Je 17 - Sơ̆p Hlabơar Nơ̆r 'Bok Kei-Dei

Tơdrong yoch bơngai Juđa

¹ Tơdrong yoch bơngai Juđa đe chih răk boih hăm 'long chih bơsei, chhơ̆ hăm pla tơmo jơmŏng, tơ gơ'bang lăm jơhngơ̆m lu sư, Păng chih tơ kơpal hơke tơ mum chơnang soi lu sư.

² Kon sâu lu sư kư̆m 'blŏk dơ̆ng kơ chơnang soi păng lu gơ̆ng rup yang Asêra mă đêl lu sư pơm, Tơ yơ̆p 'long hơmŭl. Tơ grôn groi kơjung.

³ Ơ Kông Inha kơpal teh dơnă, Inh gô ăn kơ lu linh ayăt tơgar iŏk đĭ, Lu hu maih păng mŭk tơmam gĭt hăm anih kơjung ih, yua kơ tơdrong yoch lu iĕm đei pơm tơ jơ̆p-jang tơring.

⁴ Lu iĕm gô hiong mŭk tơmam mă đơ̆ng Inh ăn noh. Inh gô jao iĕm jang kơ lu bơngai ayăt kơ iĕm, tăm minh pôm teh đak mă lu iĕm tam lah băt; yua kơ lu iĕm pơgơ̆p ŭnh tơdrong Inh hil rai dêh, ŭnh gô sa khơ̆ng ling-lang ưh kơ păt.

⁵ Kră Yang khan: “Hiap bĕ lu bơngai mă gơnang tơduă kon bơngai, hơđơ̆ng gơnang kơ sĕch akar pơm jơhngơ̆m pran kơtang. Lăm jơhngơ̆m achăng tŭk Kră Yang.

⁶ Sư nhen thoi tơnơm 'long lăm bri, chăt tơ anih tơmo hơga lăm char glă. Lăm teh 'băt 'boh, ưh kơ đei bơngai oei. Bơngai noh ưh kơ đei 'bôh pŭn hiôk truh.

⁷ Pŭn hiôk dêh kơ bơngai bu mă lui gơnang kơ Kră Yang, Păng hơmĕng hơđơ̆ng kơ Kră Yang.

⁸ Bơngai noh nhen thoi tơm 'long pơtăm cheng đak, Chăt rơh cheng đak krong, mă khan tŏ phang ưh kơ hli, hla ưh kơ đei jô kro oei arih 'lơ̆ng. Mă tơ'bơ̆p hĭ bơyan tŏ phang kư̆m huay kơ tơtăm, oei plei hơnơ̆ng ưh kơ pơdơh.”

⁹ Jơhngơ̆m kon bơngai hơlĕnh pơdăr hloh kơ đĭ-đăng, păng kơnê̆ răm tơpă; Bu kĕ băt jơhngơ̆m kon bơngai?

¹⁰ Inh boih Kră Yang, Inh lăng 'bôh lăm jơhngơ̆m, pơlong lăng jơhngơ̆m đon tơchĕng, wă pơm tơwih kơ rim 'nu kiơ̆ thoi trong lu sư arih, kiơ̆ 'blep thoi đêl tơdrong lu sư pơm.

¹¹ Bơngai mă mơdrŏng đơ̆ng ưh kơ tơpăt, lu sư thoi sem trăk-tra 'nơ̆m kơtăp sem nai, đei cheh kon ưh kơ trŏ kon sư, ưh kơ đunh tơdrong mơdrŏng sư gô hiong đĭ, na tuch-luch đe jô̆ sư kơtul bơlŭk.

¹² Tang-dŏ Pơtao mă đe ư-ang đei pơjing boih đơ̆ng blŭng-a, noh anih rơgoh mă lu bơ̆n kơkuh pơyom.

¹³ Ơ Kră Yang, Ih boih anih hơmĕng tơm kơ bơngai Isơrael, lu bơngai bu achăng lê̆ Ih gô mơlâu! Bơngai bu weh đơ̆ng Inh, chih jô̆ anăn lu sư gah anih lôch, yua kơ lu sư achăng lê̆ Kră Yang mă tu đak glung arih ling-lang.

¹⁴ Ơ Kră Yang apinh Ih ming pơklaih inh, na inh gơh klaih; apinh Ih dŏng pơklaih inh na inh gơh klaih: Ih boih mă Tơ'ngla inh bơnê ư-ang.

¹⁵ 'Nâu nơ̆r đe oei khan kơ inh: ‘Tơ yơ nơ̆r đơ̆ng Kră Yang khan? Pơsĭt bĕ âu!’

