Je 34 - Sơ̆p Hlabơar Nơ̆r 'Bok Kei-Dei

Jêrêmi tơbăt kơ Sêđekia

¹ 'Nâu nơ̆r Kră Yang khan kơ Jêrêmi, kơplah Nebukatnessar pơtao Babilôn, hăm đĭ-đăng lu linh sư, đĭ-đăng kơ lu teh đak chu kơ nơ̆r sư oei wang blah pơlei tih Jêrusalem păng lu pơlei nai tăp dăr.

² Kră Yang 'Bok Kei-Dei Isơrael khan: “Năm roi bĕ kơ Sêđekia, pơtao đe Juđa, 'nâu Kră Yang khan: Inh wă jê̆ jao pơlei tih âu lăm ti pơtao Babilôn, sư gô iŏk ŭnh soh pơlei.

³ Bĕ ih kư̆m ưh kơ gơh klaih đơ̆ng ti sư; đe gô rôp ih, jao ih lăm ti sư. Ih gô 'bôh tơm măt pơtao Babilôn păng kư̆m gô pơma dơnuh hăm sư, đe gô chông ba ih tơ char Babilôn.

⁴ Lei na mơ̆ng bĕ nơ̆r Kră Yang pơma. Ơ Sêđekia pơtao đe Juđa. Kră Yang pơma roi gah ih: Ih huay kơ lôch kơ đao gưm ôh.

⁵ Ih gô lôch lăm tơdrong hiôk-hian, đe gô soh kơ ih pơgang 'bâu phu kư̆m thoi đe soh boih kơ 'bok ih, lu pơtao adrol kơ ih; păng đe gô nhơ̆m hmoi kơ ih: Ơ yŏng inh hô̆ lah! Inh đei khan pơkă boih nơ̆r âu.” Noh Kră Yang khan.

⁶ Jêrêmi bơngai khan lê̆ adrol roi đĭ-đăng tơdrong noh kơ Sêđekia, pơtao đe Juđa tơ lăm pơlei Jêrusalem,

⁷ kơplah lu linh pơtao Babilôn oei blah pơlei Jêrusalem păng đĭ lu pơlei lăm char Juđa, mă oei đei, lăp pơlei Lakis păng pơlei Asêka; đĕch noh 'bar tŏ pơlei tih đei dur kơjăp mă oei đei lăm char Juđa.

Pơm glăi kơ tơdrong pơgơ̆p

⁸ Kră Yang khan kơ Jêrêmi đơ̆ng rŏng kơ pơtao Sêđekia pơm nơ̆r pơgơ̆p hăm đĭ-đăng lu kon pơlei pơla tơ Jêrusalem, roi tơbăt ăn rơngei kơ lu đĭch.

⁹ Rim 'nu athei ăn kơ lu đĭch bơngai Hêbrơ rơngei, drŏ-nglo dah drŏ-kăn; ưh kơ gơh rôp 'nhŏng dah oh lu iĕm bơngai Juđa pơm đĭch ôh.

¹⁰ Na đĭ-đăng lu kră pơgơ̆r păng đĭ-đăng kon pơlei chu drơ̆ng kiơ̆ nơ̆r đei pơgơ̆p noh, ăn lu đĭch drŏ-nglo dah drŏ-kăn klaih rơngei. Ưh pă đei rôp bu pơm đĭch dơ̆ng. Lu sư chu kiơ̆ ăn kơ đĭch đam gơh klaih rơngei.

¹¹ Mă-lei đơ̆ng rŏng lu sư tơplih đon; hơlơ̆k rôp lu đĭch đam drŏ-nglo drŏ-kăn mă đêl lu sư 'nao achăng noh wơ̆t jang pơm đĭch đam dơ̆ng.

