Je 14 - Sơ̆p Hlabơar Nơ̆r 'Bok Kei-Dei

Khan lê̆ adrol gô phang-ang

¹ 'Nâu nơ̆r Kră Yang khan kơ Jêrêmi kơ tơdrong wă đei phang-ang.

² “Char Juđa ơh sơ'ngon, lu pơlei tih sư kư̆m ơh ăk, kon pơlei nhơ̆m hmoi drap tơ teh, Kơtơ̆ng nơ̆r ôr krao đơ̆ng pơlei Jêrusalem.

³ Lu yŏng tơ'ngla wơh lu đĭch đam sư năm chă đak, lu sư năm tơ sơlŭng đak mă-lei ưh kơ đei 'bôh đak, lu sư wih brŏk ge hoh; lu yŏng tơ'ngla mơlâu hlơ̆l, gom lê̆ kơ̆l lu sư.

⁴ Teh kro hơđang đĭ, yua kơ ưh pă đei 'mi jur boih tơ teh, lu bơngai jang mir 'ba ơh sơ'ngon na gom kơ̆l lu sư.

⁵ Juei akăn 'nao tuh kon, kư̆m achăng lê̆ kon sư, yua kơ ưh kơ đei 'nhĕt wă sa.

⁶ Lu aseh bri oei dơ̆ng kơpal groi dui jơhngơ̆m mơhik thoi kŏ bri, măt lu sư hơlơp yua kơ ưh kơ đei 'nhĕt sa.”

⁷ Ơ Kră Yang mă khan tơdrong kơnê̆ lu nhôn plơ̆ tơbăt kơ lu nhôn, apinh Ih tơgŭm nhôn yua kơ anăn Ih! Tơpă lu nhôn pơm kơnê̆ tih dêh; lu nhôn pơm yoch hăm Ih boih.

⁸ Ơ Kră Yang Ih boih tơ'ngla mă lu bơngai Isơrael chang hơmĕng. Tơ'ngla mă dŏng pơklaih kơplah năr đei tơdrong truh, liơ Ih nhen thoi bơngai tơmoi lăm char âu, Thoi bơngai chă yak găn weh 'bĭch kơmăng đĕch.

⁹ Liơ Ih nhen thoi bơngai đei tơdrong truh ưh kơ tam băt, nhen thoi bơngai nuih pran mă ưh kơ gơh dŏng pơklaih bu? Mă-lei ơ Kră Yang, Ih oei oei hơdai nhôn, đe krao nhôn kon Ih, apinh Ih 'nĕ kơ achăng lê̆ lu nhôn.

¹⁰ Kră Yang khan gah kon pơlei 'nâu: “Lu sư 'maih kơdâu tơklah thoi noh, ưh kơ băt pơkơ̆ng jơ̆ng lu sư; Na Kră Yang ưh kơ sơng iŏk lu sư; Dang ei, Kră Yang 'blŏk kơ tơdrong kơnê̆ lu sư, Kră Yang wă phak lu sư đơ̆ng pơm yoch.”

¹¹ Kră Yang khan kơ inh: “Ih 'nĕ krao khan apinh Kră Yang ăn tơdrong hiôk 'lơ̆ng kơ kon pơlei âu;

¹² Mă khan lu sư ơ̆t kơ sŏng sa, Inh ưh kơ đei mơ̆ng nơ̆r lu sư krao khan ôh, mă khan lu sư pơyơ̆r tơmam soi 'buh dah tơmam soi phe 'ba, Inh ưh kơ iŏk ôh; mă-lei Inh gô pơrăm lu sư hăm đao gưm, hăm tơdrong pơngot rơwĕt păng hăm tơdrong jĭ hơpoh.”