¹⁶ Inh ưh kơ sơngah păng kơdâu đơ̆ng tơdrong jang wei-lăng kon triu Ih. Inh ưh kơ wă Ih tuh ăn tơdrong pơmat, Ih băt boih dôm nơ̆r đơ̆ng 'bơ̆r inh pơma 'bơ̆t anăp Ih ngăl.

¹⁷ Ih boih jơ̆ anih mă inh kơ'nơp năr đei tơdrong pơmat-tat truh, 'Nĕ pă pơm kơ inh hli tơrơ!

¹⁸ Apinh Ih pơm kơ lu bơngai rôp pơmat inh mơlâu, mă-lei 'nĕ ăn kơ inh mơlâu; ăn kơ lu sư hli tơrơ, mă-lei 'nĕ ăn kơ inh hli tơrơ! Ăn kơ năr gleh pơmat truh kơ lu sư; apinh Ih pơrăm lu sư hloh kơ 'bar wơ̆t.”

Wei năr Sa'bat mă 'lơ̆ng rơgoh

¹⁹ Kră Yang khan kơ inh thoi âu: “Năm bĕ, dơ̆ng tơ 'măng jang kon pơlei, 'măng jang lu pơtao Juđa ngăl mơ̆t lĕch păng tơ rim 'măng jang pơlei Jêrusalem.

²⁰ Khan bĕ kơ lu sư: ‘Ơ lu pơtao đe Juđa, hăm đĭ bơngai Juđa păng đĭ-đăng kon pơlei oei lăm pơlei Jêrusalem, lu bơngai yak rok mơ̆t; lĕch trong 'nâu, mơ̆ng bĕ nơ̆r Kră Yang.’ ”

²¹ Kră Yang khan thoi âu: “Tơdah lu iĕm wă arih lu iĕm athei kơchăng, 'nĕ pă tung, pŭ tơmơ̆t trong 'măng dur pơlei Jêrusalem, lăm năr Sa'bat.

²² Lăm năr Sa'bat, 'nĕ kơ pŭ dah tung tơmam kiơ đơ̆ng lăm hnam iĕm, dah 'nĕ kơ jang kiơ; mă-lei athei 'măn năr Sa'bat jing năr giĕng 'lơ̆ng rơgoh, thoi Inh đei tơtă khan kơ lu 'bok yă iĕm sơ̆.

²³ Mă-lei, lu sư ưh kơ wă mơ̆ng; ưh kơ wă pơgling đon; arăng kơ̆l ưh kơ wă mơ̆ng păng kư̆m ưh kơ wă chu Inh bơtho.”

²⁴ Kră Yang khan: “Tơdah lu iĕm 'maih mơ̆ng Inh, tơdah iĕm ưh pă đei pŭ dah tung tơmam rok trong 'măng jang pơlei âu lăm năr Sa'bat, mă-lei lu iĕm 'măn lê̆ năr Sa'bat noh jing năr 'lơ̆ng rơgoh, ưh kơ jang tơdrong kiơ lăm năr noh,

²⁵ lei na lu pơtao hơ-oei tơ tang-dŏ pơtao Đawit gô hao gre aseh hao aseh hơdai hăm lu yŏng pơgơ̆r, lu bơngai Juđa hăm lu kon pơlei oei lăm Jêrusalem mơ̆t trong 'măng dur pơlei 'nâu; păng pơlei 'nâu oei đei bơngai oei ling-lang.

²⁶ Đei bơngai gô truh đơ̆ng lu pơlei Juđa păng truh đơ̆ng jơ̆p-jang pơlei iĕ tăp dăr kơ pơlei Jêrusalem, đơ̆ng lăm char Bênjamin, đơ̆ng tơnăp groi, gah bơmơ̆t, đơ̆ng kông groi, đơ̆ng char glă gah gơal, wă chĕp tơmam soi 'buh, lu tơmam soi thoi phe, 'ba, tơmam 'bâu phu păng tơmam soi bơnê tơ hnam Kră Yang.

²⁷ Mă-lei tơdah lu iĕm kuă kơ mơ̆ng Inh, ưh kơ 'măn năr Sa'bat pơm năr giĕng 'lơ̆ng rơgoh păng pŭ tung tơmam kiơ yak rok trong 'măng jang pơlei Jêrusalem, lei Inh gô dan ŭnh 'bơ̆t 'măng jang pơlei tih, ŭnh noh gô sa pơrăm lu hnam tih kơjăp lăm pơlei tih Jêrusalem, ưh kơ đei layơ gơh păt.”