Je 13 - Sơ̆p Hlabơar Nơ̆r 'Bok Kei-Dei

Che hơtăng tơ̆n kơiĕng

¹ Kră Yang khan kơ inh thoi âu: “Năm răt bĕ che hơtăng tơ̆n kơiĕng ih, na tơ̆n 'bơ̆t kơiĕng ih mă-lei 'nĕ kơ tong lăm đak.”

² Inh răt che tơ̆n kơiĕng kiơ̆ thoi Kră Yang athei, na inh tơ̆n sư tơ kơiĕng inh.

³ Kră Yang khan kơ inh wơ̆t mă 'bar dơ̆ng:

⁴ “Chĕp ba bĕ che tơ̆n kơiĕng mă ih răt, dang ei oei tơ̆n noh, iung năm bĕ tơ jê̆ đak Krong Ơphrat, na tah ôn bĕ che noh lăm tơmo hơđang.”

⁵ Thoi noh na inh năm ôn lê̆ che noh tơ jê̆ đak Krong Ơphrat kiơ̆ thoi nơ̆r Kră Yang athei inh.

⁶ Đunh năr 'biơ̆ đơ̆ng rŏng kơ noh, Kră Yang khan kơ inh: “Iung bĕ năm tơ đak Krong Ơphrat na iŏk dơ̆ng che tơ̆n kơiĕng mă Inh đei athei ih ôn tơ noh ki.

⁷ Na inh năm tơ đak Krong Ơphrat, sir dui iŏk che tơ̆n kơiĕng đơ̆ng anih mă inh ôn lê̆, lăng âu che tơ̆n kơiĕng noh bluch boih, ưh pă gơh yua dơ̆ng.

⁸ Kră Yang khan kơ inh:

⁹ Kră Yang khan thoi âu: “Inh gô pơrăm tơdrong pơang lu bơngai Juđa păng tơdrong pơang pơlei tih Jêrusalem.

¹⁰ Kon pơlei kơnê̆ âu sơngah boih kuă kơ mơ̆ng nơ̆r Inh athei, arih pơm kiơ̆ kơ jơhngơ̆m arăng lu sư kơdih wă, kơkuh awih awăn kơ yang nai; na lu sư jing thoi che tơ̆n kơiĕng âu, ưh pă gơh wă yua pơm kiơ dơ̆ng.

¹¹ Pơtih thoi che tơ̆n kơiĕng klep tơ kơiĕng rim 'nu bơngai thoi yơ, Inh gô ăn kơ đĭ-đăng adrĕch adrung bơngai Isơrael, hăm adrĕch Juđa klep tơ Inh thoi noh, wă kơ lu sư jing kon pơlei pơla Inh, wă ư-ang, kơ Inh wă kơkuh bơnê kơ Inh. Mă-lei lu sư kuă kơ mơ̆ng Inh.”

Kơdŭng akar mong sik

¹² Roi ăn bĕ kơ lu sư tơdrong 'nâu: “Kră Yang, 'Bok Kei-Dei Isơrael khan: ‘Rim kơdŭng akar sik athei tuh 'bĕnh sik hơmu.’ Tơdah lu sư khan kơ ih: ‘Rŏ kơ nhôn ưh kơ băt rim kơdŭng akar sik athei 'bĕnh kơ đak sik hơmu.”

¹³ Ih athei khan kơ lu sư. Kră Yang khan: “'Nâu, Inh gô tuh sik 'bĕnh kơ 'bơ̆r kon pơlei oei lăm dêh char âu, lu pơtao mă hơ-oei 'bơ̆t tang-dŏ pơtao Đawit, lu 'bok soi, lu 'bok khan lê̆ adrol păng kơ đĭ-đăng lu bơngai mă oei lăm pơlei Jêrusalem.

¹⁴ Inh gô hơtŭt lu sư, lu sư pơchah hơtŭt băl kon drŏ-nglo hăm 'bă sư, Inh ưh pă pơdơh ti, pă mơnat, ưh pă 'mêm kơ lu sư, kơplah Inh pơrăm lu sư.”

