Je 33 - Sơ̆p Hlabơar Nơ̆r 'Bok Kei-Dei

Tơdrong pơkă pơ'ngam 'lơ̆ng rŏ

¹ Kơplah Jêrêmi đe phak tơ lăm cham lu linh gak, đei nơ̆r Kră Yang khan kơ sư wơ̆t mă 'bar.

² 'Nâu Kră Yang khan, Sư boih Tơ'ngla pơjing teh đak păng pơm pơdơ̆ng tôm tơmam ăn kơ lu sư kơjăp; anăn Sư Kră Yang:

³ Krao apinh Inh bĕ, Inh gô tơl tơwih; Inh gô tơ'bôh ăn kơ ih tơdrong tih jrŭ păng tơnat kơ hlôh, dôm tơdrong mă ih ưh tam mă băt.”

⁴ 'Nâu Kră Yang 'Bok Kei-Dei Isơrael khan: “Gah lu hnam lăm pơlei tih, hnam pơtao đe Juđa, pơrăm lê̆ boih, wă yua găn tơblah hăm đao gưm lu bơngai Babilôn.

⁵ Tơblah hăm lu bơngai Kalđê, lu hnam 'nâu 'bĕnh kơ atâu akâu bơngai Inh pơlôch lăm năr Inh hil, lăm năr Inh mĭl. Yua kơ lu kon pơlei âu pơm yoch na Inh ôn boih muh măt Inh đơ̆ng pơlei âu.

⁶ “Inh gô ăn kơ lu sư pran kơtang păng ăn kơ lu sư klaih rơngơp; Inh gô pơklaih pơlei âu, Inh gô ăn kơ lu sư hiôk-hian chơt 'nă hal tơpă.

⁷ Inh gô ăn kơ bơngai Juđa păng Isơrael đei hiôk jơnap, Inh gô tơiung pơdơ̆ng teh đak lu sư thoi sơ̆.

⁸ Inh gô sŭt rơgoh tơdrong yoch mă đêl lu sư pơm boih hăm Inh; Inh huay pă jô̆ boih dôm tơdrong yoch kơnê̆ mă lu sư blah Inh,

⁹ Pơlei âu gô ba anăn Inh đei ư-ang hiôk chơt, tơdrong bơnê, 'bơ̆t anăp đĭ adrĕch adrung kon bơngai lăm teh đak; lu sư gô kơtơ̆ng tơdrong 'lơ̆ng mă Inh ăn pŭn hiôk kơ lu bơngai Juđa păng bơngai Isơrael. Lu dêh noh gô tơrơ lăng krưp kơ tơdrong pŭn hiôk păng tơdrong hiôk-hian Inh ăn kơ pơlei âu.”

¹⁰ 'Nâu Kră Yang khan: “Ih khan gah anih 'nâu: ‘Anih noh juơ ưh kơ đei bơngai oei, kư̆m ưh kơ đei kon sem bri.’ Lăm đĭ-đăng pơlei tih char Juđa păng trong tih pơlei Jêrusalem, dang ei jing anih rơ̆m rĕk, ưh kơ đei bơngai oei păng kư̆m ưh kơ đei sem brem trŏ tơpă.

¹¹ Mă-lei đe gô kơtơ̆ng dơ̆ng nơ̆r hiĕk chhôk 'nă hal tơ noh, nơ̆r bre ŏng mai hle, nơ̆r đe hơri rah chĕp tơmam pơyơ̆r bơnê mơ̆t lăm hnam Kră Yang: ‘Hơri bơnê bĕ kơ Kră Yang Tih Hloh, yua kơ tơdrong 'mêm Sư oei oei ling-lang! Yua kơ tơdrong 'lơ̆ng Sư.’ ” Kră Yang khan: “Yua kơ Inh gô ăn kơ dêh char âu hiôk jơnap, kư̆m thoi adrol sơ̆,”

¹² Kră Yang Tih Hloh khan: “Lăm anih juơ 'nâu, ưh kơ đei kon bơngai oei păng kư̆m ưh kơ đei sem bri păng tơ rim pơlei, gô đei tơmăn 'nhĕt ăn kơ lu bơngai wei triu ăn kơ triu sư 'bĭch pơdơh.

