Je 31 - Sơ̆p Hlabơar Nơ̆r 'Bok Kei-Dei

Bơngai Isơrael wih tơ dêh char lu sư

¹ Kră Yang khan: “Kơplah noh kơnh, Inh boih Kră Yang 'Bok Kei-Dei kơ đĭ-đăng adrĕch Isơrael; păng lu sư jing kon pơlei pơla Inh.”

² Kră Yang khan: “Minh adrĕch adrung klaih đơ̆ng đao gưm đei boih pŭn hiôk lăm char glă, kơplah Inh ăn kơ lu bơngai Isơrael pơdơh hiôk-hian.”

³ Sơ̆ Kră Yang tơ'bôh boih kơ bơ̆n khan: “Inh 'mêm mơnat kơ iĕm hăm tơdrong 'mêm ling-lang hlŏng hloi, Thoi noh na Inh oei wei kơjăp 'mêm kơ iĕm.

⁴ Inh gô pơdơ̆ng ming iĕm, na lu iĕm gô đei dơ̆ng, ơ bơngai Isơrael 'lơ̆ng rơgoh Lu iĕm gô iŏk hơgơ̆r iĕ tơdŭ suang thoi sơ̆ hơdai hăm lu bơngai chơt hiôk.

⁵ Lu iĕm gô pơtăm tơm hơmu tơ kông groi Samari, thoi sơ̆ lu iĕm pơtăm, gô phĕ sa plei.

⁶ Gô đei năr lu bơngai gak tơ kơpal kông Êphraim ôr krao: Iung bĕ bơ̆n tŏk tơ kông Siôn, năm kơkuh kơ Kră Yang, 'Bok Kei-Dei lu bơ̆n!’ ”

⁷ Kră Yang khan: “Bĕ bơ̆n hơri chơt hiôk kơ Jakôp; tơkĕch tơjroh bĕ kơ lu adrĕch adrung gĭt kăl, pôk bơnê pơyom bĕ na khan: ‘Kră Yang dŏng pơklaih boih kon pơlei pơla Sư, lu kon pơlei Isơrael mă oei arih.’

⁸ 'Nâu, Inh gô chông lu sư brŏk đơ̆ng char gah yă-nơ̆m, Inh akŭm pơpôi lu sư đơ̆ng tôch kơ teh đak. Lăm lu sư đei bơngai măt tol, bơngai hơwen, lu drŏ-kăn oei anăp păng drŏ-kăn wă tơpŭ, minh khŭl tơpôl lơlap tơpă gô wih brŏk tơ âu.

⁹ Lu sư brŏk hăm nhơ̆m hmoi, păng krao khan, Inh gô pơlung păng chông ba lu sư, Inh gô bơrơng lu sư rok cheng đak glung, rok trong dơhnă, lu sư huay kơtơih pơ̆k, yua kơ Inh boih 'bă kơ lu adrĕch Isơrael, păng Êphraim kon kơdră Inh.

¹⁰ Mơ̆ng bĕ nơ̆r Kră Yang, ơ kon bơngai jơ̆p kơ dêh char; Ră roi bĕ nơ̆r âu tơ jơ̆p pơlei lăm bŏl đak dơsĭ ataih khan: ‘Kră Yang Tơ'ngla mă pơm ăn kơ adrĕch Isơrael tơklah tơklang, Sư wă akŭm pơpôi ba wih brŏk dơ̆ng, Sư gô wei thoi bơngai wei khŭl triu sư.’

¹¹ Yua kơ Kră Yang đei huai iŏk boih Jakôp păng dŏng pơklaih lu sư đơ̆ng ti lu bơngai pran kơtang hloh.

¹² Lu sư gô năm hơri hiôk chơt tơ anih kơjung kơpal kông Siôn; muh măt lu sư chơt hiôk đơ̆ng Kră Yang ăn pŭn hiôk rơkah rơkai: 'Ba mi, sik hơmu, đak rơmă ôliwơ, kon triu, bơbe, sem dơrong, Jơhngơ̆m lu sư thoi pơgar đak hngôm hơiuh, ưh pă đei sơ'ngon kơ kiơ dơ̆ng.

