Je 25 - Sơ̆p Hlabơar Nơ̆r 'Bok Kei-Dei

Tơpơh-jĭt sơnăm pơm bơnă

¹ Kră Yang khan kơ Jêrêmi gah tơdrong wă truh kơ adrĕch adrung Juđa lăm sơnăm mă puăn chăl Jêhôiakim, kon drŏ-nglo Jôsia, pơtao đe Juđa, noh lăm sơnăm blŭng-a chăl Nebukatnessar pơm pơtao dêh char Babilôn.

² Na Jêrêmi 'bok khan lê̆ adrol roi tơbăt nơ̆r 'nâu 'bơ̆t anăp adrĕch bơngai Juđa hăm đĭ-đăng kon pơlei Jêrusalem:

³ “Đơ̆ng sơnăm mă mơjĭt-pêng lăm chăl Jôsia, kon drŏ-nglo Ammôn, pơtao đe Juđa dĭng truh dang ei đei 'bar-jĭt pêng sơnăm, nơ̆r Kră Yang pơma hăm inh. Đơ̆ng năr noh, inh iung đơ̆ng hrôih ling-lang roi tơbăt kơ iĕm, mă-lei iĕm ưh kơ wă mơ̆ng.

⁴ Kră Yang oei gô wơh đĭch đam sư, lu bơngai khan lê̆ adrol, năm roi tơbăt ăn kơ lu iĕm, mă-lei iĕm kuă kơ mơ̆ng, kư̆m ưh kơ 'maih wă pơgling đon mơ̆ng.

⁵ Lu sư khan: ‘Rim 'nu kơ lu iĕm athei weh đơ̆ng tơdrong kơnê̆, achăng lê̆ bĕ tơdrong pơm yoch kơnê̆, na lu iĕm gô oei lăm teh đak Kră Yang ăn boih kơ lu iĕm păng lu 'bok yă iĕm sơ̆ khơ̆ ning-mônh hlŏng hloi.

⁶ 'Nĕ kơ kiơ̆ kơkuh păng jang kơ lu yang nai, 'nĕ iŏk tơmam iĕm chă pơm păng ti na tơblĕk Inh dơ̆ng, lei Inh huay kơ ăn tơdrong răm truh kơ iĕm.’

⁷ Kră Yang khan: ‘Mă-lei lu iĕm ưh kơ wă mơ̆ng nơ̆r Inh, rai tơblĕk Inh hăm tơmam đơ̆ng ti lu iĕm pơm na pŭ iŏk tơdrong pơrăm iĕm kơdih.’

⁸ Thoi noh na, Kră Yang Tih Hloh khan: ‘Yua kơ lu iĕm kuă kơ mơ̆ng nơ̆r Inh,

⁹ 'nâu, Inh gô krao đĭ adrĕch adrung gah yă-nơ̆m păng đĭch đam Inh Nebukatnessar pơtao Babilôn,’ Kră Yang khan: ‘Inh gô ba lu sư blah iŏk dêh char âu hăm lu kon pơlei oei lăm char âu păng pơm kơ lu kon pơlei oei tăp dăr kơ char âu hai. Inh gô pơrăm đĭ lu sư, pơm kơ lu sư đe lăng 'brơ̆ krưp, đe pơjăm păng hiong răm hlŏng hloi.

¹⁰ Hloh kơ noh, Inh gô pơm ăn kơ lu sư pă đei kơtơ̆ng nơ̆r đe hơri chơt hiôk, pă đei kơtơ̆ng nơ̆r keng đe hlôm pơchơt păng pă đei nơ̆r hiĕk chhôk chă klo akăn, kư̆m pă đei kơtơ̆ng re tơpăl đe peh 'ba păng kư̆m pă đei hơdah ŭnh kơđeng.

¹¹ Jơ̆p kơ teh âu jing juơ, đĭ kon pơlei lăm dêh char âu gô bơ̆jang kơ pơtao Babilôn lăm tơpơh-jĭt sơnăm.”

¹² Kră Yang khan: “Mưh đĭ kơ tơpơh-jĭt sơnăm noh boih, Inh gô phak pơtao Babilôn păng kon bơngai lăm char noh, yua kơ tơdrong yoch lu sư. Inh gô phak char bơngai Kalđê pơm ăn kơ char noh jing juơ hlŏng hloi.

¹³ Inh gô pơm kơ char noh thoi nơ̆r Inh đei pơma, nơ̆r mă đei chih răk boih lăm sơ̆p hla bơar âu, noh đơ̆ng nơ̆r Jêrêmi khan lê̆ adrol pơm kơ đĭ-đăng adrĕch.

¹⁴ ‘Mă lu sư kư̆m gô pơm đĭch kơ lu dêh char pran kơtang lu pơtao tih mơng Inh gô pơm tơwih kơ lu sư thoi lu sư đei pơm păng kiơ̆ kơ tơdrong jang đơ̆ng ti lu sư pơm.”

Kơchŏk Kră Yang 'Bok Kei-Dei hil

¹⁵ Kră Yang 'Bok Kei-Dei Isơrael khan kơ inh: “Iŏk bĕ kơchŏk 'bĕnh kơ sik Inh mĭl đơ̆ng ti Inh, pơhuch bĕ đĭ-đăng kơ adrĕch adrung mă Inh wơh ih năm tơ yơ athei huch sik noh.

¹⁶ Lu sư gô huch, suai wơnh yak nơnăm mơngưt mơngat, yua kơ đao gưm mă Inh đei ăn truh tơ lăm lu sư.”