¹² Kơplah noh đei nơ̆r Kră Yang khan kơ Jêrêmi;

¹³ 'Nâu Kră Yang 'Bok Kei-Dei bơngai Isơrael, khan: Inh đei nơ̆r pơgơ̆p hăm lu 'bok yă iĕm lăm năr mă Inh đei chông anhăk lu sư lĕch đơ̆ng dêh char Êyiptơ sơ̆, klaih rơngei đơ̆ng pơm đĭch, Inh khan:

¹⁴ Sơnăm tơpơh đĭ-đăng lăm lu iĕm athei ăn kơ lu 'nhŏng oh iĕm bơngai Hêbrơ rơngei, mă sư đei tĕch kơdih sư tơ lu iĕm. Mă đei bơ̆jang pơm đĭch iĕm lăm tơdrâu sơnăm boih, lu iĕm athei ăn kơ sư rơngei. Mă-lei lu 'bok yă iĕm ưh kơ wă mơ̆ng Inh, kư̆m kuă kơ pơgling đon lu sư.

¹⁵ Ưh kơ đunh ki iĕm 'nao tơbral pơm tơdrong trŏ 'bơ̆t anăp Inh, lu iĕm kư̆m đei tơbăt ăn kơ rim 'nu athei ăn kơ 'nhŏng oh bơ̆n đêl pơm đĭch rơngei. Lu iĕm đei boih nơ̆r pơgơ̆p 'bơ̆t anăp Inh lăm hnam krao anăn Inh.

¹⁶ Mă-lei iĕm đei đon tơplih; pơm pơ'mê̆ kơ anăn Inh; rim 'nu lu iĕm hơlơ̆k rôp dơ̆ng lu đĭch đam drŏ-nglo drŏ-kăn mă đơ̆ng lu iĕm 'nao achăng ăn kơ lu sư rơngei mơ̆ng kơ lu sư wă năm tơ yơ ră, rôp pơgŏ lu sư pơm đĭch iĕm dơ̆ng.”

¹⁷ Thoi noh, Kră Yang khan: “Lu iĕm ưh kơ wă mơ̆ng nơ̆r Inh, lu iĕm ưh kơ roi ăn kơ rim 'nu athei ăn kơ lu 'nhŏng oh, lu rông 'bôt iĕm gơh rơngei. Kră Yang khan: 'Nâu Inh ăn kơ iĕm rơngei, năm tơ đao gưm, jĭ hơbuh pơngot rơwĕt, Inh gô pơm ăn kơ iĕm jing bơngai đe lăng 'mê̆ krưp lăm jơ̆p kơ dêh char lăm teh âu.

¹⁸ Lu bơngai mă đei pơm yoch hăm nơ̆r pơgơ̆p Inh, ưh kơ kiơ̆ dôm nơ̆r pơgơ̆p mă lu sư đei pơkă boih 'bơ̆t anăp Inh, Inh gô ăn kơ lu sư thoi kon rơmo blah phơ̆ tŏk-bŏk, na yak rok sơlam 'bar pah 'nhĕm noh;

¹⁹ Lu kră pơgơ̆r bơngai Juđa păng Jêrusalem lu bơngai jang lăm hnam pơtao, 'bok soi păng lu kon pơlei năm yak rok sơlam lu 'nhĕm rơmo blah noh.

²⁰ Inh jao lu sư tơ lăm ti lu bơngai ayăt kơ lu sư, lu bơngai 'maih wă pơlôch pơrăm lu sư. Atâu akâu lu sư lôch gô ăn kơ sem grơ̆ păng sem bri sa.

²¹ Sêđekia pơtao đe Juđa păng kră pơgơ̆r sư Inh gô jao ăn tơ lăm ti lu bơngai ayăt kơ sư lu bơngai 'maih wă pơlôch lu sư, lăm ti lu linh pơtao Babilôn 'nao weh đơ̆ng lu iĕm.”

²² Kră Yang khan: “'Nâu Inh gô chông lu sư brŏk hơlơ̆k blah pơlei âu; lu sư gô soh pơlei 'nâu, Inh gô ăn đĭ-đăng lu pơlei lăm char Juđa jing juơ, ưh kơ đei bơngai oei.”