¹³ Inh khan: “Ơ Kră Yang Tih Hloh, lu bơngai khan lê̆ adrol ling-lang khan kơ lu sư, ‘Lu iĕm ưh kơ đei 'bôh đao gưm, kư̆m huay kơ đei pơngot rơwĕt truh mơ̆n, Inh gô ăn kơ lu iĕm đei rơnŭk rơnua ling-lang lăm dêh char âu.’ ”

¹⁴ Kră Yang khan kơ inh: “Lu bơngai khan lê̆ adrol yua anăn Inh na pơma hơlĕnh, Inh ưh kơ đei wơh lu sư ôh, kư̆m ưh kơ đei tơtă dah pơma athei lu sư mơ̆n. Lu sư khan lê̆ adrol kiơ̆ thoi lu sư chă pơm 'bôh ưh kơ tơpă, chă hlang pơpơn kư̆ kă wă pơhlŭ lu iĕm kiơ̆ kơ lu sư tơchĕng đon kơdih.”

¹⁵ Thoi noh Kră Yang khan: “Gah lu bơngai mă khan lê̆ adrol hơlĕnh, lu sư yua anăn Inh na khan lê̆ adrol Inh ưh kơ đei wơh, mă-lei lu sư khan. ‘Đao gưm hăm pơngot rơwĕt ưh kơ truh tơ dêh char âu ôh.’ Lu bơngai khan lê̆ adrol noh boih gô lôch kơ đao gưm păng pơngot rơwĕt.

¹⁶ Lu kon pơlei mă mơ̆ng lu sư khan lê̆ adrol noh kư̆m lôch kơ đao gưm, pơngot rơwĕt hơdai hăm akăn, hăm kon drŏ-nglo kon drŏ-kăn lu sư. Akâu lu sư đe gô klơ̆m lê̆ hnơ̆k hnăk tơ rok trong pơlei Jêrusalem, ưh kơ đei bu 'bŭ. Inh gô tuh tơdrong kơnê̆ đêl lu sư pơm tơ kơ̆l lu sư.”

¹⁷ Apinh ih khan kơ lu sư nơ̆r 'nâu: Ăn kơ măt inh lĕch đak măt ling-lang, Măng năr ưh kơ pơdơh, yua kơ kon adruh inh, kơ kon pơlei inh, răm-'băm jĭ rơka hơbur dêh, đe pơm jĭ pơmat dêh kơ lu sư.

¹⁸ Tơdah inh năm tơ mir chŭn, to akâu lu bơngai lôch kơ đao gưm, tơdah inh mơ̆t tơ pơlei tih, to 'bôh lu bơngai jĭ jăn yua kơ pơngot rơwĕt! Lu 'bok khan lê̆ adrol păng lu 'bok soi. Chă yak năm lăm dêh char mă lu sư ưh kơ lah băt.

¹⁹ Lei Ih wă achăng lê̆ lu bơngai Juđa hă? Ih kư̆m areh kơ Siôn hă? Liơ ih teh tôn lu nhôn, dĭng mah rơka lu nhôn hơmet pă klaih? Lu nhôn hơmĕng rŏ kơ hiôk-hian, Mă-lei ưh kơ đei tơdrong 'lơ̆ng; lu nhôn wă kơ gơh klaih, mă-lei rai tơ'bơ̆p tơdrong hli krưp.

²⁰ Ơ Kră Yang lu nhôn băt nhôn yoch kơnê̆, păng tơdrong yoch lu yă 'bok lu nhôn pơm; tơpă lu nhôn đei pơm yoch kơnê̆ boih hăm Ih.

²¹ 'Nĕ kơ achăng lê̆ lu nhôn; yua kơ anăn Ih, 'nĕ pơm kơ anih pơtao ư-ang Ih đe pơjăm, Apinh Ih 'blŏk bĕ nơ̆r Ih đei pơgơ̆p hăm lu nhôn păng 'nĕ kơ tŭk.

²² Hăm đei lu yang kiơ gơh pơm đak 'mi ăn kơ kon bơngai? Đơ̆ng plĕnh hăm gơh tơjur kơdih đak 'mi tơ teh? Ơ Kră Yang 'Bok Kei-Dei lu nhôn, Ih đĕch gơh pơm. Thoi noh lu nhôn oei chang gô Ih, Yua kơ Ih boih pơjing kơ dôm tơdrong noh.