Adrĕch adrung Juđa pơm bơnă

¹⁵ Pơgling đon iĕm mơ̆ng bĕ. 'Nĕ kơ pơang, Yua kơ Kră Yang khan boih.

¹⁶ Ư-ang bĕ kơ Kră Yang 'Bok Kei-Dei iĕm, adrol kơ Sư wă ăn măng mu truh, adrol kơ jơ̆ng lu iĕm kơtơih 'bơm kông măng mu gueo. Kơplah lu iĕm chă hơdah ră, Sư tơplih tă tơ măng mu, Sư gô ăn kơ măng mu jing măng klăm hơ'bơ̆l gueo.

¹⁷ Mă-lei tơdah lu iĕm kuă kơ mơ̆ng, inh gô nhơ̆m lăm to, yua kơ tơdrong lu iĕm pơang. Măt inh gô nhơ̆m ơh ol dêh, đak măt inh gô lĕch ro, yua kơ triu Kră Yang đe gô rôp pơm bơnă.

¹⁸ Khan bĕ kơ pơtao păng mĕ pơtao: “Jur bĕ đơ̆ng tang-dŏ pơtao hơ-oei tơ teh, yua kơ môk pơtao ư-ang huŏng đơ̆ng kơ̆l boih.

¹⁹ Đĭ-đăng pơlei lăm tơring Negewơ đe gô wang tăp, ưh kơ đei bu pơih gơh lĕch. Đĭ-đăng adrĕch Juđa đe gô rôp pơđĭ ưh pă đei bu klaih.

²⁰ Ngơk lăng bĕ; lu bơngai mă truh đơ̆ng gah yă-nơ̆m to. Khŭl triu mă Inh ăn boih kơ ih, đĭ-đăng khŭl triu mă ih pơư tơ yơ boih.

²¹ Ih gô pơma liơ mưh Kră Yang ăn minh 'nu bơngai tơmoi pơm yŏng pơgơ̆r ih. Lu bơngai mă buăl juăt iĕm, lu bơngai mă lu iĕm đei bơtho pơhrăm lê̆ sơ̆? Ih ưh kơ jĭ jơhngơ̆m klơm klak thoi bơngai drŏ-kăn hơiơch?

²² Păng tơdah ih khan lăm jơhngơ̆m ih. “Yua kơ kiơ tơdrong 'nâu truh kơ inh?” Noh yua kơ tơdrong yoch kơnê̆ ih tih tơpă. Dĭng mah đe tưk hơbĕn ih, păng đe gô tơrôp pơm kơnê̆ kơ ih.

²³ Bơngai Êthiôpi hăm gơh tơplih ming akar găm lu sư, djrang hăm gơh tơplih sŏk brông lu sư, lu iĕm kư̆m lei-lăi juăt kơ pơm yoch boih. Liơ iĕm gơh pơm 'lơ̆ng?

²⁴ “Inh gô pơpuh pơđông lu iĕm thoi kial bah đơ̆ng char glă pơđông hơkam 'ba.

²⁵ 'Nâu boih tơdrong Inh 'măn lê̆ kơ iĕm, đei klah asong hơgăt lê̆ pha ăn kơ ih.” Noh Kră Yang khan: Yua kơ iĕm hiơt kơ Inh boih; na gơnang kơ rup yang hơlĕnh pơdăr.

²⁶ Inh gô plôh lê̆ hơbĕn iĕm truh tơ muh măt iĕm, na gô 'bôh tơdrong mơlâu iĕm.

²⁷ Inh 'bôh boih tơdrong kơnê̆ iĕm pơm, Ih pơm pơyô kư̆ kă, tơdrong luĕl 'blal. Pơm pơyô kư̆ kă tơ lăm groi dah tơ mir chŭn. Ơ Jêrusalem răm-'băm tơpă kơ iĕm! Iĕm ưh kơ wă hơmet rơgoh dĭng dang yơ?”