Je 26 - Sơ̆p Hlabơar Nơ̆r 'Bok Kei-Dei

Đe sek wă pơlôch Jêrêmi

¹ Kơplah Jêhôiakim, kon drŏ-nglo Jôsia, pơtao đe Juđa, pơtơm pơgơ̆r, Kră Yang khan kơ Jêrêmi nơ̆r 'nâu.

² Kră Yang khan: “Ih athei dơ̆ng 'bơ̆t cham hnam Kră Yang, roi tơbăt ăn kơ đĭ-đăng bơngai đơ̆ng lu pơlei Juđa năm kơkuh kơ Kră Yang tơ hnam akŭm; roi tôm nơ̆r Inh đei roi tơbăt kơ ih, ih 'nĕ kơ hŭt lê̆ minh nơ̆r ayơ.

³ Băt lu sư gô mơ̆ng ih, na rim 'nu gô weh đơ̆ng tơdrong kơnê̆ wih tơ Inh, na Inh gô tơplih đon tơdrong Inh wă pơrăm lu sư, yua kơ tơdrong yoch kơnê̆ lu sư pơm.

⁴ Ih athei khan kơ lu sư: Kră Yang khan thoi âu: ‘Tơdah iĕm kuă kơ mơ̆ng nơ̆r Inh păng kuă kơ kiơ̆ tơdrong juăt Inh đei ăn boih kơ lu iĕm;

⁵ păng tơdah lu iĕm ưh kơ wă mơ̆ng dôm nơ̆r đơ̆ng lu đĭch đam Inh, mă lu bơngai khan lê̆ adrol, Inh ling-lang wơh lu sư năm truh tơ iĕm, mă-lei lu iĕm kư̆m kuă kơ mơ̆ng lu sư,’ ”

⁶ na Inh gô pơm ăn kơ hnam akŭm âu thoi Inh đei pơm boih kơ pơlei Silô, na đĭ-đăng dêh char lăm teh gô hiap pơlei Inh âu.

⁷ Lu 'bok soi, lu 'bok khan lê̆ adrol păng đĭ-đăng kon pơlei pơla kơtơ̆ng Jêrêmi khan roi dôm tơdrong noh lăm hnam Kră Yang.

⁸ Đang kơ Jêrêmi roi tơbăt dôm nơ̆r Kră Yang athei sư roi tơbăt ăn kơ kon pơlei pơla, lu 'bok soi lu bơngai khan lê̆ adrol păng lu kon pơlei rôp sư păng khan: Ih trŏ kơ lôch!

⁹ “Liơ ih pơ̆n yua anăn Kră Yang pơma lê̆ adrol khan: Hnam akŭm âu gô thoi Silô, pơlei âu gô juơ ưh kơ đei bơngai oei?” Na đĭ-đăng kon pơlei akŭm wang Jêrêmi lăm hnam Kră Yang.

¹⁰ Lu kră pơgơ̆r dêh Juđa kơtơ̆ng tơdrong noh, lĕch đơ̆ng hnam pơtao năm tơ hnam Kră Yang păng hơ-oei sek tơlang 'bơ̆t 'Măng Jang 'Nao hnam Kră Yang.

¹¹ Lu 'bok soi, lu 'bok khan lê̆ adrol, pơma hăm lu kră pơgơ̆r păng đĭ-đăng kon pơlei pơla khan: Bơngai âu trŏ kơ pơlôch, yua kơ sư đei pơma khan lê̆ adrol wă pơm kơ pơlei âu, đon lu iĕm đei kơtơ̆ng boih.

¹² Jêrêmi tơl lu kră pơgơ̆r păng lu kon pơlei: “Noh jơ̆ đơ̆ng Kră Yang wơh athei inh năm roi khan lê̆ adrol kơ tơdrong wă pơm kơ hnam akŭm păng pơlei tih âu, mă iĕm đei kơtơ̆ng boih.