¹³ Lăm lu pơlei tơring groi kông păng lu pơlei lăm tơring groi gah bơmơ̆t, lăm lu tơring glă gah gơal, lăm teh đak Bênjamin, tơ lăm rim anih tăp dăr Jêrusalem păng lăm pơlei char Juđa, khŭl triu gô yak rok ala ti đe gô jô̆ lu sư.” Noh Kră Yang khan.

¹⁴ Kră Yang khan: “Đơ̆ng âu tơ anăp, Inh gô pơsĭt nơ̆r Inh pơkă 'lơ̆ng rŏ mă Inh đei pơkă hăm adrĕch Isơrael păng adrĕch Juđa.”

¹⁵ “Lăm lu 'năr noh păng kơplah ei kơnh, Inh gô ăn đei minh pôm dơng tơpăt sĭt chăt đơ̆ng adrĕch Đawit. 'Bok noh gô pơm tơdrong tơpăt hơnơ̆ng lăm teh đak.

¹⁶ Lăm lu năr noh; adrĕch Juđa gô đei dŏng pơklaih; Jêrusalem gô oei hiôk-hian păng gô krao anăn Kră Yang boih tơpăt hơnơ̆ng lu nhôn.’ ”

¹⁷ Yua kơ Kră Yang khan: “Adrĕch Đawit ưh kơ đei khăi ôh bơngai drŏ-nglo pơtrơp oei tơ tang-dŏ pơtao adrĕch Isơrael.

¹⁸ Lu 'bok soi bơngai Lêwi kư̆m ưh kơ khăi ôh wă dơ̆ng soh pơyơ̆r tơmam soi 'buh, păng tơmam soh pơyơ̆r phe 'ba păng tơmam soi pơyơ̆r nai 'bơ̆t anăp Inh.

¹⁹ Kră Yang khan kơ Jêrêmi:

²⁰ “'Nâu Kră Yang khan: Tơdah tơdrong Inh pơgơ̆p kơ'năr dah kơmăng, gơh pơrăm dĭng mah 'năr păng măng pă đei truh thoi đêl pơkă,

²¹ lei na gơh pơrăm nơ̆r pơgơ̆p Inh hăm Đawit, đĭch đam Inh, wă khan sư ưh pă đei kon sâu drŏ-nglo wă pơm pơtao pơgơ̆r dơ̆ng păng pơrăm nơ̆r pơgơ̆p Inh hăm lu 'Bok soi, bơngai Lêwi, lu bơngai jang kơ Inh kư̆m lei-lăi.

²² Inh gô ăn kơ adrĕch Đawit, đĭch đam Inh păng ăn kơ lu bơngai Lêwi jang kơ Inh, Inh gô ăn kơ adrĕch adrung sư lơ thoi sơnglŏng kơpal plĕnh, thoi chuơh cheng đak dơsĭ ưh kơ đei bu kĕ jô̆.”

²³ Kră Yang khan kơ Jêrêmi:

²⁴ “Ih hăm đei kơtơ̆ng nơ̆r lu kon pơlei 'nâu pơma: Lu sư khan: ‘'Bar tŏ adrĕch adrung mă Kră Yang rơih boih, na achăng lê̆ dơ̆ng. Lu sư pơjăm kon pơlei Inh, ưh kơ lăng kon pơlei Inh thoi minh pôm dêh char dơ̆ng.”

²⁵ Kră Yang khan: Tơdah Inh ưh kơ pơgơ̆p hăm kơ'năr kơmăng, păng Inh ưh kơ đei ăn tơdrong juăt wei-lăng plĕnh păng teh.

²⁶ Lei Inh gô achăng lê̆ adrĕch adrung Jakôp păng Đawit, đĭch đam Inh, na Inh ưh kơ đei rơih bu lăm kon sâu drŏ-nglo sư wă pơgơ̆r kon sâu Abraham, Isăk păng Jakôp. Tơpă Inh gô ăn kơ lu sư đei pŭn hiôk jơnap păng Inh gô 'mêm mơnat kơ lu sư.”