dơ̆ng lăm char Juđa, năm tơ pơlei Jêrusalem, pơm giĕng ơ̆t kơ sŏng sa 'bơ̆t anăp Kră Yang.

¹⁰ Baruk đŏk dôm nơ̆r Jêrêmi lăm sơnôm hla bơar ăn kơ đĭ kon pơlei mơ̆ng, Banik lăm hnam Kră Yang, lăm anih Gêmaria kon drŏ-nglo Saphan bơngai chih hla bơar, 'bơ̆t cham kơpal, jê̆ 'Măng Jang 'Nao trong mơ̆t tơ hnam akŭm.

¹¹ Wă Mikaia kon drŏ-nglo Gêmaria sâu Saphan kơtơ̆ng dôm nơ̆r Kră Yang đei chih lăm sơnôm hla bơar,

¹² sư jur năm tơ hnam pơtao, mơ̆t tơ lăm anih 'bok chih hla bơar; tơ'bơ̆p lu yŏng pơgơ̆r oei ngôi lăm noh, lu sư đei Êlisama; 'bok chih hla bơar, Đêlaia kon drŏ-nglo Sêmaia, Êlnathan kon drŏ-nglo Akbôr, Gêmaria kon Saphan, Sêđekia, kon Hanania păng lu yŏng pơgơ̆r nai.

¹³ Mikaia roi ăn kơ lu sư dôm nơ̆r mă sư kơtơ̆ng Baruk đŏk ăn kơ lu kon pơlei mơ̆ng đơ̆ng lăm sơnôm hla bơar noh.

¹⁴ Đơ̆ng noh lu yŏng pơgơ̆r wơh Jêhuđi kon drŏ-nglo Nethania sâu Sêlemia sâu i Kusi năm krao Baruk khan: “Chĕp ba sơnôm hla bơar mă ih đei đŏk ăn kơ kon pơlei mơ̆ng noh năm kiơ̆ inh.” Na Baruk kon drŏ-nglo Nêria chĕp sơnôm hla bơar noh năm tơ'bơ̆p lu sư.

¹⁵ Đe noh khan kơ sư: “Hơ-oei păng đŏk ăn kơ nhôn mơ̆ng bĕ. Na Baruk đŏk ăn kơ lu sư mơ̆ng.

¹⁶ Lu sư 'nao mơ̆ng đĭ dôm nơ̆r noh, na lu sư hli pơglăn băl păng khan kơ Baruk: “Lu nhôn gô khŏm chĕp ba nơ̆r âu năm roi kơ pơtao.”

¹⁷ Na lu sư apinh Baruk: “Roi ăn kơ lu nhôn liơ mă ih gơh chih dôm nơ̆r 'nâu. Hăm trŏ kơ Jêrêmi đŏk na ih chih?”

¹⁸ Baruk tơl: “Sư roi kơ inh dôm nơ̆r noh na inh iŏk 'long chih đak mơ̆k chih lăm sơnôm hla bơar âu.”

¹⁹ Lu yŏng pơgơ̆r noh pơma hăm Baruk: “Ih hăm Jêrêmi năm ôn bĕ, 'nĕ ăn kơ bu băt anih măr iĕm oei.”

²⁰ Na lu yŏng pơgơ̆r ôn lê̆ sơnôm hla bơar noh tơ lăm anih Êlisama 'bok chih hla bơar; lu sư năm tơ hnam pơtao, na roi ăn kơ pơtao mơ̆ng dôm nơ̆r noh.

²¹ Pơtao wơh Jêhuđi năm iŏk sơnôm hla bơar; na Jêhuđi năm iŏk hla bơar noh đơ̆ng lăm anih Êlisama 'bok chih hla bơar, na đŏk ăn kơ pơtao păng lu yŏng pơgơ̆r mă oei tăp kơ pơtao wang mơ̆ng.

²² Năr noh khei tơsĭn; pơtao oei ngôi lăm hnam sư bơyan puih, đei tơnuh đe tơkuh ŭnh ngar ngŭr 'bơ̆t anăp pơtao.

²³ Kơplah Jêhuđi oei đŏk 'nao pêng puăn trong lăm sơnôm hla bơar noh 'bok pơtao iŏk săng iĕ rek kơtĕch klơ̆m lăm ŭnh mă đe tơkuh noh dĭng mă ŭnh sa pơđĭ hloi sơnôm hla bơar noh.

²⁴ Pơtao păng lu 'bok pơgơ̆r kơtơ̆ng dôm nơ̆r noh, mă-lei ưh kơ hli ưh kơ hek ao lu sư kơdih.

²⁵ Mă khan Êlnathan, Đêlaia păng Gêmaria apinh lung ră 'nĕ kơ soh sơnôm hla bơar noh mă-lei pơtao ưh kơ mơ̆ng.

²⁶ Pơtao rai wơh Jêrahmêel kon drŏ-nglo pơtao, Sêraia kon drŏ-nglo Asriel păng Sêlemia kon drŏ-nglo Apđeel năm wă rôp chô̆ Baruk 'bok chih hla bơar păng Jêrêmi bơngai khan lê̆ adrol. Mă-lei Kră Yang ôn lê̆ bre sư.

Jêrêmi tơbăt wă phak pơtao

²⁷ Đang kơ pơtao soh sơnôm hla bơar mă đơ̆ng Baruk chih đơ̆ng nơ̆r Jêrêmi roi đêl nơ̆r Kră Yang khan kơ Jêrêmi:

²⁸ Iŏk minh sơnôm plơ̆ng dơ̆ng bĕ, chih rok thoi sơnôm hla bơar adrol mă Jêhôiakim pơtao đe Juđa soh boih.

²⁹ Kŭm roi ăn kơ Jêhôiakim pơtao đe Juđa, 'nâu Kră Yang khan: ‘Ih soh boih sơnôm hla bơar âu păng jet: Liơ ih pơ̆n chih khan pơtao Babilôn gô truh, pơrăm dêh char âu păng pơlôch kon bơngai hăm sem dơrong.’

³⁰ Thoi noh na 'nâu nơ̆r Kră Yang khan gah Jêhôiakim, pơtao đe Juđa: Kon sâu sư ưh kơ đei bu hơ-oei 'bơ̆t tang-dŏ pơtao Đawit; akâu atâu sư lôch đe gô klơ̆m lê̆ tơ 'nguaih sơ̆k tơtŏ kơ'năr păng lê̆ tơtŭk tơngiĕt kơmăng.

³¹ Inh gô phak sư, phak lu kon sâu sư păng lu yŏng pơgơ̆r yua kơ tơdrong yoch lu sư. Inh gô ăn tơdrong truh kơ lu sư, lu kon pơlei Jêrusalem păng bơngai Juđa, tơdrong phak pơrăm Inh đei khan tơbăt lê̆ kơ lu sư adrol boih, mă-lei lu sư ưh kơ wă mơ̆ng.”

³² Jêrêmi iŏk minh sơnôm hla bơar plơ̆ng dơ̆ng ăn kơ Baruk bơngai chih hla bơar kon drŏ-nglo Nêria; Jêrêmi roi ăn dơ̆ng dôm nơ̆r thoi lăm sơnôm hla bơar mă Jêhôiakim, pơtao đe Juđa soh boih. Sư kư̆m roi thim nơ̆r plơ̆ng dơ̆ng. Kŭm lei-lăi thoi noh.