Je 35 - Sơ̆p Hlabơar Nơ̆r 'Bok Kei-Dei

Bơngai Rêkap chu

¹ Nơ̆r Kră Yang khan kơ Jêrêmi lăm chăl Jêhôiakim kon drŏ-nglo Jôsia pơtao đe Juđa.

² “Năm bĕ tơ lu adrĕch bơngai Rêkap, khan kơ lu sư; chông ba lu sư năm tơ hnam Kră Yang mơ̆t tơ lăm minh anih păng ăn kơ lu sư huch sik.

³ Thoi noh Inh năm tơ Jaasania kon drŏ-nglo Jêrêmi, sâu Habasinia, lu 'nhŏng oh sư păng đĭ-đăng adrĕch lu bơngai Rêkap.

⁴ Inh chông ba lu sư năm tơ hnam Kră Yang mơ̆t lăm anih lu kon drŏ-nglo Hanan kon drŏ-nglo Idalia, bơngai Kră Yang 'Bok Kei-Dei. Anih noh jê̆ anih lu yŏng păng anih kơpal kơ Maaseia kon drŏ-nglo Salum, bơngai gak 'măng.

⁵ Inh hơmet lu get 'bĕnh kơ sik hơmu păng kơchŏk dan 'bơ̆t anăp lu bơngai Rêkap; păng khan kơ lu sư: “Huch sik âu bĕ!”

⁶ Mă-lei lu sư tơl: “Lu nhôn ưh kơ lah huch sik ôh; yua kơ 'bok lu nhôn Jônađap, kon drŏ-nglo Rêkap đei bơtho khan kơ lu nhôn: Lu iĕm păng đĭ kơ lu sâu se iĕm ning-mônh 'nĕ kơ et sik.

⁷ ‘Lu iĕm 'nĕ kơ pơm hnam, 'nĕ kơ rei, 'nĕ kơ pơtăm păng 'nĕ kơ pơm mir hơmu; iĕm 'nĕ kơ đei dôm lu tơmam noh. Mă-lei lu iĕm oei bơsŭn đĕch đĭ chăl arih iĕm, wă kơ iĕm arih sot lăm teh đak mă iĕm oei dang ei iĕm thoi bơngai tơmoi.’

⁸ Lu nhôn chu kiơ̆ nơ̆r Jônađap kon drŏ-nglo Rêkap 'bok lu nhôn lăm rim tơdrong sư đei bơtho pơkă boih kơ lu nhôn, lăm đĭ chăl arih lu nhôn, truh tơ kon akăn, kon drŏ-nglo kon drŏ-kăn lu nhôn, ưh kơ et sik.

⁹ Lu nhôn kư̆m ưh kơ đei pơm hnam oei, ưh kơ pơm pơgar hơmu, mir chŭn, wă rei pơtăm,

¹⁰ kư̆ oei lăm bơsŭn, lu nhôn mơ̆ng kiơ̆ boih đĭ-đăng tơdrong Jônađap 'bok lu nhôn pơkă boih.

¹¹ Mă-lei tơdah Nebukatnessar pơtao Babilôn năm blah char nhôn, lu nhôn pơtơm băl: ‘Bĕ lu bơ̆n năm mơ̆t tơ pơlei tih Jêrusalem, wă klaih đơ̆ng lu linh bơngai Kalđê păng linh Aram.’ Lei na lu nhôn oei lăm pơlei Jêrusalem.”

¹² Klaih kơ noh, đei nơ̆r Kră Yang khan kơ Jêrêmi:

¹³ 'Nâu Kră Yang Tih Hloh 'Bok Kei-Dei bơngai Isơrael khan: “Năm khan bĕ kơ bơngai Juđa păng kon pơlei Jêrusalem: Kră Yang khan: ‘Lu iĕm ưh kơ wă chu iŏk tơdrong Inh bơtho păng kư̆m kuă kơ mơ̆ng nơ̆r Inh mơ̆n hă?

¹⁴ Nơ̆r Jônađap, kon drŏ-nglo Rêkap bơtho khan kơ kon sâu sư, 'nĕ kơ et huch sik hơmu ôh, lu sư chu boih, truh tơ dang ei lu sư ưh dah huch sik đak hơmu ôh. Lu sư chu kiơ̆ kơ 'bok lu sư pơkă. Bĕ Inh pơma bơtho lu iĕm ling-lang, mă-lei lu iĕm kuă kơ mơ̆ng Inh.

¹⁵ Inh đei lơ wơ̆t boih wơh đĭch đam Inh, lu bơngai khan lê̆ adrol năm khan kơ lu iĕm: Dang ei ăn đĭ kơ lu iĕm weh bĕ đơ̆ng yoch, tơplih bĕ tơdrong lu iĕm pơm; păng kư̆m 'nĕ kơ kiơ̆ lu yang nai, lei na lu iĕm gơh mơ̆t oei tơ lăm char mă Inh gô ăn kơ lu iĕm păng kơ 'bok lu iĕm. Mă-lei lu iĕm ưh kơ wă pơgling đon mơ̆ng kiơ̆ Inh.

¹⁶ Tơpă kon sâu Jônađap, kon drŏ-nglo Rêkap mơ̆ng boih dôm nơ̆r đơ̆ng 'bok lu sư bơtho khan, mă-lei lu kon pơlei 'nâu ưh kơ chu mơ̆ng nơ̆r Inh ôh.’

¹⁷ Thoi noh na Kră Yang mơsêh mơyang Tih Hloh. 'Bok Kei-Dei bơngai Isơrael khan: ‘'Nâu, Inh gô ăn đĭ lu tơdrong răm truh kơ Juđa păng lu kon pơlei Jêrusalem mă Inh khan lê̆ adrol, Inh đei bơtho tơ'bôh boih kơ lu sư; mă-lei lu sư ưh kơ wă mơ̆ng, Inh krao lu sư boih mă-lei lu sư kuă kơ tơl.’ ”

¹⁸ Jêrêmi khan kơ adrĕch bơngai Rêkap: “Kră Yang Tih Hloh 'Bok Kei-Dei Isơrael khan: Yua kơ lu iĕm chu kiơ̆ mơ̆ng boih nơ̆r 'bok lu iĕm Jônađap, wei răk pơm kiơ̆ dôm nơ̆r sư đei bơtho tơtă.

¹⁹ Thoi noh na Kră Yang 'Bok Kei-Dei bơngai Isơrael khan: ‘Adrĕch adrung Jônađap kon drŏ-nglo Rêkap gô đei ling-lang bơngai jang kơ Inh.’ ”