¹³ Lu adruh hle chơt hiôk suang pơplŏng, lu tơdăm păng lu kră drŏ-nglo kư̆m wang chơt hiôk; Inh gô tơplih tơdrong ơh sơ'ngon lu sư jing tơdrong chơt hiôk, Inh gô pơlung lu sư ăn kơ lu sư tơdrong chơt hiôk tơplih kơ tơdrong ơh sơ'ngon.”

¹⁴ Inh gô ăn kơ lu 'bok soi đei tôm tơmam kăl yua, Lu kon pơlei Inh gô đei tôm tơmam kăl yua rơkah rơkai” Noh Kră Yang khan.

¹⁵ Kră Yang khan: “Tơ pơlei Rama đei kơtơ̆ng nhơ̆m hmoi, nhơ̆m ơh sơ'ngon, noh Rachel nhơ̆m hmoi kơ lu kon sư, hmoi ơh ưh kơ đei bu gơh pơlung sư gah lu kon sư, yua kơ lu kon sư ưh pă đei arih boih.”

¹⁶ Kră Yang khan: “'Nĕ pă nhơ̆m dơ̆ng, lê̆ pă lĕch đak măt, yua kơ tơdrong jang iĕm gô đei apah;” Kră Yang khan: “Lu iĕm gô wih brŏk đơ̆ng char lu bơngai ayăt,”

¹⁷ Kră Yang khan: “Gô đei hơmĕng kơ kon sâu đơ̆ng rŏng, kon sâu lu iĕm gô brŏk tơ char kơdih.

¹⁸ Inh kơtơ̆ng boih bơngai Êphraim nhơ̆m hmoi: ‘Ih phak bơtho inh boih, thoi đe pơjuăt kon rơmo mă tam biơh tah 'long ăt, inh pŭ iŏk boih. Apinh Ih iŏk inh brŏk bĕ, na inh gơh brŏk đei hiôk-hian, yua kơ Ih boih Kră Yang 'Bok Kei-Dei inh,

¹⁹ Tơpă, đơ̆ng rŏng kơ inh weh đơ̆ng Kră Yang, inh tơbral boih; đơ̆ng rŏng kơ inh băt hlôh, inh tŭr kơtơh hmach. Inh mơlâu dêh, Inh pŭ tơdrong mơlâu đơ̆ng pơm yoch đơ̆ng oei tơdăm mơlôh.”

²⁰ “Hăm trŏ Êphraim kon Inh mă 'mêm? Kon inh kơeng? Mă khan dôm wơ̆t boih inh hil kơ sư; inh oei 'blŏk 'brơ̆k mơnat, Tơpă Inh gô mơnat kơ sư.” Noh Kră Yang khan.

²¹ “Pơdơ̆ng bĕ jrăng tơmo wă kơnăl; pơdơ̆ng bĕ gơ'bang wă tơ'bôh trong: Lăng bĕ kơ trong tih, trong noh boih mă lu iĕm yak kiơ̆. Wih brŏk bĕ, ơ bơngai Isơrael, brŏk hơlơ̆k bĕ tơ lu pơlei iĕm!

²² Oei pă dang yơ dơ̆ng lu iĕm oei thông mang. Ơ kon adruh ưh kơ 'blep? Kră Yang đei pơjing boih minh tơdrong 'nao plơ̆ng lăm teh đak: Bơngai drŏ-kăn wei wêr bơngai drŏ-nglo.”

²³ Kră Yang Tih Hloh 'Bok Kei-Dei bơngai Isơrael khan: “Kơplah Inh chông tơwih bơngai bơnă brŏk, lăm char Juđa păng tơ rim pơlei gô khan: ‘Ơ lu anih mă 'lơ̆ng tơpăt Kră Yang, kông rơgoh, apinh Kră Yang ăn kơ anih âu pŭn hiôk!’

²⁴ Lăm char Juđa păng đĭ-đăng lu pơlei lu sư oei hơdai tơ noh, lu bơngai bơ̆jang mir 'ba hăm lu bơngai wei triu.

²⁵ Inh gô ăn kơ lu bơngai gleh lap klaih rơhing păng lu bơngai pă kĕ sa phĭ mah.”

²⁶ Kơplah noh inh hơđơ̆r lăng inh tep hiôk-hian.

²⁷ Kră Yang khan: “Lăm năr tơ anăp âu kơnh Inh gô rei adrĕch kon bơngai hăm adrĕch sem dơrong lăm char Isơrael păng char Juđa.