¹⁷ Thoi ei na inh iŏk kơchŏk sik đơ̆ng ti Kră Yang păng pơhuch ăn kơ đĭ-đăng adrĕch adrung mă Kră Yang wơh inh năm huch sik lăm kơchŏk noh:

¹⁸ Pơlei tih Jêrusalem păng lu pơlei lăm char Juđa, ăn kơ lu pơtao lu yŏng pơgơ̆r, pơm ăn kơ lu sư răm jing rơ̆m rĕk, đe pơjăm đe blei hiap, đe lăng lu sư 'brơ̆ krưp thoi hrei 'nâu.

¹⁹ Pharaôn, pơtao dêh Êyiptơ, đĭ-đăng lu đĭch đam sư, đĭ-đăng lu kră pơgơ̆r păng lu kon pơlei sư.

²⁰ Păng đĭ-đăng kơ lu tơmoi lăm char noh lu pơtao char Us, ăn kơ lu pơtao char Philistin, lăm noh đei pơlei Askalon, pơlei Gasa, Ekrôn păng lu bơngai mă oei arih lăm pơlei Asdôt.

²¹ Char Eđôm, char Môap ăn kơ adrĕch adrung Ammôn.

²² Ăn đĭ kơ lu pơtao Tirơ, kơ lu pơtao oei lăm Siđôn păng kơ lu pơtao oei lăm bŏl đak dơsĭ.

²³ Ăn đĭ kơ pơlei Đêdan, Têma, kơ Bus, ăn kơ lu bơngai hơkôih sŏk kơ̆l.

²⁴ Ăn kơ lu pơtao Arâp, ăn kơ lu pơtao rim dêh char nai oei hơbĭ lăm char glă.

²⁵ Ăn đĭ kơ rim pơtao Simri, đĭ-đăng pơtao char Êlam, ăn kơ lu pơtao char Mêđi.

²⁶ Ăn đĭ kơ pơtao gah yă-nơ̆m, oei jê̆ dah ataih, ăn kơ đĭ-đăng dêh char kơpal teh. Đơ̆ng noh ăn kơ Pơtao Sêsach kư̆m huch sik lăm kơchŏk noh.

²⁷ “Ih khan bĕ kơ lu sư: Kră Yang Tih Hloh 'Bok Kei-Dei Isơrael, khan: ‘Huch bĕ mă suai, hăk lê̆, pơ̆k lê̆ pă iung, yua kơ đao gưm Inh ăn truh tơ lu iĕm!

²⁸ Mă-lei tơdah lu sư ưh kơ chu iŏk kơchŏk sik đơ̆ng ti ih na huch, lei ih khan kơ lu sư: “Kră Yang Tih Hloh khan: Iĕm athei huch!

²⁹ 'Nâu, Inh wă ăn tơdrong gleh truh kơ pơlei tih krao anăn Inh. Bĕ lu iĕm, Inh wă lê̆ kơ phak hă? Ưh ôh! Inh gô phak lu iĕm, yua kơ Inh gô ăn đao hơlă truh tơ đĭ-đăng adrĕch adrung oei kơpal teh,’ ” Noh Kră Yang Tih Hloh khan.

³⁰ “Gah ih, roi tơbăt lê̆ bĕ dôm nơ̆r wă blah lu sư âu păng khan: ‘Kră Yang gô ôr tơkĕch đơ̆ng anih tơ kơpal; đơ̆ng anih 'lơ̆ng rơgoh Sư, sư gô ôr kơtang wă pơm kơ teh Sư, ôr jreo tơkĕch thoi đe pơjuă plei hơmu, Sư blah pơm kơ đĭ-đăng kon bơngai oei kơpal teh đak âu.

³¹ Đe gô kơtơ̆ng nơ̆r tơjrông tơjrang tơ tôch kơ teh, yua kơ Kră Yang gô sek đĭ kơ adrĕch adrung, Sư wă phak đĭ-đăng kon bơngai, Sư pơjao ăn lu bơngai kơnê̆ lôch kơ đao gưm.’ ” 'Noh Kră Yang khan.

³² 'Nâu nơ̆r Kră Yang Tih Hloh khan: “'Nâu, tơdrong pơrăm truh tơ jơ̆p-jang đơ̆ng dêh char âu truh tơ dêh char nai; hơbŭt hơbang tih lĕch đơ̆ng anih tôch kơ teh đak.”

³³ Lăm năr noh akâu atâu bơngai mă Kră Yang pơlôch 'bĕnh-'bang jơ̆p kơ teh đơ̆ng gah âu truh tơ gah to, ưh kơ đei bu hmoi, ưh kơ đei bu 'bŭ hơmet, gô pơm mơ̆r kơ teh!

³⁴ “Ơ lu bơngai wei triu, nhơ̆m hmoi bĕ, ôr krao bĕ! Ơ tơ'ngla triu tơgrŏl pơpơ̆ bĕ yua kơ truh boih năr đe pơlôch lu iĕm, lu iĕm gô pơ̆k lôch thoi gŏ teh gĭt pơchah.

³⁵ Lu bơngai wei triu ưh pă đei trong ayơ gơh klĕnh, Lu tơ'ngla triu kư̆m ưh pă đei trong ayơ gơh klaih.

³⁶ Ei! Lu bơngai wei triu ôr, lu tơ'ngla triu nhơ̆m hmoi; Kră Yang pơrăm lê̆ goh tơmăn 'nhĕt lu sư.

³⁷ Hơdrong triu hiôk-hian kư̆m pơrăm đĭ, đơ̆ng tơdrong Kră Yang hil mĭl.

³⁸ Thoi dăm-brang sư lĕch boih đơ̆ng anih sư. Teh đak lu sư gô jing juơ, yua kơ đao gưm han tơpă pơm kơ lu sư. Păng yua kơ tơdrong Kră Yang hil mĭl.