Je 28 - Sơ̆p Hlabơar Nơ̆r 'Bok Kei-Dei

Hanania bơngai khan lê̆ adrol hơlĕnh

¹ Lăm sơnăm noh mơ̆n wă khan, lăm chăl Sêđekia 'nao pơtơm pơm pơtao đe Juđa, lăm khei pơđăm sơnăm mă puăn, Hanania kon drŏ-nglo Asur, bơngai khan lê̆ adrol đơ̆ng pơlei Gibeôn, pơma hăm inh lăm hnam Kră Yang 'bơ̆t anăp lu 'bok soi păng đĭ kon pơlei:

² Kră Yang Tih Hloh, 'Bok Kei-Dei bơngai Isơrael khan: “Inh gơ̆ lê̆ boih 'long ăt pơtao Babilôn.

³ Lăm 'bar sơnăm đơ̆ng rŏng, dôm tơmam gĭt lăm hnam Kră Yang mă đêl Nebukatnessar pơtao Babilôn iŏk đơ̆ng anih âu ba tơ char Babilôn, na Inh gô iŏk pơdrâu tơ anih âu.’ ”

⁴ Kră Yang khan: “Inh gô ba brŏk Jêkônia kon drŏ-nglo Jêhôiakim pơtao đe Juđa păng đĭ-đăng lu bơngai Juđa mă đe rôp pơm bơnă tơ Babilôn, kư̆m brŏk tơ anih âu dơ̆ng; yua kơ Inh gơ̆ lê̆ boih 'long ăt pơtao Babilôn.”

⁵ Na, Jêrêmi tơl hloi Hanania 'bok khan lê̆ adrol 'bơ̆t anăp lu 'bok soi păng kon pơlei oei dơ̆ng lăm hnam Kră Yang.

⁶ Jêrêmi 'bok khan lê̆ adrol khan: “Trŏ tơpă apinh Kră Yang pơm bĕ thoi noh; apinh Kră Yang pơm bĕ trŏ thoi nơ̆r ih đei khan lê̆ adrol wă iŏk pơdrâu đĭ đêl dôm tơmam gĭt lăm hnam Kră Yang păng chông ba brŏk đĭ-đăng lu bơngai Juđa đêl pơm bơnă đơ̆ng lăm char Babilôn wih tơ anih âu!

⁷ Lei na mơ̆ng bĕ nơ̆r inh wă pơma hăm ih păng đĭ-đăng kon pơlei pơla âu.

⁸ Lu 'bok khan lê̆ adrol, adrol kơ ih hăm adrol kơ inh, đơ̆ng sơ̆ lu sư khan lê̆ adrol boih kơ tơdrong tơblah wang, tơdrong pơrăm, jĭ lôch hơbuh, pơngot rơwĕt, truh tơ lơ dêh char păng tơ lăm dêh char tih.

⁹ Mă-lei 'bok khan lê̆ adrol ayơ khan hiôk-hian rơnŭk rơnua, dah nơ̆r sư khan noh trŏ 'blep tơpă, 'bok noh đe băt kơ sư noh đơ̆ng Kră Yang wơh tơpă!”

¹⁰ Hanania 'bok khan lê̆ adrol plôh iŏk 'long ăt đơ̆ng ako Jêrêmi 'bok khan lê̆ adrol păng gơ̆ lê̆.

¹¹ Đơ̆ng noh, Hanania tơbăt 'bơ̆t anăp đĭ kon pơlei: “Kră Yang khan: 'Blep lăm 'bar sơnăm Inh gô gơ̆ lê̆ 'long ăt Nebukatnessar pơtao đe Babilôn đơ̆ng ako rim kơ adrĕch adrung.’ ” Jêrêmi 'bok khan lê̆ adrol yak brŏk.

¹² Đơ̆ng rŏng kơ Hanania plôh lê̆ boih 'long ăt đơ̆ng ako Jêrêmi, đei nơ̆r Kră Yang khan kơ Jêrêmi:

¹³ Ih năm khan bĕ kơ Hanania: Kră Yang khan: Ih gơ̆ lê̆ boih 'long ăt pơm păng 'long đơ̆ng Jêrêmi mă-lei Inh gô tơ'băk ăn kôih 'long ăt pơm păng bơsei.”

¹⁴ 'Nâu Kră Yang Tih Hloh, 'Bok Kei-Dei bơngai Isơrael khan: Inh gô tơ'băk 'long ăt păng bơsei tơ ako rim adrĕch adrung âu, wă kơ lu sư pơm đĭch kơ Nebukatnessar pơtao Babilôn păng chu jang kơ sư, mă lu sem bri Inh kư̆m đei jao boih kơ sư.”

¹⁵ Đơ̆ng noh Jêrêmi 'bok khan lê̆ adrol khan kơ Hanania 'bok khan lê̆ adrol: “Ơ Hanania, mơ̆ng bĕ, Kră Yang ưh kơ đei wơh ih ôh, mă-lei ih pơm kơ kon pơlei 'nâu gơnang kơ nơ̆r ih hơlĕnh.

¹⁶ Thoi noh, Kră Yang khan: 'Nâu; Inh gô ba ih weh đơ̆ng kơpal teh âu; sơnăm âu ih gô lôch; yua kơ ih đei pơma iung blah hăm Kră Yang.”

¹⁷ Lăm sơnăm noh hloi khei tơpơh, Hanania 'bok khan lê̆ adrol lôch.