²⁸ Thoi Inh wei boih lu sư trŏ kơ buch lê̆, pơrăm lê̆, pơlôch păng pơm kơ sư pơmat-tat, Inh gô tơiung pơdơ̆ng gô pơtăm ming.” Noh Kră Yang khan.

²⁹ Lăm năr noh đe ưh pă đei khan: ‘'Bă sa plei hơmu iŭ, na kon sâu sư hơker hơnĕnh.’

³⁰ Mă-lei rim 'nu gô lôch yua kơ yoch sư kơdih; bơngai bu sa plei hơmu iŭ, sư kư̆m hơker mơ̆n.”

³¹ Kră Yang khan: “Khei 'năr gô truh, kơplah noh Inh gô pơgơ̆p 'nao hăm lu bơngai Isơrael păng lu adrĕch Juđa.

³² Nơ̆r pơgơ̆p 'nâu ưh kơ trŏ thoi nơ̆r pơgơ̆p Inh hăm lu 'bok yă lu sư lăm năr mă Inh rôp ti dui tơlĕch lu sư đơ̆ng char Êyiptơ sơ̆, yua kơ lu sư pơrăm lê̆ boih tơdrong pơgơ̆p Inh, mă Inh thoi klo lu sư ră.” Noh Kră Yang khan.

³³ “'Nâu mă nơ̆r Inh gô pơgơ̆p hăm adrĕch Isơrael đơ̆ng rŏng kơ năr noh kơnh,” Kră Yang khan. “Inh gô 'măn tơdrong juăt Inh tơ lăm kơ̆l 'ngok lu sư; păng chih tơdrong juăt Inh tơ lăm jơhngơ̆m lu sư. Inh Kră Yang 'Bok Kei-Dei lu sư na lu sư jing kon pơlei pơla Inh.”

³⁴ Ưh pă đei pơhrăm băl boih lu rông 'bôt sư; păng lu 'nhŏng oh sư khan: Athei băt kơ Kră Yang! Yua kơ đĭ-đăng lu sư gô băt kơ Inh, bơngai pơm iĕ truh tơ bơngai pơm tih Kră Yang khan: “Inh ưh pă jô̆ yo kơ tơdrong lu sư pơm kơnê̆, păng kư̆m ưh pă 'blŏk kơ yoch glăi đêl lu sư pơm.”

³⁵ Kră Yang; Tơ'ngla mă ăn măt 'năr pơchrang hơdah kơ'năr, ăn măt khei sơnglŏng pơchrang gah kơmăng, pơm kơ đak dơsĭ pơpơ̆ poh-yă hơlôk hơlak.” Kră Yang Tih Hloh noh anăn Sư.

³⁶ “Tơdah layơ tơdrong juăt âu hiong đơ̆ng anăp Inh, na kơplah noh adrĕch adrung Isơrael kư̆m hiong hlŏng hloi ưh pă jô̆ minh adrĕch 'bơ̆t anăp Inh.” Noh Kră Yang khan.

³⁷ Kră Yang khan: “Tơdah đei bu gơh pơtŏ lu tăl plĕnh tơ kơpal ti dah gơh lăng băt kơ hơnă tơ ala plei teh sŭng, na kơplah noh, Inh gô achăng lê̆ adrĕch adrung Isơrael, yua kơ tơdrong yoch mă lu sư pơm.” Noh Kră Yang khan.

³⁸ Kră Yang khan: “Gô đei 'năr, pơlei tih đe gô pơdơ̆ng dơ̆ng kơ Inh đơ̆ng Hnam Thôt Hananêl truh tơ 'Măng Jang Mum.

³⁹ Tơlei đe pơtŏ gô dăng tơpăt groi Garet păng dăr truh tơ groi Gôa.

⁴⁰ Jơ̆p lăm thŭng atâu đe lôch păng rơnok kơting, đĭ-đăng chŭn dĭng truh tơ thong đak Kidrôn păng truh tơ mum 'Măng Jang Aseh gah hơlĕch, dôm lu 'noh gô klah 'măn lê̆ pha 'lơ̆ng rơgoh ăn kơ Kră Yang păng pơlei oei oei ling-lang ưh kơ đei bu buch lê̆ păng pơrăm dơ̆ng.”