¹³ Na dang ei iĕm athei tơplih tơdrong arih iĕm păng tơdrong jang iĕm, mơ̆ng kiơ̆ bĕ nơ̆r Kră Yang 'Bok Kei-Dei lu iĕm, na Kră Yang gô tơplih đon tơdrong wă pơm kơ lu iĕm. Sư đei khan lê̆ adrol kơ lu iĕm băt.

¹⁴ Bĕ gah inh, inh âu, lăm tơpang ti lu iĕm, pơm bĕ kơ inh kiơ̆ thoi lu iĕm khan trŏ khan lăp.

¹⁵ Iĕm athei băt mă tơpă dah lu iĕm pơlôch inh lu iĕm, pơlei tih âu, đĭ kon pơlei pơla oei lăm pơlei tih âu gô pŭ pham inh mă ưh kơ đei yoch âu. Yua kơ Kră Yang tơpă mă đei wơh inh năm tơ iĕm, ăn kơ inh roi tơbăt dôm lu nơ̆r âu tơ lăm đon iĕm kơtơ̆ng.”

¹⁶ Lu kră pơgơ̆r păng đĭ kon pơlei pơla khan hloi kơ 'bok soi hăm 'bok khan lê̆ adrol: “Ưh kơ gơh pơlôch bơngai âu, yua kơ sư yua anăn Kră Yang, 'Bok Kei-Dei bơ̆n roi tơbăt kơ bơ̆n.”

¹⁷ Đei lu mơ'nah lăm lu kră wei-lăng lăm char ei kư̆m iung pơma khan kơ đĭ-đăng tơpôl mă oei akŭm băl.

¹⁸ Mika pơlei Môrêsêt, bơngai khan lê̆ adrol lăm chăl Hesekia, pơtao đe Juđa, kư̆m đei khan lê̆ adrol hăm lu bơngai Juđa: ‘Kră Yang Tih Hloh khan: Siôn đe gô choh rơuơ thoi chŭn, Jêrusalem gô pơchah răm jing juơ, păng kông đe man hnam akŭm jing bri kơdrơ̆ng.’

¹⁹ ‘Hesekia, pơtao đe Juđa păng đĭ kon pơlei Juđa wă pơlôch Mika mơ̆n hă? Ưh kơ trŏ yua kơ pơtao hli yom kơ Kră Yang, na krao apinh Kră Yang mơnat ăn; na Kră Yang tơplih đon huay kơ pơrăm lu sư thoi Kră Yang pơkă wă pơrăm lu sư. Bĕ lu bơ̆n 'nâu pă 'biơ̆ wă pŭ iŏk tơdrong pơrăm kơ lu bơ̆n kơdih.’ ”

²⁰ Kŭm đei minh 'nu bơngai nai dơ̆ng kư̆m yua anăn Kră Yang khan lê̆ adrol; noh Uri, kon drŏ-nglo Sêmaia đơ̆ng pơlei Kiriat Jêrim. Kŭm đei khan lê̆ adrol kơ tơdrong wă pơrăm pơlei tih păng char âu trŏ thoi nơ̆r Jêrêmi đei khan.

²¹ Pơtao Jêhôiakim, đĭ-đăng yŏng linh păng lu kră pơgơ̆r đei kơtơ̆ng nơ̆r Uri boih, pơtao wă pơlôch sư; mă-lei Uri kơtơ̆ng, hli dêh na kơdâu ôn tơ char Êyiptơ.

²² Pơtao Jêhôiakim wơh Êlnathan kon drŏ-nglo Akbôr hăm lu bơngai nai năm hơdai sư tơ dêh char Êyiptơ.

²³ Lu sư rôp anhăk Uri đơ̆ng Êyiptơ ba tơ pơtao Jêhôiakim. Pơtao pơlôch sư hăm đao gưm klơ̆m lê̆ atâu sư tơ bơsat kon pơlei hmă.

²⁴ Mă-lei Ahikam kon drŏ-nglo Saphan pơma dŏng Jêrêmi, na đe ưh kơ ăn kon pơlei pơlôch ôh.