Je 16 - Sơ̆p Hlabơar Nơ̆r 'Bok Kei-Dei

Năr tơdrong răm truh

¹ Kră Yang khan kơ inh:

² “Ih 'nĕ kơ chă akăn, kư̆m 'nĕ pơjing kon hơ'lơ̆p drŏ-nglo dah drŏ-kăn lăm anih âu.”

³ Yua kơ Kră Yang khan gah lu kon drŏ-nglo kon drŏ-kăn mă tơpŭ tơ lăm dêh char âu păng kư̆m khan gah kơ lu mĕ 'bă mă tơpŭ kơ lu sư lăm char âu:

⁴ “Lu sư gô lôch hơbuh krưp dêh; ưh kơ đei bu hmoi ưh kơ đei bu 'bŭ lu sư, akâu bơngai lôch jing mơ̆r kơ teh. Lu sư gô lôch kơ đao gưm păng lôch kơ pơngot rơwĕt. Akâu lôch lu sư gô ăn kơ sem păr păng sem bri sa.”

⁵ “Kră Yang khan: Ih 'nĕ kơ mơ̆t tơ lăm hnam lôch; ih 'nĕ kơ năm ngôi hơpong păng kư̆m 'nĕ kơ pơlung lu sư; yua kơ Inh pơdrâu lê̆ boih tơdrong hiôk tơdrong 'mêm mơnat Inh đơ̆ng kon pơlei âu.” Noh Kră Yang khan.

⁶ “Đĭ bơngai pơm tih păng bơngai hmă gô lôch lăm teh đak âu. Ưh kơ đei bu 'bŭ păng kư̆m ưh kơ đei bu nhơ̆m hmoi kơ lu sư. Ưh kơ đei bu raih akâu dah yuă sŏk yua kơ lu sư.

⁷ Ưh kơ đei bu chĕp por 'nhot năm sŏng sa hơdai pơlung yua kơ đei bơngai lôch, kư̆m ưh kơ đei bu hling đak nhă pơlung lu sư sơ'ngon kơ mĕ dah 'bă lu sư lôch.

⁸ Ih kư̆m 'nĕ kơ et sa ngôi hơdai lu sư.”

⁹ 'Nâu Kră Yang Tih Hloh 'Bok Kei-Dei bơngai Isơrael khan: “'Nâu 'bơ̆t anăp măt lu iĕm, lăm chăl arih iĕm, Inh gô pơtôch lê̆ chơt hiôk lăm char âu. Kŭm ưh pă đei nơ̆r ŏng mai hiĕk chơt hiôk năr pơkong klo kăn dơ̆ng.

¹⁰ Layơ ih roi ăn kơ đĭ-đăng kon pơlei dôm tơdrong âu, tơpă lu sư gô jet ih: ‘Liơ Kră Yang roi tơbăt ăn wă đei tơdrong răm truh kơ lu nhôn? Lu nhôn pơm tơdrong yoch kiơ? Lu nhôn đei pơm tơdrong glăi kiơ hăm Kră Yang 'Bok Kei-Dei lu nhôn?’

¹¹ Ih athei khan kơ lu sư: ‘Kră Yang khan. Yua kơ yă 'bok lu iĕm achăng lê̆ Inh boih, na kiơ̆ lu yang nai, jang ăn păng drap kơkuh kơ lu yang noh. Lu sư achăng lê̆ Inh ưh pă wei răk dôm khôi juăt Inh.

¹² Gah lu iĕm kư̆m yoch kơnê̆ hloh kơ lu yă 'bok lu iĕm sơ̆, yua kơ rim 'nu lu iĕm yak kiơ̆ trong jơhngơ̆m kơnê̆ păng arăng kơ̆l lu iĕm, ưh pă wă mơ̆ng nơ̆r Inh.

¹³ Na Inh gô pơpuh klơ̆m hŭt lê̆ lu iĕm đơ̆ng char âu, mơ̆t tơ lăm minh pôm char mă lu iĕm păng 'bok yă lu iĕm ưh kơ tam biơh băt. Tơ noh lu iĕm gô jang kơ lu yang nai măng năr; na Inh ưh pă mơnat kơ lu iĕm boih.

¹⁴ Kră Yang khan: “Gô đei năr ưh pă đei bu pơma thoi âu dơ̆ng: ‘Tơpă thoi Kră Yang arih, Tơ'ngla mă chông anhăk kon pơlei Isơrael đơ̆ng dêh Êyiptơ,’

¹⁵ mă-lei đe pơma khan: ‘Sĭt thoi Kră Yang arih, Tơ'ngla đei chông anhăk tơlĕch bơngai Isơrael đơ̆ng char gah yă-nơ̆m păng đơ̆ng đĭ-đăng char mă đêl Sư pơpuh tơweh lu sư,’ yua kơ Inh gô ba lu sư brŏk tơ char lu sư, char mă Inh đei ăn boih kơ 'bok yă lu sư.”

¹⁶ Kră Yang khan: “'Nâu, Inh gô wơh lơ bơngai traih ka, wă kơ chă traih rôp lu sư, đơ̆ng noh Inh gô wơh lơ bơngai lua wă kơ chă lua lu sư đơ̆ng jơ̆p kơ kông groi dah lăm hơgơp tơmo.

¹⁷ Măt Inh oei kiơ̆ lăng trong lu sư yak; ưh kơ đei hlơp kơ Inh ôh. Tơdrong yoch kơnê̆ lu sư kư̆m ưh kơ gơh ôn đơ̆ng măt Inh.

¹⁸ Inh gô pơm 'mong kơ lu sư 'bar wơ̆t hloh, tơdrong yoch kơnê̆ lu sư pơm, yua kơ lu sư pơm 'mê̆-'mach kơ teh đak păng tơdrong jang Inh 'bĕnh hăm akâu lôch lu tơmam Inh areh,

¹⁹ Ơ Kră Yang, Ih boih ăn kơ inh jơhngơ̆m pran kơtang, kơđông kơjăp inh. Anih mă inh kơ'nơp lăm năr pơmat-tat. Lu kon bơngai đơ̆ng tôch kơ teh đak gô năm kơkuh kơ Ih păng khan: “'Bok yă lu nhôn kơkuh kơ yang chă pơm, ưh kơ đei yua kiơ, ưh kơ đei tơgŭm kiơ.

²⁰ Kon bơngai hăm gơh pơm yang kơdih sư? Noh rup đĕch, ưh kơ yang ôh.”

²¹ Thoi noh, Inh gô ăn kơ lu sư băt, Inh tơ'bôh ăn kơ lu sư băt minh wơ̆t tôm boih, tơdrong mơsêh Inh; tơdrong pran kơtang Inh. Lu sư gô băt Anăn Inh jơ̆ Kră Yang.