Je 30 - Sơ̆p Hlabơar Nơ̆r 'Bok Kei-Dei

Bơngai bơnă Isơrael păng Juđa gô wih brŏk

¹ 'Nâu nơ̆r Kră Yang khan kơ Jêrêmi:

² 'Nâu Kră Yang, 'Bok Kei-Dei bơngai Isơrael khan: “Chih răk bĕ lăm sơnôm hla bơar nơ̆r Inh đei bơtho khan kơ ih boih.”

³ Kră Yang khan: “Gô đei năr, Inh gô chông ba kon pơlei Inh bơngai Juđa păng Isơrael wih brŏk đơ̆ng pơm bơnă. Kră Yang khan: “Inh gô ba lu sư brŏk iŏk teh đak mă Inh đei ăn boih kơ lu yă 'bok lu sư.”

⁴ 'Nâu nơ̆r Kră Yang đei khan gah bơngai Isơrael păng Juđa.

⁵ 'Nâu Kră Yang khan: “Inh đei kơtơ̆ng boih nơ̆r ôr krao hli tơrơ, ưh kơ đei hiôk-hian.

⁶ Jet lăng: Hăm trŏ kơ bơngai drŏ-nglo tơpŭ kon hơ'lơ̆p? Lei liơ mă Inh 'bôh bơngai drŏ-nglo kơ'mĭn klak thoi drŏ-kăn wă tơpŭ? Liơ mă muh măt lu sư dreng hơ'blă?

⁷ Ô! Năr noh kơnê̆ krưp tih tơpă, mă ning-mônh kư̆m ưh kơ đei năr kơnê̆ dêh thoi noh. Noh boih năr truh răm kơ Jakôp! Mă-lei Inh gô dŏng lu sư klaih đơ̆ng noh.”

⁸ Kră Yang Tih Hloh khan: “Lăm năr noh Inh gô gơ̆ lê̆ 'long ăt đơ̆ng ako lu sư; păng hrĕch lê̆ tơlei đêl đe chô̆ lu sư, ưh pă pơm đĭch kơ dêh tơmoi dơ̆ng;

⁹ Mă-lei lu sư gô chu yom kơ Kră Yang 'Bok Kei-Dei lu sư, păng Đawit pơtao lu sư, Inh gô atŏk ăn.”

¹⁰ Kră Yang khan: “Ơ Jakôp, ih boih đĭch đam Inh, 'nĕ kơ hli. Ơ Isơrael, 'nĕ pă tơrơ! Inh gô dŏng pơklaih iĕm đơ̆ng dêh ataih, đơ̆ng teh đak iĕm pơm bơnă. Jakôp gô brŏk hiôk-hian, rơnŭk rơnua jang sa, ưh kơ đei hli tơrơ kơ bu dơ̆ng.”

¹¹ Kră Yang khan: “Inh oei păng iĕm, wă dŏng pơklaih iĕm. Inh gô pơlôch pơrăm đĭ lu dêh char, mă Inh đei puh iĕm tơklah tơklang lăm noh, mă-lei Inh huay kơ pơlôch iĕm. Inh gô phak bơtho lu iĕm kiơ̆ kơ tơdrong trŏ, Inh ưh kơ lê̆ ôh phak bơtho lu iĕm.”

¹² Kră Yang khan: “Tơdrong jĭ rơka iĕm ưh pă gơh klaih boih; rơka jĭ iĕm jrŭ dêh.

¹³ Ưh kơ đei bu tơgŭm iĕm, ưh kơ đei pơgang kiơ wă kơ iĕm huay kơ jĭ, rơka jĭ iĕm ưh pă tơsir boih.

¹⁴ Bơngai mă pơgơ̆p hăm iĕm hiơt kơ iĕm boih, lu sư ưh pă hiơ̆k kơ iĕm boih, Inh teh iĕm rơka thoi lu ayăt teh. Inh teh phak lu iĕm kư̆m thoi lu bơngai kơnê̆ phak, Yua kơ tơdrong kơnê̆ iĕm trăp tơpă, tơdrong yoch iĕm lơ dêh.

¹⁵ Liơ iĕm oei ôr krao yua kơ rơka iĕm? Tơdrong jĭ iĕm hơmet pă gơh klaih boih. Yua kơ tơdrong kơnê̆ iĕm trăp dêh, tơdrong yoch iĕm lơ dêh; noh Inh pơm kơ iĕm.

¹⁶ Mă-lei đe bu kăp sa iĕm đe gô kăp sa lu sư; lu bơngai ayăt kơ iĕm gô jing bơnă; bu mă tơgar iŏk tơtông tơmam đơ̆ng iĕm, đe kư̆m gô blah tơgar iŏk đơ̆ng lu sư.”

¹⁷ Kră Yang khan: “Mă khan đe jô̆ iĕm thoi Siôn, đe pă wă lăng. Ưh pă đei bu hiơ̆k. Mă-lei Inh gô pơklaih rơka iĕm. Inh gô hơmet pơklaih rơka jĭ iĕm.

¹⁸ 'Nâu Kră Yang khan: “Inh gô iŏk tơwih bơsŭn anih hnam Jakôp đơ̆ng lu sư pơm bơnă, Inh gô mơnat ăn kơ sơnăm dơnŏ lu sư; pơlei tơm tih đe gô pơdơ̆ng tơ đêl teh so sơ̆, hnam pơtao đe gô pơdơ̆ng trŏ 'bơ̆t anih so sơ̆.

¹⁹ Gô đei nơ̆r hơri bơnê păng chơt hiôk đơ̆ng 'bơ̆r lu sư. Inh gô ăn kơ lu sư rai lơ, ưh pă tŏ sĕt thoi sơ̆. Inh kư̆m ăn kơ đe ư-ang kơ lu sư; ưh pă pơjăm boih.

²⁰ Kon hơ'lơ̆p lu sư kư̆m thoi sơ̆; khŭl adrĕch lu sư gô dơ̆ng kơjăp 'bơ̆t anăp Inh, Inh gô phak pơmat lu bơngai mă pơgŏ pơđep lu sư.

²¹ Lu sư gô đei pơtao lĕch đơ̆ng adrĕch adrung lu sư, Kră pơgơ̆r lu sư kư̆m đei đơ̆ng lăm lu sư. Inh gô krao sư năm jê̆ Inh, wă kơ sư năm jê̆ Inh; yua kơ ưh kơ đei bơngai bu nuih pơ̆n năm jê̆ Inh.” Noh Kră Yang khan.

²² “Thoi ei, na lu iĕm gô jing kon pơlei pơla Inh, Inh gô pơm Kră Yang 'Bok Kei-Dei lu iĕm.

²³ To hơbŭt đơ̆ng Kră Yang, tơdrong Sư hil mĭl, thoi kial hơbŭt tih bah huơ̆r truh tơ kơ̆l lu bơngai pơm kơnê̆.

²⁴ Kră Yang hil ưh kơ ngach dĭng mă truh tơ Sư pơm keh dôm tơdrong mă Sư wă pơm. Lăm năr tôch kơnh, lu iĕm gô băt hlôh hơđăl tơdrong 'nâu.”